Ieremia 2:1-37
2 KUA hoko mai foki kia au e kupu a Iehova, kua pehe mai,
2 Kia fano a koe, mo e ui atu ki Ierusalema, kia pehe atu ki ai, Kua vagahau mai pehe a Iehova, Kua manatu e au a koe, ko e hau a totonu mai ke he vaha ne tamafine ai, mo e hau a fakaalofa ke he vaha kua nakaila fai tane a koe, ne mui mai ai a koe kia au ke he tutakale, ke he motu kua nakai to mena ai.
3 Ne tapu a Isaraela ma Iehova, ko e fua uluaki a ia he hana tau mena ne tutupu: Kua hala a lautolu oti kua kai a ia, to hoko kia lautolu e kelea, kua vagahau mai pihia a Iehova,
4 Ko e magafaoa a Iakopo na e, mo e tau magafaoa oti he magafaoa a Isaraela, kia fanogonogo mai a mutolu ke he kupu a Iehova.
5 Kua vagahau mai pehe a Iehova, Ko e heigoa kia e mahani hepehepe kua kitia he tau matua ha mutolu kia au, he o mamao atu a lautolu ia au, mo e mumui atu a lautolu ke he tau mahani fakateaga, mo e mahani fakateaga ai a lautolu?
6 Ti nakai pehe age a lautolu, Ko fe a Iehova, ne ta hake a tautolu mai he motu ko Aikupito, mo e takitaki e ia a tautolu ke he tutakale, ko e motu taluē ne loga ai e tau luo, ko e motu pakepake, ha ha i ai foki e ata he mate, ko e motu nakai fina age ai taha, to nakai nofo ai foki ha tagata?
7 Ti fakahoko mai e au a mutolu ke he fonua talumelie, kia kai ai e mutolu hana tau fua mo e hana tau mena mitaki; ka kua o mai a mutolu ti kelea ai haku a motu ia mutolu, ti kua eke e mutolu haku a tufaaga mo mena vihiatia.
8 Nakai pehe age e tau ekepoa, Ko e fe kia a Iehova; ko e tau fakaako he fakatufono foki nakai iloa e lautolu au; kua fakafualoto mai kia au he tau leveki mamoe, ko e tau perofeta foki kua perofeta ai a lautolu ke he higoa a Paala, mo e mumui atu a lautolu ke he tau mena nakai aoga.
9 Ko e mena ia ni to fetoko foki au mo mutolu, kua pihia mai a Iehova, mo e fetoko au mo e fanau he ha mutolu a fanau.
10 Ko e mena ia kia o atu ai ke he tau motu ne takai he tahi ko Kitimo, mo e kitekite ki ai; mo e fakafano atu e mutolu ki Kitara mo e manamanatu fakalahi ai a mutolu, mo e kitekite po ke ha ha i ai nakai ha mena pehenai.
11 Po ke hukui nakai ha motu ha lautolu a tau atua, ka e nakai ko e tau atua e tau mena ia? Ka ko e haku a motu kua hukui aki ha lautolu ke he mena nakai aoga.
12 Kua pehe mai a Iehova, Ko e lagi na e, kia ofo ā koe he mena nai, kia vivivivi a, mo e fakaatukehe lahi.
13 Ha ko e ua e mena kelea kua eke he motu haku; kua tiaki e lautolu au ko e vai puna he moui, ti keli e lautolu e tau vaikeli ma lautolu, ko e tau vaikeli maihiihi nakai puke ai ha vai.
14 Ko e tupa kia a Isaraela? Ne fanau kia ia ke he kaina? ko e ha kia kua eke a ia mo tagata ne fofo he tau?
15 Kua tagi atu kia ia e tau punua leona, kua fakaleo lahi a lautolu, mo e moumou ai e lautolu hana motu; ti huhunu e lautolu hana tau maga, kua nakai nofo ai taha.
16 Ko e fanau a Nofi mo Tapenesa, kua kai e lautolu hau a tumuaki ulu.
17 Nakai kia eke e koe e tau mena nai kia koe, he tiaki e koe a Iehova hau a Atua ke he vaha ne takitaki ai e ia a koe ke he puhala.
18 Hanai, ko e heigoa hau kua eke ke he puhala ki Aikupito ke inu ai he vailele ko Sikora? ko e heigoa foki hau kua eke ke he puhala ki Asuria, ke inu ai he vai he Vailele?
19 To akonaki atu ni he mahani kelea hau kia koe, ti fakahala ai a koe he hau a tau liliu kehe; hanai, kia iloa e koe, mo e kitia, ko e mena kelea mo e kona kua tiaki e koe a Iehova hau a Atua, mo e nakai matakutaku a koe kia au, kua pihia mai e Iki ko Iehova Sapaota.
20 Ha ko e mena fafati e au i tuai hau a lakau hahamo, ti motumotu e au hau a tau liliaga; ti pehe mai a koe, Nakai fekafekau atu au; ha ko e mena ki luga he tau mouga tokoluga oti mo i lalo he tau akau lau uhiuhi oti ne takoto ai a koe, kua faivao ai.
21 Ne to e au a koe ko e vine Soreta, ko e fua mitaki moli ni; ti kua liliu fefe a koe mo tau la kelea he vine kehe kia au?
22 Ha ko e mena pete he mulu e koe a koe ke he neteri, mo e eke fakalahi ai ke he maga moli; kua tohia hau a mahani kelea ki mua haku, kua pihia mai e Iki ko Iehova.
23 Po ke pehe mai fefe a koe, Kua nakai kelea au, nakai mui atu au kia Paala? Kia kitekite a ke he puhala hau ke he pahua, kia iloa a e koe e mena ne eke e koe; ko e punua kamela fifine a koe ne mafiti lahi, ne poi fano ai ke he hana puhala.
24 Ko e asini vao ne mahani mo e vao, ko e manako he hana loto ne hohogi ai e ia e matagi; kua maeke kia hai ke liuaki mai a ia he hana manako? Nakai mategugu a lautolu ne kumi a ia, kua moua e lautolu a ia ke he hana mahina.
25 Kia taofi e koe hau a tau hui neke nakai afi hau a tau aloalohui, mo e hau a pu ua neke fia inu a koe; ka e pehe mai a koe, nakai ni aoga; nakai, kua loto au ke he tau tane kehe to mui atu foki au kia lautolu.
26 Tuga ne mā e tagata kaiha ka moua a ia, kua fakamā ai pihia e magafaoa a Isaraela; ko lautolu, mo e tau patuiki ha lautolu, mo e ha lautolu a tau iki, mo e ha lautolu a tau ekepoa, mo e ha lautolu a tau perofeta;
27 Ko lautolu ne pehe atu ke he akau, Ko e haku a matua a koe; mo e maka Ne fanau e koe au; kua haga mai e lautolu ha lautolu a tau tua kia au, ka e nakai ko e tau mata ha lautolu; ka ko e vaha ke malaia ai a lautolu to pehe mai a lautolu, Kia matike a, mo e fakamoui e koe a mautolu.
28 Ka ko e fe kia hau a tau atua ne eke e koe mau? Kia mamatike a lautolu po ke maeke nakai kia lautolu ke fakamoui a koe ke he vaha ne malaia ai a koe; ha ko e mena kua tatai e tau maga hau ka totou, mo e totouaga he hau a tau atua, ma Iuta na e.
29 Ko e heigoa e mena ne fetoko mai a mutolu kia au? Kua fakafualoto mai a mutolu oti kia au, kua pihia mai a Iehova.
30 Ne fahi e au ha mutolu a fanau, ka e nakai aoga; nakai talia e lautolu e akonakiaga; kua fakaoti ai e tau perofeta ha mutolu he tau pelu ni ha mutolu, tuga ne fakaotioti he leona.
31 Ko e hau nai na e, kia manamanatu ā mutolu ke he kupu a Iehova. Kua eke kia au mo tutakale kia Isaraela; po ke eke mo motu pouli? Ko e ha kua pehe mai haku a motu, Kua toka noa tuai a mautolu nakai o atu foki a mautolu kia koe.
32 Kua maeke kia ke he tamāfine tote ke nimo hana tauteaga? po ke kitofaitane kia ke nimo hana pipi? Ka kua fakanimonimo he motu haku au ke he tau aho nakai maeke ke totou he loga.
33 Ko e ha kia ne taute e koe hau a mahani ke kumi ke manako ai e tau tagata kia koe? Ko e mena ia ne fakaako ai e koe hau a mahani ke he tau fifine mahani kelea.
34 Kua kitia foki ke he tau kala he hau a tau tapulu e tau toto he tau moui he tau tagata nonofogati kua nakai hala; nakai ko e kumi fakamakutu ne kitia ai e au, ka e ha ha i ai ke he tau mena oti ia.
35 Ka kua pehe mai a koe, Ko e moli to liu kehe hana ita ia au, he nakai hala au. Kitiala, to fakafili e au a koe, ha kua pehe a koe, Nakai hala au.
36 Ko e ha ne faifano mau a koe ke liliu ai hau a puhala? to mā a koe ha ko Aikupito, tuga ne mā ai a koe ko Asuria.
37 To fano foki a koe mai he mena ia, mo e hau a tau lima ki luga he ulu hau; ha kua vihiatia e Iehova hau a tua ke he tau motu, ti nakai ni monuina ai a koe.