Ieremia 20:1-18
20 KO Pasura ko e tama a Imere, ko e ekepoa, ko e takitaki ne mua a ia ke he fale a Iehova, ne logona ai e ia e tau kupu na ne fakamatala e Ieremia.
2 Ti ta e Pasura e perofeta ko Ieremia, mo e tuku ai a ia ke he akau, ha ha i ai ke he gutuhala tapa ki luga a Peniamina, ne tata age ke he fale a Iehova.
3 Kua hoko ke he aho a pogipogi ti tamai ai e Pasura a Ieremia he akau. Ti pehe age a Ieremia kia ia, Nakai ui e Iehova hau a higoa ko Pasura ka ko Makoru-misapipa.
4 Ha kua talahau mai pehe a Iehova, Kitiala, to eke e au a koe mo matakutaku kia koe, mo e hau a tau kapitiga oti kana; to mamate a lautolu ke he pelu ha lautolu kua fai fi kia lautolu, to kitia ai foki he tau mata hau; to tuku atu foki e au a Iuta oti ke he lima he patuiki a Papelonia, ti fakapaea atu e ia a lautolu ki Papelonia, mo e keli ai e ia a lautolu ke he pelu.
5 To ta atu foki e au e koloa oti he maga nai mo e tau mena oti ha ha i ai ne moua ai he gahua, mo e tau mena uho oti ne toka ai, mo e tau koloa oti he tau patuiki a Iuta to ta atu ni e au ke he tau lima ha lautolu kua fai fi kia lautolu, ti fofo e lautolu a lautolu, mo e uta a lautolu, mo e ta age a lautolu ki Papelonia.
6 Ko koe foki, Pasura na e, mo e hau a magafaoa oti, to o a mutolu ke he paeaaga; to hoko age foki a koe ki Papelonia, ti mate ai a koe, ti tanu ai ni a koe ke he mena ia, ko koe mo e hau a tau kapitiga oti, ko lautolu ne perofeta atu ki ai e koe e tau mena pikopiko.
7 Iehova na e, ne ole mai a koe kia au, ti talia ai e au; ne mua hau a malolo ke he malolo haku, ti kautu ai a koe kia au; kua eke au mo mena ke feki ai ke he aho oti, kua va e tau tagata oti kia au.
8 Ha ko e mena ka vagahau atu e au, kua tagi au, kua ui atu au ko e favale mo e moumou; ha kua eke e kupu a Iehova mo mena ke ekefakakelea mai ai kia au, mo mena ke vā ai foki ke he aho oti.
9 Ti pehe atu au, Nakai talahau e au a ia, ti nakai vagahau foki e au ke he hana higoa, ti tuga ne mena ha i ai ke he haku loto e afi kaka kua puipui ai ke he haku a tau hui motua, ti oti e manava haku he fakauka, kua nakai ni maeke au.
10 Ha kua logona e au e tokologa ne ekefakakelea mai, kua agaagai au he matakutaku. Kia talahau atu a, to talahau atu e mautolu a ia, kua pihia haku a tau kapitiga oti, ko lautolu ne takahao mai ke hopotitō au, Na ko e mena to ole a ia, mo e kautu a tautolu kia ia, mo e lalago atu a tautolu kia ia.
11 Ka e ha ha ia au a Iehova; kua tuga ne toa ne matakutakuina; ko e mena ia to tupetupe ai a lautolu kua tutuli au, nakai kautu a lautolu, to ma lahi a lautolu; ha kua nakai pulotu ai a lautolu; ti nakai nimo tukulagi ha lautolu a mā.
12 Iehova Sapaota na e, kua kamatamata e koe a lautolu kua tututonu, kua fioia e koe e tau manatu mo e tau loto, kia kitia e au hau a lalago atu kia lautolu; ha kua fakakite atu e au haku a taufetoko kia koe.
13 Kia lologo a kia Iehova, kia fakaheke atu a a mutolu kia Iehova; ha kua laveaki e ia e tau momoui he tau tagata nonofogati mai he tau lima ha lautolu ne mahani kelea.
14 Kia malaia e aho ne fanau ai au; aua neke fakamonuina e aho ne fanau ai au he haku a matua fifine.
15 Kia malaia e tagata ne uta e ogo ke he haku a matua tane, mo e pehe age, Kua fanau kia koe e tama tane; ti fiafia lahi ai a ia.
16 Kia eke e tagata ia ke tuga ne tau maga ne fakaoti ai e Iehova, mo e nakai tokihala ai a ia; kia logona foki e ia e tagi ke he magaaho pogipogi, mo e kalaga fiafia ke he tupou la;
17 Ha nakai tamate e ia au ke he manava; ti eke ai haku a matua fifine mo tukuaga haku, ti lahi mau ai tukulagi hana fatu.
18 Ko e ha ne hau ai au he manava ke kitia ai e mamahi mo e mānu, kia oti ai haku a tau aho mo e mā?