Ieremia 21:1-14
21 KO e kupu a Iehova ne hoko kia Ieremia he fakafano atu kia ia he patuiki ko Setekaia a Pasura ko e tama a Malekia, katoa mo Sefanaia ko e tama a Maaseia ko e ekepoa, kua pehe atu,
2 Kia huhu atu la a koe kia Iehova ma tautolu; ha kua tau mai kia tautolu a Nepukanesa ko e patuiki a Papelonia; po ke eke nakai e Iehova kia tautolu ke lata mo e hana tau mana oti, ke fano kehe ai a ia ia tautolu.
3 Ti pehe mai ai a Ieremia kia lautolu, Kia tala age pehe a mutolu kia Setekaia,
4 Kua talahau mai pehe a Iehova ko e Atua a Isaraela, Kitiala, to fakaliu kehe e au e tau kanavaakau he tau ha ha he tau lima ha mutolu, kua tau ai a mutolu mo e patuiki a Papelonia mo e tau tagata Kaletaia kua pa takai ai a mutolu ki tua he pa, ti fakapotopoto ai e au a lautolu ki loto he maga nai.
5 Ko au foki, to tau au mo mutolu mo e lima fakaolo, mo e lima malolo, ke he ita, mo e vale, mo e ita lahi.
6 To ta e au a lautolu kua nonofo ke he maga nai, ko e tau tagata katoa mo e tau manu, to mamate a lautolu he tatalu lahi.
7 Kua pehe mai a Iehova, ka mole ia, to tuku atu e au a Setekaia ko e patuiki a Iuta, mo e hana tau fekafekau, mo e motu, mo lautolu he maga nai kua toe he tatalu, mo e pelu, mo e hoge, ke he lima a Nepukanesa ko e patuiki a Papelonia, mo e tau lima ha lautolu kua fai fi kia lautolu, mo e tau lima ha lautolu kua kumi a lautolu ke kelipopo, ti keli e ia a lautolu ke he pelu, nakai fakamomoui e ia a lautolu, nakai toka, to nakai ni fakaalofa.
8 Ti pehe atu a koe ke he motu nai, Kua talahau mai pehe a Iehova, Kitiala, kua tuku atu e au ki mua he motu nai e puhala he moui, mo e puhala he mate.
9 Ko e tagata ka nofo ke he maga nai to mate a ia ke he pelu, mo e hoge, mo e tatalu, ka ko ia ka hu atu mo e vevehe atu ke he tau tagata Kaletaia kua agaagai mai kia mutolu, to moui a ia, ti eke hana moui mo mena kua moua he tau māna.
10 Ha kua hagao atu au ke he maga nai ke kelea ai, ka e nakai ke monuina ai, kua pihia mai a Iehova; to tuku atu ai ke he lima he patuiki a Papelonia, ti huhunu ai e ia ke he afi.
11 Ka ko e magafaoa he patuiki a Iuta, Kia fanogonogo mai ā mutolu ke he kupu a Iehova;
12 Ko e magafaoa a Tavita na e, kua vagahau mai pehe a Iehova, Kia eke a e fakafiliaga ke he magaaho pogipogi, mo e laveaki e lautolu a ia ne fofo ai hana tau mena mai he lima he tagata favale, neke fina atu ai haku a ita tuga e afi mo e huhunu ai ka e nakai maeke ke he taha ke tamate, ha ko e kelea he ha mutolu a mahani.
13 Kitiala, ko koe kua nofo ke he pahua, ko e kaumaka ha ha i ai ke he kelekele tatai, kua mamahi au kia koe, kua pihia mai a Iehova; ko mutolu ne pehe, Ko hai ke hifo mai ke tau mo tautolu? ko hai foki ke huhu mai ke he tau fale ha tautolu?
14 To taui atu e au kia mutolu ke lata mo e tau fua he ha mutolu a tau mahani, kua pihia mai a Iehova; to tafu foki e au e afi ke he vao hana, ti huhunu ai hana tau fahi oti.