Ieremia 26:1-24
26 KO e kamataaga he eke mo patuiki a Iehoakima e tama a Iosia ko e patuiki a Iuta, ne hoko mai ai e kupu nai ia Iehova, kua pehe mai,
2 Kua talahau mai pehe a Iehova, Kia tu atu a koe ke he lotopā he fale a Iehova, mo e vagahau atu a koe ke he tau maga oti a Iuta, kua o mai ke hufeilo ai ke he fale a Iehova, e tau kupu oti kua poaki atu e au kia koe ke vagahau atu ai e koe kia lautolu, aua neke toka e koe ha kupu;
3 Na ko e fanogonogo mai a lautolu, mo e takitaha a lautolu mo e liu kehe he hana puhala kelea, kia tokihala au he malaia ne manatu ai e au ke fakahoko atu e au kia lautolu, ha ko e kelea he tau mahani ha lautolu.
4 Ti pehe atu a koe kia lautolu, Kua vagahau mai pehe a Iehova, Kaeke ke nakai fanogonogo mai a mutolu kia au, ke o fano ai ke lata mo e haku a fakatufono kua tuku atu e au ki mua ha mutolu,
5 Ke fanogonogo ke he tau kupu he haku tau fekafekau ko e tau perofeta, ne fakafano atu e au kia mutolu; ne uhu matike au mo e fakafano atu e au a lautolu, ka e nakai fanogonogo mai a mutolu;
6 Ti eke ai e au e fale nai ke tuga a Sailo, to eke foki e au e maga nai mo mena ke kaialu ki ai he tau motu oti he lalolagi.
7 Kua fanogonogo e tau ekepoa, mo e tau perofeta, mo e motu oti kia Ieremia kua vagahau ai ke he tau kupu na ke he fale a Iehova.
8 Kua oti he vagahau atu e Ieremia ke he tau mena oti ne poaki mai e Iehova, ke vagahau atu ai ke he motu oti, ti toto atu ai a ia he tau ekepoa, mo e tau perofeta, mo e motu oti, kua pehe atu, To mate ni a koe.
9 Ko e heigoa e mena kua perofeta mai a koe ke he higoa a Iehova, kua pehe mai, To eke e fale nai ke tuga na Sailo, to eke foki e maga nai mo maga tiaki ti nakai nofo ai taha? Ti fakapotopoto ai e motu oti kia Ieremia ke he fale a Iehova.
10 Kua logona he tau iki a Iuta e tau mena ia, ti o hake ai a lautolu mai he fale he patuiki, ke he fale a Iehova, mo lautolu ne nonofo ke he mena ne fina atu ai ke he gutuhala fou he fale a Iehova;
11 Ti tala age e tau ekepoa mo e tau perofeta ke he tau iki mo e motu oti, kua pehe age, Kua lata ke mate e tagata nai, ha kua talahau mai e ia e tau mena kelea ke hohoko ke he maga nai, tuga he logona ai e mutolu.
12 Ti tala atu e Ieremia ke he tau iki oti, mo e motu oti kua pehe atu, Kua fakafano mai e Iehova au ke talahau ai ke he fale nai, mo e maga nai e tau kupu oti kua logona ai e mutolu.
13 Hanai, kia taute fakamitaki e mutolu ha mutolu a tau puhala, mo e ha mutolu a tau mahani, mo e fanogonogo ā mutolu ke he leo a Iehova ha mutolu a Atua; ti tokihala ai a Iehova he malaia ne vagahau mai e ia ke hoko kia mutolu.
14 Ka ko au nai, kitiala, ha ha he tau lima ha mutolu au, kia eke a e mutolu kia au e mena kua mitaki mo e tonu kia mutolu.
15 Ka kia iloa ni e mutolu, kaeke ke kelipopo e mutolu au, ti tuku ai e mutolu e toto he tagata nakai hala ki luga ha mutolu, katoa mo e maga nai, mo lautolu kua nonofo ai; ha ko e moli ne fakafano mai e Iehova au kia mutolu ke fakamatala atu ai e tau kupu oti ia kia mutolu.
16 Ti pehe age e tau iki mo e motu oti, ke he tau ekepoa mo e tau perofeta, Nakai lata ke mate e tagata nai, ha kua vagahau mai a ia kia tautolu ke he higoa a Iehova ha tautolu a Atua.
17 Ti tutu ai falu a tagata, ko e tau patu he motu, mo e vagahau ai ke he fakapotopotoaga oti he motu, kua pehe age,
18 Na perofeta mai a Mika ko e Morese, ke he vaha ia Hesekia ko e patuiki a Iuta, ti talahau mai e ia ke he motu oti a Iuta kua pehe mai, Kua vagahau mai pehe a Iehova Sapaota, To eke a Siona mo fonua keli, to eke foki a Ierusalema mo toloaga maka, ko e mouga foki ne ha i ai e fale, to eke ia ke tuga ne tau mena tokoluga ke he vao motua.
19 Ne tamate kia a ia, he patuiki a Iuta ko Hesekia, mo Iuta oti? Nakai kia matakutaku a ia kia Iehova, mo e olelalo atu kia Iehova; ti tokihala ai a Iehova he malaia ne vagahau mai e ia kia lautolu? Ka pihia, ti hala lahi ai a tautolu ke he tau agaga ha tautolu.
20 Ne ha i ai foki taha tagata ne perofeta mai ke he higoa a Iehova, ko Uria ko e tama a Semaia, mai Kiriata–iarima, ne perofeta mai a ia ke he tau mena kelea ke hohoko ke he maga nai, mo e motu oti nai tuga ne tau kupu oti a Ieremia.
21 Ne logona hana tau kupu he patuiki ko Iehoakima, mo e tau toa oti ha ha ia ia, mo e tau iki oti, ti kumi he patuiki a ia ke tamate; ka kua logona ai e Uria, ti matakutaku a ia, ti hola ai a ia, mo e fina atu ki Aikupito.
22 Ti fakafano atu ai he patuiki ko Iehoakima, e tau tagata ki Aikupito, ko Elenatana ko e tama a Akepora mo e falu a tagata fakalataha mo ia ki Aikupito.
23 Ti ta mai ai e lautolu a Uria i Aikupito, mo e takitaki atu e lautolu a ia ke he patuiki ko Iehoakima, ti keli e ia a ia ke he pelu, mo e liti atu ai hana tino kua mate ke he tau tukuaga he tau lalo tagata.
24 Ka kua lagomatai e Aikamo ko e tama a Safana kia Ieremia ke aua neke tuku atu e lautolu a ia ke he tau lima he motu ke kelipopo e lautolu a ia.