Ieremia 28:1-17
28 KO e tau ia ni, ko e kamataaga he eke a Setekaia mo patuiki, ko e patuiki a Iuta, ke he tau fa hana, mo e lima mahina, ne tala mai ai kia au a Hanania ko e tama a Asura ko e perofeta, ko e tagata Kipeona, ke he fale a Iehova, ki mua he tau ekepoa mo e motu oti, kua pehe mai,
2 Kua pehe mai e vagahau a Iehova Sapaota, ko e Atua a Isaraela, kua pehe mai, Kua fafati e au e lakau hahamo he patuiki a Papelonia.
3 Ka nakaila oti ua e tau, to liuaki mai e au ke he mena nai e tau kapiniu oti he fale a Iehova, ne uta kehe ai he patuiki a Papelonia ko Nepukanesa he mena nai, mo e ta age ai ki Papelonia;
4 To liu aki mai foki e au ke he mena nai a Iekonia, ko e tama a Iehoakima, ko e patuiki a Iuta, mo e tau tagata Iuta oti ne fakapaea, kua pihia mai a Iehova; ha ko e mena to fafati e au e lakau hahamo he patuiki a Papelonia.
5 Ti pehe atu e perofeta ko Ieremia kia Hanania ko e perofeta, ki mua he tau ekepoa, ki mua foki e motu oti kua tutu mai ke he fale a Iehova;
6 Kua pehe atu e perofeta ko Ieremia, Amene; kia eke pihia e Iehova; kia fakamau ai e Iehova hau a tau kupu kua perofeta mai, ke liu aki mai ai e tau kapiniu he fale a Iehova, mo lautolu oti kua fakapaea, i Papelonia ke he mena nai,
7 Ka kia fanogonogo mai a koe ke he tau kupu nai ke vagahau atu ai e au ki mua hau, ki mua foki he motu nai,
8 Ko e tau perofeta ne fakamua atu ia au, ne fakamua atu foki kia koe, tali mai i tuai, ne perofeta atu a lautolu ke he tau motu loga, mo e tau kautu lalahi, ke he tau tau, mo e tau malaia, mo e tau tatalu;
9 Ko e perofeta kua perofeta mai ke he monuina, ka hoko e kupu he perofeta ia, ti iloa ai, ko e moli, ko e perofeta ia kua fakafano mai e Iehova.
10 Ti toto he perofeta ko Hanania e lakau hahamo mai he ua he perofeta ko Ieremia mo e fafati ai.
11 Ti vagahau mai ai a Hanania ki mua he motu oti, kua pehe mai, Kua pehe mai e vagahau a Iehova, To fafati pihia e au e lakau hahamo he patuiki a Papelonia ko Nepukanesa ke he tau ua he tau motu oti ka e nakaila oti ua e tau. Ti fano kehe ai e perofeta ko Ieremia.
12 Kua mole he fafati he perofeta ko Hanania e lakau hahamo mai he ua a Ieremia ko e perofeta, ti hoko mai ai e kupu a Iehova kia Ieremia, kua pehe mai,
13 Kia fano ā koe mo e vagahau atu kia Hanania, kia pehe atu, Kua pehe mai e vagahau a Iehova, Kua fatifati e koe e tau lakau hahamo; ka kua eke e koe e tau lapatoa hahamo ke totogi aki.
14 Ha kua vagahau mai pehe a Iehova Sapaota ko e Atua a Isaraela, Kua tuku e au e tau lapatoa hahamo, ke he tau tukeua he tau motu oti ia, kia fekafekau a lautolu kia Nepukanesa ko e patuiki a Papelonia; ti fekafekau ai ni a lautolu kia ia; kua ta atu foki e au kia ia e tau manu he vao.
15 Ti pehe atu e perofeta ko Ieremia, kia Hanania ko e perofeta, Hanania na e, kia fanogonogo mai a; nakai fakafano mai e Iehova a koe; ka e eke ai e koe ke tua e motu nai ke he pikopiko.
16 Ko e mena ia kua vagahau mai pehe a Iehova, Kitiala, to fakafano kehe e au a koe he fuga kelekele; ti mate ai a koe he tau nai; ha kua vagahau a koe ke he fakafualoto kia Iehova.
17 Ti mate ai e perofeta ko Hanania ke he tau ia ni, ke he fitu mahina.