Ieremia 29:1-32
29 KO e tau kupu hanai he tohi ne fakafano age he perofeta ko Ieremia i Ierusalema kia lautolu ne toe he tau patu ne fakapaea, mo e tau ekepoa, mo e tau perofeta, mo e motu oti ni ne fakapaea, ne fakapaea ai e Nepukanesa i Ierusalema ki Papelonia;
2 (Ka kua mole he o atu i Ierusalema e patuiki ko Iekonia, mo e patuiki fifine ko e matua he patuiki, mo e tau eunuka, mo e tau iki a Iuta me Ierusalema, ko e tau tufuga foki, katoa mo e tau tagata ne eke e tau mena lapatoa;)
3 Ne uta ai e Eliasa ko e tama a Safana, mo Kemaria ko e tama a Hilikia, (ne fakafano atu e Setekaia ko e patuiki a Iuta kia Nepukanesa ko e patuiki a Papelonia,) kua pehe age,
4 Kua pehe mai e vagahau a Iehova Sapaota ko e Atua a Isaraela, kia lautolu oti kua fakapaea, ne fakapaea atu e au i Ierusalema ki Papelonia.
5 Kia ta e mutolu e tau fale, mo e nonofo ai a mutolu; mo e to e mutolu e tau kaina, mo e kai ai e mutolu e tau fua;
6 Kia fai hoana a mutolu, mo e fanau ai e mutolu e tau tama tane mo e tau tama fifine; kia fakatokologa ai a mutolu ke he mena ia ka e aua neke fakatokogahoa ai a mutolu.
7 Kia kumi foki e mutolu e monuina he maga kua fakapaea atu e au a mutolu ki ai; mo e liogi a mutolu kia Iehova ma e maga ia; ha ko e monuina hana ke monuina ai a mutolu.
8 Ha kua vagahau mai pehe a Iehova Sapaota ko e Atua a Isaraela, Aua neke fakahehe ai a mutolu he tau perofeta ha mutolu ha ha ia mutolu, mo e ha mutolu a tau taulaatua; ti ua fanogonogo a mutolu ke he tau miti, kua eke ha ko mutolu;
9 Ha kua perofeta atu e lautolu e tau pikopiko kia mutolu ke he haku a higoa; nakai fakafano atu e au a lautolu, kua pihia mai a Iehova.
10 Ha kua pehe mai e vagahau a Iehova, Ka fakakatoatoa ai e tau tau ne fitugofulu i Papelonia, ti ahi e au a mutolu, mo e fakamoli ai e au haku a kupu mitaki kia mutolu, ke liuaki mai e au a mutolu ke he mena nai.
11 Ha kua iloa e au e tau manatu kua manatu ai au kia mutolu, ko e tau manatu ke he monuina, ka e nakai ko e malaia, kua pihia mai a Iehova, ke foaki atu kia mutolu e fakahikuaga ne ha i ai e amaamanaki.
12 Ti ui mai ai e mutolu kia au, to o foki a mutolu mo e liogi kia au, to fanogonogo foki au kia mutolu.
13 To kumi e mutolu au, ti moua ai a mutolu au, ka kumi e mutolu au mo e ha mutolu, a tau loto katoa.
14 Kua pehe mai a Iehova, to moua ai e mutolu au; ti liu aki e au ha mutolu a paeaaga, mo e fakapotopoto e au a mutolu mai he tau motu oti, mo e tau mena oti kua vega e au a mutolu ki ai, kua pihia mai a Iehova; ti liu aki mai e au a mutolu he mena ne fakapaea atu ai e au a mutolu.
15 Kua pehe age a mutolu, Kua fakatu ai e Iehova e tau perofeta ma tautolu i Papelonia;
16 Ko e mena ia kua pehe mai e vagahau a Iehova ke he patuiki kua nofo ke he nofoaiki a Tavita, mo e tau tagata oti kua nonofo ke he maga nai, ko e tau matakainaga ha mutolu kua nakai o atu fakalataha mo mutolu ke he paeaaga;
17 Kua vagahau mai pehe a Iehova Sapaota, Kitiala, to fakafano atu e au kia lautolu e pelu, mo e hoge, mo e tatalu, to eke foki e au a lautolu ke tuga ne tau fua mati kelea lahi, kua nakai maeke ke kai he kelea.
18 To tutuli foki e au a lautolu ke he pelu, mo e hoge, mo e tatalu, to tuku atu foki e au a lautolu ke matematekelea ai ke he tau kautu oti he lalolagi, ke eke mo mena ke kaialu ki ai, mo mena foki ke ofo ai, mo mena foki ke fakakatakatakē ai, mo e ekefakakelea ki ai, ke he tau motu oti kua vega e au a lautolu ki ai.
19 Ha kua nakai fanogonogo mai ai a lautolu ke he haku a tau kupu, kua pihia mai a Iehova, he fakafano atu ai e au haku a tau fekafekau ko e tau perofeta, ne uhu matike au mo e fakafano atu a lautolu, ka e nakai ni fanogonogo mai a mutolu; kua pihia mai a Iehova.
20 Ka ko mutolu, kia fanogonogo mai ā mutolu ke he kupu a Iehova, ko mutolu oti he paeaaga ne fakafano atu e au i Ierusalema ki Papelonia.
21 Kua pehe mai e vagahau a Iehova Sapaota ko e Atua a Isaraela, kia Ahapo ko e tama a Kulaia, mo Setekaia ko e tama a Maaseia, ne perofeta pikopiko atu kia mutolu ke he haku a higoa, Kitiala, to tuku atu e au a laua ke he lima a Nepukanesa ko e patuiki a Papelonia, ti kelipopo e ia a laua ki mua ha mutolu;
22 To uta foki a laua he tau tagata Iuta oti kua nonofo paea ai i Papelonia ke kaialu ai, kua pehe age, Kia eke e Iehova a koe ke tuga a Setekaia, ke tuga a Ahapo foki, ke tunu ai he patuiki a Papelonia ke he afi;
23 Ha kua eke e laua e tau mena kelea i Isaraela, mo e faivao a laua mo e tau hoana he tau tagata ne katofia mo laua, mo e fakamatala e laua e tau kupu mo e pikopiko ke he haku a higoa, nakai poaki atu ai e au kia laua; kua iloa e au, mo e fakamoli ai e au, kua pihia mai a Iehova.
24 Kia vagahau atu foki a koe kia Semaia ko e Nehelami kia pehe atu,
25 Kua pehe mai e vagahau a Iehova Sapaota, ko e Atua a Isaraela, kua pehe mai, Ha kua fakafano atu e koe e tau tohi ke he hau a higoa ke he tau tagata oti i Ierusalema, mo Sefanaia, ko e tama a Maaseia, ko e ekepoa, mo e tau ekepoa oti, kua pehe atu,
26 Kua kotofa e Iehova a koe ke eke mo ekepoa ke hukui aki a Iehoiata ko e ekepoa, kia pule ai a mutolu ke he fale a Iehova, ke he tau tagata takitokotaha kua heketia, mo e eke e ia a ia mo perofeta, kia tuku atu a ia ke he akau, mo e fale puipui.
27 Hanai, ko e ha nakai akonaki a koe kia Ieremia ko e tagata Anatota, kua eke e ia a ia mo perofeta kia mutolu?
28 Ha kua poaki mai e ia kia mautolu i Papelonia, kua pehe mai, Ko e mena mule e paeaaga nai, kia ta e mutolu e tau fale, mo e nonofo ai a mutolu, ti to e mutolu e tau kaina, mo e kai e mutolu e tau fua ka moua ai.
29 Ne totou ai a Sefanaia e tohi na ke he tau teliga he perofeta ko Ieremia.
30 Ti hoko mai ai e kupu a Iehova kia Ieremia, kua pehe mai,
31 Kia poaki atu e koe kia lautolu oti he paeaaga, kia pehe atu, Kua pehe mai e vagahau a Iehova kia Semaia ko e Nehelami, Kua perofeta atu e Semaia kia mutolu, ka ko au, nakai fakafano atu e au a ia, ti eke e ia a mutolu ke tua ke he pikopiko;
32 Ko e mena ia kua vagahau mai pehe a Iehova, Kitiala, to taui atu e au kia Semaia ko e Nehelami, mo e hana fanau; to nakai fai tagata ke nofo fakalataha mo e motu nai; ti nakai kitia e ia e monuina ke eke ai e au ma e haku motu, kua pihia mai a Iehova; ha kua vagahau ai e ia ke he fakafualoto kia Iehova.