Ieremia 30:1-24
30 KO e kupu ne hoko mai ai ia Iehova kia Ieremia, kua pehe mai,
2 Kua vagahau mai pehe a Iehova, ko e Atua a Isaraela, kua pehe mai, Kia tohi a ke he tohi e tau kupu oti kua vagahau atu ai e au kia koe.
3 Ha kua pehe mai a Iehova, Kitiala, ko e hoko mai ne fai e vaha ke liu aki mai ai e au e paegaaga he haku motu ko Isaraela mo Iuta, kua pihia mai a Iehova; to liuaki, mai e au a lautolu ke he kelekele ne foaki atu e au ke he tau matua ha lautolu, to eke ai foki ma lautolu.
4 Ko e tau kupu foki hanai kua vagahau mai ai e Iehova kia Isaraela mo Iuta.
5 Ha ko e mena, kua pehe mai e vagahau a Iehova, Kua logona e tautolu e tomumu ke vivivivi ai, ha ha i ai e matakutaku ka e nakai ko e mafola.
6 Ko e mena ia kia huhu atu la, mo e kitekite a mutolu, po ke fanau nakai he tau tane? Ko e heigoa e mena kua kitia ai e au e tau tane, ne takitaha mo e hana tau lima ke he hana tokupu, tuga ne fifine kua fanau; ko e tau mata oti foki kua faliu, kua maaki tea ni.
7 Oi te, ko e aho lahi haia, nakai tatai ia mo taha; ko e vaha ia ke matematekelea ai a Iakopo; ka to fakamoui ai a ia.
8 Kua pehe mai a Iehova Sapaota, Ko e aho ia foki to fafati e au e lakau hahamo hana ha ke tukeua hāu, ti momotu e au hau a tau liliaga, ti nakai fekafekau foki a ia ke he tau tagata kehe.
9 Ka to fekafekau a lautolu kia Iehova ha lautolu a Atua, mo Tavita ha lautolu a patuiki, ke fakatu ai e au ma lautolu.
10 Kua pehe mai a Iehova, Ko koe foki, Iakopo na e, haku a fekafekau, aua neke matakutaku a koe; ti aua neke fakaatukehe a koe ma Isaraela na e, ha ko e mena kitiala, to fakamoui e au a koe mai he motu mamao, mo e hau a fanau mai he motu kua nonofo paea ai a lautolu; ti liu mai ni a Iakopo, ti okioki ai a ia, mo e nofo ai a ia mo e mafola, ti nakai ha ha i ai foki taha ke fakamatakutaku kia ia.
11 Ha ko e mena, kua pehe mai a Iehova, to ha ha i ai au mo koe ke fakamoui a koe; ha ko e mena to fakaotioti ni e au e tau motu oti ne fakamavehevehe a koe, ka e nakai fakaoti e au a koe, to akonaki fakalata e au a koe, ka e nakai toka e au a koe ke noa mo e akonakiaga.
12 Ha kua vagahau mai pehe a Iehova, Nakai maeke ke fakamaulu hau a tau kafokia, ne kelea lahi hau a tau kafokia.
13 Nakai ha ha i ai taha ke eke hau a taufetoko, nakai fai vai lakau ti nakai fai vai pipi a koe mo e hau a kafokia.
14 Kua nimo a koe ia lautolu oti ne manako kia koe; nakai kumi e lautolu a koe; ha kua ta e au a koe, po ke ta he taha kua fai fi kia koe; mo e akonaki atu e au a koe po ke taha kua favale, he loga hau a tau mahani kelea; kua fakaloga hau a tau hala.
15 Ko e ha kua tagi mai a koe ha ko e hau a kafokia? Kua lahi hau a mamahi ha kua loga hau a tau mahani kelea; kua fakaloga hau a tau hala, ko e mena ia kua eke e au e tau mena ia kia koe.
16 Ko e mena ia to fakaoti ai a lautolu ne fakaoti a koe; ko lautolu oti foki ne fai fi kia koe, to o ni a lautolu oti ke he paeaaga; ko lautolu ne fofo hau a tau mena, to fofo ai e tau mena ha lautolu; ko lautolu oti ne eke a koe mo tau tagata ne fofo he tau, to tuku atu ni a lautolu ke fofo he tau.
17 Ha ko e mena to fakamalolo e au a koe, ti fakamaulu e au hau a tau kafokia, kua pihia mai a Iehova; ha kua ui e lautolu a koe, Ko e taha kua vega kehe; kua pehe age, Ko Siona hanā, nakai tuai kumi atu ki ai e taha.
18 Kua pehe mai e vagahau a Iehova, Kitiala, to liuaki mai e au e paeaaga he tau fale ie a Iakopo, mo e fakaalofa atu au ke he hana tau mena ne nonofo ai; to fakatu foki e maga ke he matiketike ha ha i ai, to nonofo foki e tau tagata ke he fale iki tuga he eke i tuai.
19 To hoko mai ai foki e fakahekeaga, mo e leo ha lautolu ne lologo, to fakatokologa e au a lautolu, ka e nakai fakatokogahoa a lautolu; to fakatupu foki e au ha lautolu a lilifu, ka e nakai eke e au a lautolu mo tau lalo tagata.
20 Ko e ha lautolu a fanau ke tuga ne vaha fakamua a lautolu, to fakatumau foki e au ha lautolu a tau fakapotopotoaga ki mua haku, mo e taui atu e au kia lautolu oti ne favale mai kia lautolu.
21 Ko e iki ha lautolu ko e tagata ha lautolu ni a ia, mo ia kua pule kia lautolu to tupu mai a ia ia lautolu; to fakatata mai e au a ia, ti fakatata mai a ia kia au; ha ko hai kia kua fakamalolo he hana loto ke fakatata mai kia au? kua pihia mai a Iehova.
22 Ti eke a mutolu mo motu haku, ko au foki, to eke au mo Atua ha mutolu.
23 Kitiala, kua fina atu e afa ia Iehova, ko e hana ita ni, ko e afa to kai maka; ke to lahi ai ki luga he tau ulu ha lautolu ne mahani kelea.
24 Nakai liu kehe e ita lahi a Iehova ato eke ai e ia, ato fakamau ai e ia e tau manatu he hana finagalo; to manamanatu a mutolu ki ai ke he tau aho a mui.