Ieremia 31:1-40
31 KUA pehe mai a Iehova, ko e vaha ia to eke au mo Atua he tau magafaoa oti a Isaraela, to eke foki a lautolu mo motu haku.
2 Kua vagahau mai pehe a Iehova, Kua moua he fakaalofa ke he tutakale e motu ne hao mai he pelu, ko Isaraela ni, he fina atu au ke fakanofo a ia mo e monuina.
3 Kua fakakite mai a Iehova kia au mai he mena mamao, kua pehe mai, Ko e fakaalofa tukulagi kua fakaalofa atu ai au kia koe; ko e mena ia kua fakatumau e au haku a fakaalofa kia koe.
4 Ko e tamāfine tote a Isaraela na e, to liu ati hake e au a koe, ti ati hake ai a koe; to taute foki a koe ke he hau a tau topa, ti fina atu foki a koe mo e koli fakalataha mo lautolu kua koli.
5 To liu to e koe e tau uluvine ke he tau mouga a Samaria; to to mena ai he tau tagata gahua fonua mo e kai ai e lautolu e tau fua.
6 Ha ko e mena to hoko ke he aho ke ui ai he tau leoleo ke he tau mouga a Efaraimo, Kia mamatike ā mutolu ke o hake a tautolu ki Siona kia Iehova ha tautolu a Atua.
7 Ha kua pehe mai e vagahau a Iehova, Kia lologo ā mutolu mo e kolikoli ha ko Iakopo, mo e kalaga ā mutolu ha ko e motu ne mua; kia fakailoa atu a, kia fakaheke atu ā mutolu, mo e pehe atu a mutolu, Iehova na e, kia fakamoui e koe hau a motu, ko lautolu kua toe kia Isaraela.
8 Kitiala, to ta mai e au a lautolu he motu ke he fahi tokelau, mo e fakapotopoto e au a lautolu mai he motuaga he lalolagi; to fakalataha foki mo lautolu e tau tagata matapouli, mo e tau tagata kulikuli, ko e fifine kua fatu fakalataha mo e fifine ko e fanau ha ne fai; to liliu mai a lautolu ki hinai ko e motu o tagata tokologa ni.
9 To o mai a lautolu mo e tagi mo e ole mai; to takitaki e au a lautolu; to ta mai e au a lautolu he puhala hako ke he tau vailele, ti nakai tupetupe ai a lautolu; ha ko au ko e matua a Isaraela, ko Efaraimo foki ko e haku a tama uluaki a ia.
10 Kia fanogonogo mai a ke he kupu a Iehova, ko mutolu ko e tau motu na e, mo e talahau atu ai e mutolu ke he tau motu ne tutu ke he hala kau tahi ne mamao, kia pehe atu, Ko ia ne fakamavehevehe a Isaraela to fakapotopoto ai e ia a lautolu mo e leveki e ia a lautolu tuga ne leveki mamoe ke he hana fuifui mamoe.
11 Ha kua laveaki e Iehova a Iakopo, kua fakafua foki e ia a ia mai he lima hana kua mua hana malolo kia ia.
12 To o mai foki a lautolu mo e lologo ke he mena tokoluga ko Siona, ti tafe atu ai a lautolu ke he tau mena mitaki a Iehova, ke moua ai e tau fua saito, mo e uaina, mo e puke lolo, ko e tau punua mamoe foki, mo e tau punua povi; to eke foki ha lautolu a tau loto ke tuga ne kaina kua fakamalū aki he magavai; ti nakai tuai matematekelea foki a lautolu.
13 Ti fiafia ai e tamāfine tote mo e koli, ko e tau fuata foki fakalataha mo e tau momotua; to liliu foki e au ha lautolu a tagi ke he fiafia, mo e fakamafana e au a lautolu, to fakafiafia foki e au a lautolu ne mānu.
14 To fakamakona e au e tau manako he haku a tau ekepoa ke he tau mena lolo, to makona foki haku a motu ke he tau mena mitaki, kua pihia mai a Iehova.
15 Kua pehe mai e vagahau a Iehova, Kua logona e leo i Rama, ko e tagi aue, ko e tagi tatuki fakalahi ni; kua tagi a Rahela ke he hana fanau, nakai mafai foki ke fakanana ai a ia ha ko e hana fanau, ha kua nakai ha i ai a lautolu.
16 Kua pehe mai e vagahau a Iehova, Toka a e tagi, ti aua neke hifo ai e tau hihina mata he tau mata hau; ha kua pehe mai a Iehova to fai taui hau a tau gahua, to liliu mai a lautolu he motu ha lautolu ne fai fi mai.
17 To fai mena foki ke amaamanaki ki ai a koe ke he hau a fakahikuaga, kua pihia mai a Iehova, to liliu mai foki hāu a fanau ke he ha lautolu a kelekele.
18 Kua logona e au a Efaraimo kua tagi a ia, kua pehe, Kua akonaki mai e koe au ti akonaki ni au, tuga ne povi kua nakai fakaako; kia fakamafoki mai e koe au ti mafoki ai ni au; ha ko koe Iehova na e, ko e haku a Atua a koe.
19 Ha kua mole he fakamafoki au, ti tokihala au; kua oti he fakaako e koe au, ti patipati e au haku pula; ne mā au, mo e fakahahaku au ha kua uta fano e au e mā ha ko e tau mena ne eke e au ke he haku a vaha fuata.
20 Ko e haku a tama fakahele kia a Efaraimo? ko e tama kia a ia ke fiafia ki ai? ha ko e mena ka vagahau e au kia ia, kua manatu lahi agaia ni e au a ia; ko e mena ia kua tagi haku loto ki ia; kua hofihofi noa haku a fakaalofa kia ia, kua pihia mai a Iehova.
21 Kia fakatu e koe māu e tau fakamailoga ke he puhala, kia fakatu a e tau pou mo tau fakamailoga māu; kia haga atu hāu a loto ke he puhala tu, ko e puhala ni ne fano ai a koe; kia liu mai a ko e tamā fine tote a Isaraela na e, kia liu mai ā koe ke he hau a tau maga nai.
22 To faifano a koe ato a fe, ko koe na ko e tamāfine ne liu kehe? ha ko e mena kua eke e Iehova e mena fou ke he lalolagi, ke agaagai ai e tane he fifine.
23 Kua vagahau mai pehe e Atua a Isaraela ko Iehova Sapaota; To liu vagahau ai e lautolu e tau kupu nai ke he motu ko Iuta mo e hana tau maga, ka liuaki mai e au a lautolu he paeaaga, Kia fakamonuina e au a koe ko e fale ne ha i ai e mahani tututonu, ko e mouga tapu.
24 To nonofo ai foki a Iuta mo e hana tau maga oti fakalataha, ko e tau tagata gahua fonua, mo lautolu ne o fano mo e tau fuifui mamoe.
25 Ha kua fakamakona e au e tagata kua nakai fahia, kua fakamamakona e au e tau loto lolelole oti.
26 Ti ala ai au, mo e kitekite, kua mitaki ni haku a mohe kia au.
27 Kua pehe mai a Iehova, Kitiala, to hoko mai e tau aho ke to e au e tau fua he tau tagata mo e tau fua he tau manu ke he magafaoa a Isaraela, mo e magafaoa a Iuta.
28 Ke tuga he lamalamati au kia lautolu ke taaki, mo e moumou, mo e ulu ki lalo, mo e fakaotioti, mo e fakamamahi a lautolu; to pihia foki haku a leoleo kia lautolu, ke ati hake, mo e to a lautolu, kua pihia mai a Iehova.
29 Ti nakai tuai pehe mai a lautolu ke he vaha ia, Kua kai he tau matua e tau fua vine mata, ka e maniania e tau nifo he fanau.
30 Ka e takitaha e tagata mo e mate ha ko e hana ni a mahani kelea; ko e tau tagata oti kua kai e tau fua vine mata, to takitaha ni mo e maniania hana tau nifo.
31 Kua pehe mai a Iehova, Kitiala, to hoko mai e tau aho ke eke ai e au e maveheaga fou mo e magafaoa a Isaraela, mo e magafaoa a Iuta;
32 Nakai tuga e maveheaga ne eke e au mo e tau matua ha lautolu ke he aho ne toto e au e tau lima ha lautolu ke takitaki mai e au a lautolu he motu ko Aikupito; ko e haku a maveheaga ia ne holi e lautolu, pete he eke au mo Iki ha lautolu, kua pihia mai a Iehova.
33 Ka ko e maveheaga hanai ke eke e au mo e magafaoa a Isaraela ka mole atu e tau aho ia, kua pihia mai a Iehova, to tuku e au haku a tau fakatufono ki loto ia lautolu, mo e tohi e au ke he tau loto ha lautolu; to eke foki au mo Atua ha lautolu, ti eke a lautolu mo motu haku.
34 To nakai liu fakaako atu foki he tagata kia ia ne katofia mo ia, mo e tagata ke he hana matakainaga kua pehe atu, Kia iloa e mutolu a Iehova; ha ko e mena to iloa e lautolu oti au, ko e tau lalotagata katoa mo e tau iki, kua pihia mai a Iehova; ha ko e mena to fakamagalo e au ha lautolu a tau mahani kelea, mo e nakai tuai manatu e au ha lautolu a tau hala.
35 Kua vagahau mai pehe mai a Iehova, ko ia ne foaki mai e la ke eke mo maama ke he aho, ko e tau fakatufono foki ke he mahia mo e tau fetu ke eke mo maama ke he po; ko ia ne maha ai e tahi ka gu hana tau peau; ko Iehova Sapaota, ko e hana ni a higoa haia;
36 Kua pehe mai a Iehova, Kaeke ke mole atu e tau fakatufono ia ki mua haku, ti hiku ai foki e fanau a Isaraela, nakai tuai eke a lautolu mo motu ki mua haku tukulagi.
37 Kua vagahau mai pehe a Iehova, Kaeke kua maeke ke fafati e lagi i luga, kaeke foki kua maeke ke kumi mo e kitia e tau fakaveaga he lalolagi i lalo, ti tiaki ai e au e fanau oti a Isaraela ha ko e tau mena oti ne eke e lautolu, kua pihia mai a Iehova.
38 Kua pehe mai a Iehova, Kitiala, to hoko mai e tau aho, ke ati ai e maga ma Iehova, ke kamata mai he kolo a Hananieli ke hoko atu ke he gutuhala he malokuaga.
39 To liu atu e toua ke fafati aki, to fina atu fakahako ki luga he mouga ko Karepa, to takai atu foki ki Koata.
40 To fakatapu foki ma Iehova e pahua oti ha ha i ai e tau tino he tau tagata mamate, mo e efuefu afi, mo e tau fonua oti, ke hoko ke he vailele ko Ketarono, ke hoko foki ke he malokuaga he gutuhala he tau solofanua ke he fahi uta; nakai tuai taaki a ia, to nakai ulu moumou foki ke hoko ke he tukulagi.