Ieremia 32:1-44
32 KO e kupu ne hoko mai ia Iehova kia Ieremia ke he tau hogofulu a Setekaia ko e patuiki a Iuta, ko e tau hogofulu ma valu ia a Nepukanesa
2 Ko e vaha ia ne pa takai ai a Ierusalema he kau he patuiki a Papelonia; ne puipui foki a Ieremia ko e perofeta ke he lotopa he fale puipui ha ha he fale he patuiki a Iuta.
3 Ha kua puipui he patuiki a Iuta ko Setekaia a ia, kua pehe age, Ko e heigoa kia e mena kua perofeta ai e koe, kua pehe mai, Kua vagahau mai pehe a Iehova, Kitiala, to tuku atu e au e maga nai ke he lima he patuiki a Papelonia, ti eke ai e ia;
4 To nakai hao foki a Setekaia ko e patuiki a Iuta mai he tau lima a Kaletaia, ka e tuku ni a ia ke he lima he patuiki a Papelonia, to vagahau mo e fehagaoaki a laua mo ia mo e fekiteaki a laua mo ia;
5 To takitaki foki e ia a Setekaia ki Papelonia, ti ha i ai a ia ke he mena ia ato ahi atu e au a ia, kua pihia mai a Iehova; pete he tau a mutolu mo e tau tagata Kaletaia nakai ni monuina a mutolu.
6 Ti pehe atu a Ieremia, Kua hoko mai e kupu a Iehova kia au, kua pehe mai,
7 Kitiala, to hau kia koe a Hanameeli, ko e tama a Saluma, ko e matakainaga he hau a matua tane, ke pehe mai, Kia fakafua e koe māu haku a fonua ha ha i Anatota; ha ko e mena ha ha ia koe e pule ke he fakafua, ke fakafua ai.
8 Ti hau ai kia au ke he lotopa he fale puipui, a Hanameeli ko e tama he matakainaga he haku a matua tane, ke tuga ne kupu a Iehova, kua pehe mai a ia kia au, Kia fakafua a e koe haku a fonua i Anatota, ha ha he motu a Peniamina; ha ko e mena hāu e pule ke eke māu e fonua, ko e hāu foki ke fakafua ai; kia fakafua a e koe māu. Ti iloa ai e au, ko e kupu a Iehova haia.
9 Ti fakafua e au ia Hanameeli, ko e tama he matakainaga he haku a matua tane, e fonua ha ha i Anatota, mo e fafati e au kia ia e tau tupe, ko e hogofulu ma fitu e sikeli ario
10 Ti tohi ai e au ke he tohi, mo e fakamau fakamailoga ai e au, ti ta mai e au e tau tagata ke fakamoli aki, mo e fafati ai e au e ario ke he fua tautau.
11 Ti uta e au e tau tohi he fakafua, ko e tohi kua fakamau fakamailoga ai ke lata mo e fakatufono mo e kotofaaga, katoa mo e tohi kua nakai fakamau;
12 Ti ta age e au e tohi he fakafua kia Paruka, ko e tama a Neria, ko e tama a Maaseia, ki mua a Hanameeli, ko e tama he matakainaga he haku a matua tane, ki mua foki he tau tagata ne fakamoli aki ne tohi ai ke he tohi he fakafua, ki mua foki he tau tagata Iutaia oti ne nonofo ke he lotopa he fale puipui.
13 Ti poaki age e au kia Paruka, ki mua ha lautolu kua pehe age,
14 Kua pehe mai e vagahau a Iehova Sapaota, ko e Atua a Isaraela, Kia uta e koe e tau tohi nai, ko e tau tohi nai he fakafua, ko e tohi kua fakamau fakamailoga, katoa foki mo e tohi nai kua nakai fakamau, ti tuku a e koe ke he kapiniu kelekele ke tumau ai ke he tau aho loga;
15 Ha kua pehe mai e vagahau a Iehova Sapaota, ko e Atua a Isaraela, To liu fakafua ai ke he motu nai e tau fale, mo e tau fonua, mo e tau uluvine.
16 Kua mole he age e au e tohi he fakafua kia Paruka ko e tama a Neria, ti liogi ai au kia Iehova, kua pehe atu,
17 Oi te! ko e Iki na e ko Iehova, Kitiala, ko koe ne eke e lagi mo e lalolagi he hau a malolo lahi, mo e hau a lima fakaolo, nakai uka foki kia koe ha mena taha;
18 Kua fakaalofa ke he afe he tau hau, kua taui atu foki e mahani kelea he tau matua ke he tau fatafata he ha lautolu a fanau ka mole atu a lautolu; ko e Atua ne mua ue atu, mo e malolo, ko Iehova Sapaota, ko e hana higoa haia,
19 Kua mua ue atu a ia he pule, kua homo atu foki hau a tau mena ne eke; ha kua kitekite hau a na fofoga ke he tau puhala oti he tau tagata; ke ta atu ke he tau tagata takitokotaha ke lata mo e hana tau puhala, ke lata foki mo e tau fua he hana mahani;
20 Ne fakatu ai foki e tau fakamailoga mo e tau mana ke he motu ko Aikupito ke hoko mai ke he aho nai, mo e motu ko Isaraela, katoa mo e tau motu he tau tagata kehe; ti eke e koe māu e higoa, tuga ne eke ai ke he aho nai.
21 Ti ta mai e koe hau a motu ko Isaraela he motu ko Aikupito, mo e tau fakamailoga, mo e tau mana, mo e lima malolo, mo e lima fakaolo, mo e tau mena ke matakutaku lahi ai,
22 Ti foaki mai e koe kia lautolu e motu nai ke omonuo ai e koe ke he ha lautolu a tau matua ke foaki mai ai kia lautolu, ko e motu kua tafe ai e puke huhu mo e meli;
23 Ti o mai a lautolu, mo e eke ai ma lautolu; ka e nakai fanogonogo a lautolu ke he hau a leo, mo e nakai o a lautolu ke lata mo e hau a tau fakatufono; ti nakai eke e lautolu e tau mena oti ne poaki mai e koe kia lautolu ke eke; ko e mena ia kua fakahoko ai e koe e tau mena kelea oti nai kia lautolu.
24 Kitiala, ko e kelekele ne aku fakatumutumu, kua hoko mai ni ke he maga, ke eke ai; kua tuku foki e maga ke he tau lima a Kaletaia, kua tau ki ai, ha ko e pelu, mo e hoge, mo e tatalu; ko e tau mena ne vagahau mai ai e koe, kua hohoko ni, ti kitiala, kua fioia ni e koe.
25 Ka ko koe ko e Iki na e Iehova, kua pehe mai a koe kia au, Kia fakafua māu e koe e fonua ke he tau tupe, mo e ta mai ai e tau tagata ke fakamoli aki; ka ko e maga, kua tuku atu ai ke he tau lima a Kaletaia.
26 Ti hoko mai e kupu a Iehova kia Ieremia, kua pehe mai,
27 Kitiala, ko au ko Iehova, ko e Atua he tau tagata oti; kua uka kia kia au ha mena taha?
28 Ko e mena ia kua pehe mai e vagahau a Iehova, Kitiala, to tuku atu e au e maga nai ke he tau lima he tau tagata Kaletaia, mo e lima a Nepukanesa ko e patuiki a Papelonia, ti eke ai e ia māna;
29 To o mai foki e tau tagata Kaletaia, ko lautolu ne tau mo e maga nai, mo e huhunu e lautolu e maga nai ke he afi, to huhunu ai ni e lautolu katoa mo e tau fale ne fakavela ai e tau mena manogi kia Paala ke he ha lautolu a tau tua fale i luga, mo e liligi ai e tau poa inu ke he tau atua kehe, ke fakahogohogomanava mai ai a lautolu kia au.
30 Ha ko e tau mena kelea hokoia ki mua haku kua eke he fanau a Isaraela, mo e fanau a Iuta tali mai he vaha fuata ha lautolu; ha kua fakahogohogomanava mai hokoia kia au he fanau a Isaraela ke he tau gahua he tau lima ha lautolu, kua pihia mai a Iehova.
31 Ha kua eke e maga nai mo mena ke mamahi ai au, mo mena ke ita ai au, tali mai he aho ne ati ai, kua hoko ni ke he aho nai, kia uta kehe ai e au mai mua haku;
32 Ha ko e tau mahani kelea oti he fanau a Isaraela, mo e fanau a Iuta, kua eke e lautolu ke fakahogohogomanava mai a lautolu kia au, ko lautolu, ko e ha lautolu a tau patuiki, ko e ha lautolu a tau iki, ko e ha lautolu a tau ekepoa, mo e ha lautolu a tau perofeta, mo e tau tagata Iuta, katoa mo lautolu ne nonofo i Ierusalema.
33 Kua haga mai e lautolu ha lautolu a tau tua kia au, ka e nakai ko e tau mata ha lautolu; ne fakaako atu e au a lautolu, ne uhu matike au mo e fakaako atu kia lautolu, ka e nakai fanogonogo mai a lautolu ke talia e tau mena ne fakaako atu ai kia lautolu.
34 Ka kua tuku e lautolu ha lautolu a tau mena vihiatia ke he fale kua ui ai ke he haku a higoa, kia fakakelea e lautolu a ia.
35 Kua eke foki e lautolu e tau mena tokoluga kia Paala, ha ha he pahua he tama tane a Hinoma, kia fakafano age e lautolu ha lautolu a tau tama tane mo e ha lautolu a tau tama fifine ke he afi kia Moloka; ko e mena nakai poaki atu e au kia lautolu, ti nakai manatu e au ki ai; kua eke e lautolu e mena vihiatia na ke fakatupu ai e hala kia Iuta.
36 Ha ko e hanai, kua pehe mai e vagahau a Iehova, ko e Atua a Isaraela, ke he maga nai, ne pehe ai a mutolu, Kua tuku atu ai ke he lima he patuiki a Papelonia ke he pelu, mo e hoge, mo e tatalu;
37 Kitiala, to fakapotopoto e au a lautolu mai he tau motu oti ne vega e au a lautolu ki ai ke he haku a loto mamahi, mo e haku a ita, mo e haku a ita lahi; to liuaki mai e au a lautolu ke he mena nai, mo e fakanofo ai e au a lautolu mo e mafola;
38 Ti eke a lautolu mo motu haku, to eke foki au mo Atua ha lautolu.
39 To foaki atu e au kia lautolu ke taha e loto, mo e taha e puhala, kia matakutaku a lautolu kia au ke he tau aho oti ni, ke mitaki ai a lautolu, katoa foki mo e ha lautolu a fanau ka mole atu a lautolu;
40 To eke foki e au e maveheaga tukulagi mo lautolu, ke nakai liu kehe au ia lautolu, ka to mahani mitaki atu au kia lautolu; to tuku atu foki e au e matakutaku kia au ke he tau loto ha lautolu, kia nakai o kehe a lautolu ia au.
41 To fiafia ni au kia lautolu, mo e mahani mitaki atu kia lautolu, mo e to e au a lautolu ke he motu nai mo e fakamoli, mo e haku a loto katoa mo e haku a agaga katoa.
42 Ha kua pehe mai e vagahau a Iehova, Tuga he fakahoko e au e tau malaia lalahi oti na ke he motu nai, to fakahoko pihia foki e au kia lautolu e monuina oti ne vagahau atu ai e au kia lautolu.
43 To fakafua ai foki e tau fonua ke he motu nai, kua pehe ai a lautolu, Kua vao a ia, nakai ha i ai ha tagata po ke manu; kua tuku atu ai ke he tau lima he tau tagata Kaletaia.
44 To fakafua ai e lautolu e tau fonua ke he tau tupe, mo e tohi ai e lautolu ke he tau tohi, mo e fakamau fakamailoga ai, mo e ta mai e tau tagata ke fakamoli aki, ke he motu a Peniamina, mo e tau mena ne agaagai ai ki Ierusalema, mo e tau maga a Iuta, mo e tau maga ke he atu mouga, mo e tau maga ke he fahi tokolalo, mo e tau maga ke he fahi toga; ha ko e mena to liuaki ni e au ha lautolu a paeaaga, kua pihia mai a Iehova.