Ieremia 33:1-26
33 TI hoko mai ai e kupu a Iehova kia Ieremia, ko e lagaua ia, ka kua puipui agaia a ia ke he lotopa he fale puipui, kua pehe mai,
2 Kua pehe mai e vagahau a Iehova ne eke ai, ko Iehova ne taute ai kia fakatumau ai e ia; ko Iehova ko e hana higoa haia;
3 Kia ui mai ā koe kia au, ti tali atu ai e au kia koe mo e fakakite atu e au kia koe e tau mena lalahi mo e uka, ko e tau mena kua nakai iloa.
4 Ha kua pehe mai e vagahau a Iehova, ko e Atua a Isaraela, ke he tau fale he maga nai, mo e tau fale he tau patuiki a Iuta, kua ulu ki lalo ke eke mo pa ke pa aki e kelekele kua aku fakatumutumu, mo e tau pelu;
5 Kua o mai a lautolu ke tau mo e tau tagata Kaletaia, mo e fakapuke a lautolu ke he tau tino he tau tagata mamate ne keli e au ke he haku a loto mamahi, mo e haku a ita, ha kua ufi e au haku a mata ke he maga nai, ha ko e tau mahani kelea oti ha lautolu.
6 Kitiala to eke e au e pipi ma e hana gagao, mo e eke lagatau ke fakamalolo aki; to fakamalolo e au a lautolu, mo e fakakite atu e au kia lautolu e mafola mo e fakamoli ne mua ue atu.
7 To liuaki foki e au e paeaaga a Iuta, mo e paeaaga a Isaraela, mo e ati hake e au a lautolu, tuga ne vaha fakamua.
8 To fakameā e au a lautolu he ha lautolu a tau mahani kelea oti, ne hala ai a lautolu kia au; to fakamagalo e au ha lautolu a tau mahani kelea oti ne hala ai a lautolu kia au, mo e fakafualoto mai a lautolu kia au.
9 To eke foki a lautolu mo higoa fiafia kia au, to eke foki mo fakahekeaga, mo fulufuluola foki ke he tau motu oti he lalolagi, kua logona e lautolu e tau mena mitaki oti kua eke e au kia lautolu; ti matakutaku ai a lautolu, mo e vivivivi, ha ko e tau mena mitaki oti, mo e monuina oti kua eke e au ma lautolu.
10 Kua pehe mai e vagahau a Iehova, To logona foki ke he mena nai, kua pehe mai a mutolu, Kua eke mo tau mena moumou, nakai ha i ai ha tagata, ti nakai ha i ai ha manu, ko e tau maga a Iuta mo e tau puhala a Ierusalema kua vao tuai, nakai ha i ai ha tagata, ti nakai nofo ai taha, ti nakai ha i ai ha manu,
11 To logona ai e leo fiafia mo e leo he olioli, ko e leo he kitofaihoana mo e leo he kitofaitane, ko e leo kua pehe mai, Kia fakaheke atu a mutolu kia Iehova Sapaota, ha kua mitaki ni a Iehova, ha kua tukulagi ni hana fakaalofa; mo e leo ha lautolu kua ta mai e tau poa fakaheke ke he fale a Iehova. Ha ko e mena to liuaki mai e au e paeaaga he motu, ke tuga ne vaha fakamua, kua pihia mai a Iehova.
12 Kua pehe mai e vagahau a Iehova Sapaota, Ko e mena nai, kua eke mo mena kua moumou, kua nakai fai tagata, ti nakai ha i ai ha manu, mo e hana tau maga oti, to ha i ai foki e mena ke nonofo ai e tau leveki mamoe kua uta e lautolu ha lautolu a tau fuifui mamoe ke tatakoto ai.
13 To liu ta age ai e tau fuifui mamoe ki lalo he tau lima he tau tagata ne totou ai a lautolu ke he tau maga ke he atu mouga, mo e tau maga ke he fahi tokolalo, mo e tau maga he fahi toga, ke he motu foki a Peniamina, mo e tau mena ne agaagai ki Ierusalema, mo e tau maga a Iuta, kua pihia mai a Iehova.
14 Kua pehe mai a Iehova, Kitiala, to hoko mai e tau aho, ke fakahoko ai e au e kupu mitaki ne vagahau atu e au ke he magafaoa a Isaraela mo e magafaoa a Iuta.
15 Ko e tau aho ia, mo e vaha ia ni, to fakatupu ai e au kia Tavita e La akau tututonu; to eke foki e ia e fakafiliaga mo e tututonu ke he motu.
16 Ko e vaha ia to fakamoui ai a Iuta, to nofo foki a Ierusalema mo e monuina, ko e higoa foki ke ui ai a ia, KO IEHOVA HA TAUTOLU A TUTUTONU.
17 Ha kua pehe mai e vagahau a Iehova, Nakai ni to kehe e fanau a Tavita mai he nofoaiki he fanau a Isaraela;
18 To nakai to kehe foki mai mua haku, e fanau he tau ekepoa, ko e tau tagata Levi, ke eke e tau poa huhunu, mo e huhunu e tau poa mena kai, mo e ekepoa ai e lautolu ke he tau aho oti.
19 Ti hoko mai ai e kupu a Iehova kia Ieremia, kua pehe mai,
20 Kua vagahau mai pehe a Iehova, Kaeke kua maeke kia mutolu ke fakahui haku a maveheaga ke he aho, mo e haku a maveheaga ke he po, ke nakai tuai fai aho, po ke po ke he hana ni a magaaho;
21 Ti maeke ai ke fakahui haku a maveheaga mo Tavita haku a fekafekau, ke nakai fai tama tane a ia ke eke mo patuiki ke he hana nofoaiki; katoa foki mo e tau tagata Levi, ko e tau ekepoa, ko e haku a tau fekafekau.
22 Tuga he nakai maeke ke totou e tau kau he lagi, mo e nakai maeke ke fafati e oneone ne tahi; to fakatokologa pihia e au e fanau a Tavita haku a fekafekau, mo e tau tagata Levi kua fekafekau kia au.
23 Ti hoko mai e kupu a Iehova kia Ieremia, kua pehe mai,
24 Nakai kia iloa e koe e mena kua vagahau mai ai e motu nai, kua pehe, Ko e na magafaoa ua ne fifili e Iehova kua tiaki tuai e ia a lautolu? Kua fakavihia pihia e lautolu haku a motu, kia nakai tuai eke a lautolu mo motu ki mua ha lautolu.
25 Kua pehe mai e vagahau a Iehova, Kaeke ke nakai mau haku a maveheaga ke he aho mo e po, kaeke foki kua nakai eke e au e tau fakatufono ke he lagi mo e lalolagi;
26 Ti tiaki ai e au e fanau a Iakopo, mo Tavita haku a fekafekau, ti nakai uta e au mai he fanau hana ke eke mo tau iki ke pule ke he fanau a Aperahamo, mo Isaako, mo Iakopo; ha ko e mena to liuaki mai ni e au ha lautolu a paeaaga mo e fakaalofa atu au kia lautolu.