Ieremia 34:1-22
34 KO e kupu ne hoko mai ia Iehova kia Ieremia, ka kua tau mo Ierusalema mo e hana tau maga oti a Nepukanesa ko e patuiki a Papelonia, mo e hana kau oti, mo e tau kau oti he lalolagi kua pule a ia ki ai, mo e tau motu oti, kua pehe mai.
2 Kua pehe mai e vagahau a Iehova, ko e Atua a Isaraela, Kia fano ā koe mo e pehe atu kia Setekaia ko e patuiki a Iuta, kia pehe atu a kia ia, Kua pehe mai e vagahau a Iehova, Kitiala, to tuku atu e au e maga nai ke he lima he patuiki a Papelonia, ti huhunu ai e ia ke he afi;
3 To nakai hao foki a koe mai he lima hana, ka to tapaki ni a koe, mo e tuku atu ke he hana lima; ti fekiteaki a mua mo e patuiki a Papelonia, ti vagahau fakafehagao aki a mua mo ia, ti haele atu a koe ki Papelonia.
4 Ka kia fanogonogo mai a ke he kupu a Iehova, Setekaia na e, ko e patuiki a Iuta; kua pehe mai e kupu a Iehova kia koe, Nakai mate a koe ke he pelu;
5 To matulei a koe mo e monuina; tuga ne tafu e lautolu e tau afi ma e hau a tau matua tane, ko e tau patuiki fakamua ne mumua kia koe, to tafu pihia foki e lautolu e afi mau; ti tagi tatuki a lautolu ha ko koe, kua pehe atu, Oi te! ko e iki na e; ha kua vagahau atu e au e kupu, kua pihia mai a Iehova.
6 Ti vagahau atu he perofeta ko Ieremia e tau kupu oti na ke he patuiki a Iuta ko Setekaia i Ierusalema,
7 Ka kua tau e kau he patuiki a Papelonia mo Ierusalema, mo e tau maga oti ne toe i Iuta, ko Lakisa mo Aseka; ha ko e tau maga nonofo taue ia ne toe he tau maga a Iuta.
8 Ko e kupu ne hoko mai ia Iehova kia Ieremia, ka kua mole e maveheaga ne eke he patuiki ko Setekaia mo e tau tagata ha ha i Ierusalema, ke fakamatala atu kia lautolu e tokanoaaga;
9 Kia takitaha a lautolu mo e toka noa ke fano hana fekafekau tane, mo e hana fekafekau fifine, ko e tane Heperu, mo e fifine Heperu; ke aua neke fakatupa a lautolu he tagata Iuta, hana tau matakainaga.
10 Kua fanogonogo e tau iki, mo e tau tagata oti ne eke e maveheaga ke takitaha a lautolu mo e toka noa ke fano hana fekafekau tane, mo e hana fekafekau fifine, ke aua neke fakatupa foki a lautolu kia lautolu; ti fanogonogo a lautolu mo e toka e lautolu a lautolu ke o.
11 Ka e mole ia ti liuaki mai e lautolu e tau fekafekau tane mo e tau fekafekau fifine ne toka noa e lautolu ke o; mo e fakatupa e lautolu a lautolu ke eke mo tau fekafekau tane mo tau fekafekau fifine.
12 Ti hoko ai e kupu a Iehova kia Ieremia mai ia Iehova, kua pehe mai,
13 Kua pehe mai e kupu a Iehova ko e Atua a Isaraela, Ko au ni, ne eke e au e maveheaga mo e ha mutolu a tau matua ke he aho ne ta mai ai e au a lautolu he motu ko Aikupito, ko e mena ne nonofo fakatupa ai a lautolu, kua pehe,
14 Ka katoatoa e tau tau fitu, kia takitaha a mutolu mo e toka atu ke fano hana matakainaga ko e tagata Heperu, ko ia ne fakafua atu kia koe; kua fekafekau ai a ia kia koe ke he tau tau ne ono, ti toka noa e koe a ia ke fano; ka e nakai fanogonogo mai ha mutolu a tau matua kia au, ti nakai haga mai e lautolu ha lautolu a tau teliga.
15 Ko mutolu foki, ne liliu mai a mutolu he vaha nai, mo e eke e mutolu e tau mena tonu ki mua haku, he fakamatala atu e mutolu e tokanoaaga ko e taha ke he taha; ti eke e mutolu e maveheaga ki mua haku ke he fale kua ui ai ke he haku a higoa.
16 Ka kua liliu kehe a mutolu, mo e eke fakakelea ai e mutolu haku a higoa, mo e takitaha mo e liuaki mai hana fekafekau tane, mo e hana fekafekau fifine, ne toka e mutolu ke o ke he pule ha lautolu, kua fakatupa e mutolu ke eke mo tau fekafekau tane mo e tau fekafekau fifine kia mutolu.
17 Ko e mena ia kua pehe mai e vagahau a Iehova, Kua nakai fanogonogo mai a mutolu kia au ke fakamatala atu e tokanoaaga, ko e tagata ke he hana matakainaga, mo e tagata kia ia ne katofia a laua mo ia, Kitiala, kua pehe mai a Iehova, To fakamatala atu e au kia mutolu e tokanoaaga, ke he pelu, mo e tatalu, mo e hoge; to tuku atu foki e au a mutolu ke ekefakakelea ai ke he tau kautu oti he lalolagi.
18 To tuku atu foki e au e tau tagata ne holi haku a maveheaga, ko lautolu kua nakai fakahoko e tau kupu he maveheaga ne eke e lautolu ki mua haku, ko e punua povi ne ihiua ai e lautolu, mo e o age a lautolu ke he vaha he tau mena ne ihiua,
19 Ko e tau iki a Iuta, mo e tau iki i Ierusalema, ko e tau eunuka, mo e tau ekepoa, mo e tau tagata oti he motu, ne o age ke he vaha he punua povi ne ihiua;
20 To tuku atu e au a lautolu ke he tau lima ha lautolu kua fai fi kia lautolu, mo e tau lima ha lautolu kua kumi ke kelipopo a lautolu; ko e tau tino mamate foki ha lautolu, to eke ia mo tau mena kai he tau manu lele he pulagi, mo e tau manu huifa he vao.
21 To tuku atu foki e au a Setekaia ko e patuiki a Iuta, mo e tau iki ha ha ia ia, ke he tau lima ha lautolu kua fai fi kia lautolu, mo e tau lima ha lautolu kua kumi ke kelipopo a lautolu, mo e tau lima he kau he patuiki a Papelonia, ko lautolu ne o hake ia mutolu.
22 Kua pehe mai a Iehova, Kitiala, to poaki age e au, mo e liuaki mai e au a lautolu ke he maga nai; to tau a lautolu ki ai, ti eke ai e lautolu ma lautolu, mo e huhunu ai e lautolu ke he afi; to tuku atu foki e au e tau maga a Iuta ke eke mo vao, ke nakai nofo ai taha.