Ieremia 37:1-21
37 KUA eke foki a Setekaia ko e tama a Iosia mo patuiki ke hukuiaki a Konia ko e tama a Iehoakima, ne kotofa foki e Nepukanesa ko e patuiki a Papelonia a ia ke eke mo patuiki ke he motu ko Iuta.
2 Ka e nakai fanogonogo a ia, po ke hana tau fekafekau, po ke tau tagata he motu, ke he tau kupu a Iehova, ne vagahau mai ai e ia he perofeta ko Ieremia.
3 Ti fakafano mai he patuiki ko Setekaia a Iukali ko e tama a Selemaia, mo Sefanaia ko e tama a Maaseia ko e ekepoa, ke he perofeta ko Ieremia, kua pehe mai, Kia liogi a koe ma mautolu kia Iehova ha tautolu a Atua.
4 Kua ata agaia a Ieremia ke faifano ai ke he motu; ha kua nakaila tuku e lautolu a ia ke he fale puipui.
5 Kua o mai e kau a Farao i Aikupito; ne logona foki he tau tagata Kaletaia ne patakai ai a Ierusalema e ogo kia lautolu, ti o kehe ai a lautolu i Ierusalema.
6 Ti hoko mai ai e kupu a Iehova ke he perofeta ko Ieremia, kua pehe mai,
7 Kua vagahau mai pehe a Iehova, ko e Atua a Isaraela, Kia pehe atu a mutolu ke he patuiki a Iuta ne fakafano mai a mutolu kia au ke huhu mai kia au, Kitiala, ko e kau a Farao kua o mai ke lagomatai kia mutolu, to liliu atu a lautolu ke he motu ha lautolu ko Aikupito.
8 Ka to liliu mai foki e tau tagata Kaletaia mo e tau a lautolu mo e maga nai, ti moua ai e lautolu ma lautolu mo e huhunu ai ke he afi.
9 Kua pehe mai e vagahau a Iehova; Aua neke fakavai e mutolu a mutolu, kua pehe, To o kehe ni e tau tagata Kaletaia ia tautolu; ha ko e mena nakai ni o kehe a lautolu.
10 Ha ko e mena ane mai kua keli e mutolu e kau oti he tau tagata Kaletaia kua tau mo mutolu, ti toe ai kia lautolu e tau tagata kua kafokia, po kua tutu ai a lautolu takitaha e tagata ke he hana fale ie, mo e huhunu ai e lautolu e maga nai ke he afi.
11 Kua o kehe e kau a Kaletaia i Ierusalema ha ko e kau a Farao,
12 Ti fina atu ai a Ieremia i Ierusalema, ke fano ke he motu a Peniamina, kia moua ai e ia hana tufaaga ke he mena ia ki mua he tau tagata.
13 Ne ha i ai foki a ia ke he gutuhala a Peniamina, ha ha i ai foki e takitaki he kau leoleo, ko e hana higoa ko Iraia, ko e tama a Selemaia, ko e tama a Hanania; ti taofi ai e ia a Ieremia ko e perofeta, kua pehe age, Ko e hola atu ne fai a koe ke he tau tagata Kaletaia.
14 Ti pehe age a Ieremia, Ko e fakavai; nakai hola au ke he tau tagata Kaletaia. Ka e nakai fanogonogo a ia kia ia; ka e taofi e Iraia a Ieremia, mo e takitaki mai a ia ke he tau iki.
15 Ti ita e tau iki kia Ieremia mo e ta e lautolu a ia, mo e tuku e lautolu a ia ke he fale puipui ke he fale a Ionatana ko e tohikupu; ha kua eke e lautolu ia mo fale puipui.
16 Kua hu atu a Ieremia ke he fale puipui mo e tau ana ne toka ai, ti nofo ai a Ieremia ke he mena ia he tau aho loga;
17 Ti fakafano mai he patuiki ko Setekaia, mo e uta ai a ia; ti huhu fufu ai he patuiki kia ia ke he hana fale, kua pehe mai, Ne fai kupu nakai mai ia Iehova? Ti pehe atu a Ieremia, E, mena fai kupu; kua pehe atu foki a ia, To tuku atu a koe ke he lima he patuiki a Papelonia.
18 Kua pehe atu foki a Ieremia ke he patuiki ko Setekaia, Ko e heigoa kia e mena kua ekefakakelea atu ai au kia koe, po ke hau a tau fekafekau, po ke motu nai, he tuku ai e mutolu au ke he fale puipui?
19 Ko e fe kia ha mutolu a tau perofeta, ne perofeta atu kia mutolu, kua pehe, Nakai hau e patuiki a Papelonia ke tau mo mutolu mo e motu nai?
20 Hanai, haku iki na e, ko e patuiki, kia fanogonogo mai ā, kia hoko atu ki mua hau haku a ole; aua neke liuaki atu e koe au ke he fale a Ionatana ko e tohikupu, neke mate ai au.
21 Ti poaki age e patuiki ko Setekaia kia lautolu, ti tuku ai e lautolu a Ieremia ke he lotopa he fale puipui, ti ta mai e lautolu kia ia taki taha e areto ke he taha aho mo e taha aho mai he puhala ne ha i ai e tau tagata taute areto, ato oti ni e tau areto oti he maga. Ti nofo ai a Ieremia ke he lotopa he fale puipui.