Ieremia 39:1-18
39 KO e aho foki ne fofo ai a Ierusalema, (ke he tau hiva a Setekaia ko e patuiki a Iuta, ke he hogofulu mahina, ne o mai ai e patuiki a Papelonia, ko Nepukanesa, mo e hana kau oti, ki Ierusalema, mo e pa takai ai e lautolu.
2 Ko e tau hogofulu ma taha a Setekaia, ko e fa mahina, mo e aho hiva he mahina, ne maona ai e maga.)
3 Ti o mai ai e tau iki oti he patuiki a Papelonia, mo e nonofo a lautolu ke he gutuhala ke he lotoga, ko Nekala-saresa, ko Samekanepo, ko Sasikemo ko e iki he tau eunuka, ko Nekala-saresa ko e iki he tau makoi, mo e tau iki oti ne toe he patuiki a Papelonia.
4 Kua kitia a lautolu he patuiki a Iuta ko Setekaia, mo e kau oti, ti fehola a lautolu, mo e o kehe ai he maga he po, ne o age ai a lautolu he puhala he kaina he patuiki, ke he gutuhala ke he vaha he na kaupa ua; ne fina age foki a ia he puhala ke he kelekele tatai.
5 Ti tutuli he kau he tau tagata Kaletaia a lautolu, ti moua ai e lautolu a ia ke he kelekele tatai a Ieriko; kua tapaki e lautolu a ia, ti ta hake e lautolu a ia ke he patuiki a Papelonia ko Nepukanesa i Ripelā ke he motu ko Hamato, ti vagahau ai a laua mo ia ke he fakahala.
6 Ti kelipopo ai he patuiki a Papelonia e tau tama tane a Setekaia ki mua hana i Ripelā; ne kelipopo foki he patuiki a Papelonia e tau iki oti a Iuta.
7 Ne fakapouli foki e ia e tau mata a Setekaia mo e lili e lautolu a ia ke he na liliaga apa kula ua ke uta a ia ki Papelonia.
8 Ne huhunu foki he tau tagata Kaletaia e fale he patuiki, mo e tau fale he tau tagata ke he afi, mo e ulu moumou e lautolu e kaupa a Ierusalema.
9 Ko lautolu ne toe he motu ne ha i ai agaia ke he maga, mo lautolu ne fehola, ne fehola age kia ia, mo lautolu ne toe he motu ha ha i ai agaia, ne uta he takitaki he kau leoleo ko Nepusatana a lautolu ki Papelonia.
10 Ka e toka ai he takitaki he kau leoleo ko Nepusatana ke he motu ko Iuta, falu a tagata he motu ko e tau tagata nonofogati, ko lautolu kua nakai fai mena, ti ta age e ia kia lautolu ke he aho ia e tau uluvine mo e tau fonua.
11 Ne poaki foki e patuiki a Papelonia ko Nepukanesa ke he takitaki he kau leoleo ko Nepusatana kia Ieremia, kua pehe age,
12 Kia uta e koe a ia, ti kitekite a koe kia ia, to ua eke e koe ha mena kelea kia ia; ka e tuga ne vagahau mai e ia kia koe, kia eke pihia e koe kia ia.
13 Ti fakafano atu he takitaki he kau leoleo ko Nepusatana, mo Nepusapana ko e iki he tau eunuka, mo Nekala-saresa ko e iki he tau makoi, mo e tau iki oti he patuiki a Papelonia;
14 Ne fakafano atu e lautolu, mo e ta mai ai e lautolu a Ieremia he lotopa he fale puipui, ti tuku age e lautolu a ia kia Ketalia ko e tama a Aikamo, ko e tama a Safana, kia uta e ia a ia ke he fale; ti nofo ai a ia fakalataha mo e motu.
15 Ne hoko mai e kupu a Iehova kia Ieremia, he puipui ai a ia ke he lotopa he fale puipui, kua pehe mai,
16 Kia fano a koe mo e tala age a koe kia Epetameleka ko e tagata Aitiope, kia pehe age, Kua pehe mai e vagahau a Iehova Sapaota, ko e Atua a Isaraela, Kitiala, to fakahoko e au haku a tau kupu ke he maga nai ke malaia ai, ka e nakai ke monuina ai; to hoko foki ki mua hāu ke he aho ia.
17 Ka to laveaki e au a koe ke he aho ia, Kua pihia mai a Iehova, ti nakai tuku atu a koe ke he tau lima he tau tagata kua matakutaku a koe ki ai.
18 Ha ko e mena to fakahao e au a koe, ti nakai mate a koe ke he pelu, ka e eke e moui hāu mo mena ne fofo he tau māu; ha kua tua a koe kia au, kua pihia mai a Iehova.