Ieremia 40:1-16
40 KO e kupu ne hoko mai ia Iehova kia Ieremia, ka kua mole he toka atu he takitaki he kau leoleo ko Nepusatana a ia ke fano i Rama, he moua e ia a ia, kua lili a ia ke he tau liliaga lapatoa fakalataha mo e tau tagata oti ne fakapaea atu i Ierusalema mo Iuta ne uta ke fakapaea ai i Papelonia.
2 Ti uta he takitaki he kau leoleo a Ieremia, mo e pehe age kia ia, Ne talahau mai e Iehova, hau a Atua, e malaia nai ke he mena nai.
3 Ti fakahoko ai e Iehova, mo e eke ai e ia ke lata mo e mena ne vagahau mai e ia; ha kua hala a mutolu kia Iehova, mo e nakai fanogonogo a mutolu ke he hana leo, ko e mena ia kua hoko kia mutolu e tau mena nai.
4 Hanai, kitiala, kua vevete a koe he aho nai mai he tau toua lapatoa ha ha he tau lima hāu. Kaeke kua mitaki kia koe ke o a taua mo au ki Papelonia, ti hau a ke o, to leveki e au a koe; ka ko e mena kaeke kua kelea kia koe ke o a taua mo au ki Papelonia, ti tokai; kia kitekite a a koe, ha ha i mua hau e motu oti; ko e mena ne mitaki mo e lata ke fano a koe ki ai, kia fano a koe ke he mena ia.
5 Ka kua nakaila liu atu a ia, ti pehe age a ia, Kia liu atu ā koe kia Ketalia ko e tama a Aikamo, ko e tama a ia a Safana, ne kotofa ai a ia he patuiki a Papelonia ke pule ke he tau maga a Iuta, ti nonofo a mua mo ia fakalataha mo e motu; ka nakai pihia, ko e mena kua lata kia koe ke fano ki ai, kia fano ā koe ki ai. Ti ta age he takitaki he kau leoleo e tau mena kai kia ia, mo e mena fakaalofa, ti fakafano atu e ia a ia.
6 Ti fina age ai a Ieremia kia Ketalia ko e tama a Aikamo ki Misepa; ti nonofo ai a laua mo ia fakalataha mo e tau tagata ne toe ke he motu.
7 Ko e tau takitaki kau oti ha ha he vao, ko lautolu mo e tau tagata ha lautolu, ne logona e lautolu kua kotofa he patuiki a Papelonia a Ketalia ko e tama a Aikamo ke pule ke he motu, kua kotofa foki a ia ke pule ke he tau tane, mo e tau fifine, mo e tau tama ikiiki, ko e falu foki ko e tau tagata nonofogati, kua nakai uta fakapaea ai ki Papelonia;
8 Ti o mai ai a lautolu kia Ketalia i Misepa, ko Isamaeli ko e tama a Netanaia, mo Iohanana mo Ionatana ko e tau tama a Karea, mo Seraia ko e tama a Tanumeta, ko e tau tama foki a Efai ko e tagata Netopa, mo Iaasenaia ko e tama he tagata Maaka, ko lautolu mo e tau tagata ha lautolu.
9 Ti omonuo ai a Ketalaia ko e tama a Aikamo, ko e tama a Safana kia lautolu mo e ha lautolu a tau tagata, kua pehe atu, Aua neke matakutaku a mutolu ke fekafekau ke he tau tagata Kaletaia; kia nonofo a mutolu ke he motu, mo e fekafekau ai ke he patuiki a Papelonia, ti monuina ai a mutolu.
10 Ko au foki, kitiala to nofo au i Misepa, ke tu ai ki mua he tau tagata Kaletaia, ko lautolu ke o mai kia mutolu; ka ko mutolu, kia tatanaki uaina a mutolu, mo e tau fua akau momoho, mo e puke lolo, mo e tuku ke he tau mena ha mutolu ke toka ai, ti nonofo a mutolu ke he ha mutolu a tau maga kua moua e mutolu.
11 Ko e tau tagata Iuta oti foki ha ha i Moapi, mo e motu he fanau a Amoni, mo Etoma mo lautolu ha ha i ai ke he tau motu oti, kua logona e lautolu kua toka he patuiki a Papelonia a lautolu ne toe i Iuta, mo e kotofa ai e ia ke pule kia lautolu a Ketalia ko e tama a Aikamo, ko e tama a Safana;
12 Ti liliu mai ai e tau tagata Iuta oti, he tau mena oti ne vega a lautolu ki ai, mo e o mai a lautolu ke he motu ko Iuta kia Ketalia i Misepa, ti tatanaki ai e lautolu e uaina mo e tau fua akau momoho ne loga lahi ni.
13 Ko Iohanana foki ko e tama a Karea, mo e tau takitaki kau oti ne ha i ai ke he vao, kua o mai a lautolu kia Ketalia i Misepa;
14 Ti pehe age a lautolu kia ia, Kua iloa nakai e koe kua fakafano mai he patuiki he fanau a Amoni ko Paaliso, a Isamaeli ko e tama a Netanaia ke kelipopo a koe? Ka e nakai talia e Ketalia ko e tama a Aikamo e tala ha lautolu.
15 Ti tala age fufu a Iohanana ko e tama a Karea kia Ketalia i Misepa, kua pehe age, Kia toka e koe au ke fano, mo e keli e au a Isamaeli ko e tama a Netanaia, ti nakai iloa e taha, Kia kelipopo e ia a koe he ha, ke fakamavehevehe ai e tau tagata Iuta oti kua fakapotopoto ai kia koe, ke fakaotioti ai foki e tau tagata Iuta ne toe?
16 Ti pehe age a Ketalia ko e tama a Aikamo kia Iohanana ko e tama a Karea, Ua eke e koe e mena na, ha ko e pikopiko kua tala mai e koe kia Isamaeli.