Ieremia 44:1-30
44 KO e kupu ne hoko mai ia Iehova kia Ieremia ke he tau tagata Iuta oti ne nonofo ke he motu ko Aikupito, ne nonofo i Mikatolo, mo Tapanesa, mo Nofi, mo e motu ko Patarosi, kua pehe mai,
2 Kua pehe mai e vagahau a Iehova Sapaota, ko e Atua a Isaraela; Kua kitia e mutolu e tau malaia oti ne fakahoko e au ki luga a Ierusalema, ki luga foki he tau maga oti a Iuta; ti kitiala, kua eke tuai mo tau mena kua moumou, ti nakai nofo ai ha tagata;
3 Ha ko e ha lautolu a tau mahani kelea ne eke e lautolu, ke fakahogohogomanava mai a lautolu kia au, ke huhunu e lautolu e tau mena manogi ke fekafekau ai ke he tau atua kehe, kua nakai iloa e lautolu, ko lautolu, po ko mutolu, po ke tau matua ha mutolu.
4 Ne fakafano atu foki e au kia mutolu haku a tau fekafekau oti ko e tau perofeta, ne uhu matike au mo e fakafano atu a lautolu, kua pehe atu, Aua neke eke e mutolu e tau mena fakalialia na, ko e tau mena ne vihiatia e au.
5 Ka e nakai fanogonogo mai a lautolu, ti nakai haga mai a lautolu ha lautolu a tau teliga, ke liliu mai a lautolu he tau mahani kelea ha lautolu, ke aua neke huhunu ai e lautolu e tau mena manogi ke he tau atua kehe.
6 Ko e mena ia ne liligi ai haku a ita lahi mo e haku a ita, ti puho ai ni ke he tau maga a Iuta, mo e tau puhala i Ierusalema; ti eke ia mo tau mena kua moumou, mo vao foki, tuga he eke ai ke he aho nai.
7 Hanai, kua pehe mai e vagahau a Iehova, ko e Atua Sapaota, ko e Atua a Isaraela, Ko e eke he ha e mutolu e kelea lahi nai ke malaia ai a mutolu, kia fakaoti ai ia mutolu e tau tane mo e tau fifine, ko e tau tama ikiiki mo e tau tama kai huhu, i loto a Iuta, ke nakai toe ai ha tagata ha mutolu;
8 Ha kua fakahogohogomanava mai a mutolu kia au ke he tau mena kua eke ai he tau lima ha mutolu, kua huhunu e mutolu e tau mena manogi ke he tau atua kehe ke he motu ko Aikupito, ne o a mutolu ki ai ke api ai, kia fakaoti ai a mutolu, mo e eke a mutolu mo mena ke kaialu ki ai ke eke foki mo mena ke ekefakakelea ki ai ke he tau motu oti he lalolagi?
9 Kua nimo kia kia mutolu e mahani kelea he tau matua ha mutolu, mo e mahani kelea he tau patuiki a Iuta, mo e mahani kelea he tau hoana ha lautolu, mo e ha mutolu a mahani kelea, mo e mahani kelea he tau hoana ha mutolu, ne eke ai e lautolu ke he motu ko Iuta, mo e tau puhala a Ierusalema?
10 Nakai hukia ha lautolu a tau loto ke hoko mai ke he aho nai, ti nakai matakutaku a lautolu, ti nakai o ai a lautolu ke he haku a tau fakatufono, mo e haku a tau poakiaga, ne tuku atu e au ki mua ha mutolu, ki mua foki ha mutolu a tau matua.
11 Ko e mena ia kua pehe mai e vagahau a Iehova Sapaota, ko e Atua a Isaraela, Kitiala, to haga atu haku a tau mata kia mutolu ke malaia ai a mutolu, ke fakaoti ai a Iuta oti ni.
12 To uta foki e au a lautolu ne toe he tau tagata Iuta, ko lautolu ne haga atu ha lautolu a tau mata ke o ke he motu ko Aikupito ke api ai, ti fakaoti ai a lautolu oti ke he motu ko Aikupito; to mamate a lautolu ke he pelu mo e hoge, to fakaoti ai a lautolu, ko e tau lalo tagata katoa mo e tau iki; to mamate a lautolu ke he pelu mo e hoge; to eke foki a lautolu mo mena ke katalu ki ai, mo mena foki ke ofo ai, mo mena foki ke tuku atu ke malaia, mo mena foki ke ekefakakelea ki ai.
13 Ha ko e mena to taui atu e au kia lautolu ne nonofo ke he motu ko Aikupito, tuga he taui atu e au ki Ierusalema ke he pelu, mo e hoge, mo e tatalu;
14 Ko lautolu ne toe he tau tagata Iuta, ne o mai ke api ai ke he mena nai ke he motu ko Aikupito, nakai ni hao taha po ke toe taha, ke liu atu ke he motu ko Iuta, ko e mena kua manako a lautolu ke lili atu ki ai ke nonofo ai; ha ko e mena nakai liliu atu a lautolu, ka ko lautolu ni kua fehola.
15 Ti tali mai ai kia Ieremia he tau tagata oti ne iloa kua fakavela he tau hoana ha lautolu e tau mena manogi ke he tau atua kehe, mo e tau fifine oti ne tutu mai, ko e fakapotopotoaga lahi, ko e tau tagata Iuta oti ni ne nonofo ke he motu ko Aikupito, i Patarosi, kua pehe mai,
16 Ko e kupu kua vagahau mai e koe kia mautolu ke he higoa a Iehova, nakai ni fanogonogo ai a mautolu kai koe;
17 Ka to eke ni e mautolu e tau mena oti ne tala atu ai e mautolu, ke fakavela ai e tau mena manogi ke he patuiki fifine he lagi, mo e liligi atu ki ai e tau poa inu, tuga he eke e mautolu, ko mautolu, mo e ha mautolu a tau matua tane, ko e ha mautolu a tau patuiki, mo e ha mautolu a tau iki, ke he tau maga a Iuta, mo e tau puhala i Ierusalema; ha ko e vaha ia ne makona ai a mautolu he tau mena kai, ne monuina foki, ti nakai kitia e mautolu e kelea.
18 Ka e tali he toka e mautolu he fakavela e tau mena manogi ke he patuiki fifine he lagi, mo e liligi atu kia ia e tau poa inu, kua nonofogati a mautolu ke he tau mena oti, ti fakaoti ai a mautolu ke he pelu mo e hoge.
19 Ne fakavela e mautolu e tau mena manogi ke he patuiki fifine he lagi, mo e liligi e mautolu kia ia e tau poa inu, nakai kia ha i ai e tau tane ha mautolu he eke e mautolu e tau areto lapalapa ke fekafekau kia ia, mo e liligi atu e tau poa inu kia ia?
20 Ti pehe atu a Ieremia ke he motu oti, ko e tau tane mo e tau fifine, mo e tau tagata oti ne tali mai ai kia ia ke he tau kupu na, kua pehe atu,
21 Ko e tau mena manogi ne fakavela ai e mutolu ke he tau maga a Iuta mo e tau puhala i Ierusalema, ko mutolu, mo e ha mutolu a tau matua, mo e ha mutolu a tau patuiki, mo e ha mutolu a tau iki, mo e tau tagata he motu, nakai kia manatu ai e Iehova e tau mena ia, ti nakai manamanatu a ia ki ai?
22 Ti nakai tuai maeke kia Iehova ke fakauka, ha ko e kelea he tau mahani ha mutolu, ha ko e tau mena vihiatia ne eke e mutolu; ko e mena ia kua eke ai e motu ha mutolu mo tau mena moumou, mo mena foki ke ofo ai, mo mena foki ke kaialu ai, ti nakai nofo ai taha, tuga he eke ai ke he aho nai.
23 Kua fakavela e mutolu e tau mena manogi, kua hala foki a mutolu kia Iehova, mo e nakai fanogonogo a mutolu ke he leo a Iehova, mo e nakai o a mutolu ke lata mo e hana tau fakatufono, mo e hana tau poakiaga, mo e hana tau talahau; ko e mena ia kua hoko e tau malaia nai kia mutolu, tuga he eke ai ke he aho nai.
24 Kua pehe atu foki a Ieremia ke he motu oti, mo e tau fifine oti, Kia fanogonogo mai a ke he kupu a Iehova ko mutolu ko e tau tagata Iuta oti, ha ha he motu ko Aikupito;
25 Kua vagahau mai pehe a Iehova Sapaota, ko e Atua a Isaraela, kua pehe mai, Ko mutolu mo e tau hoana ha mutolu, kua vagahau mai a mutolu he tau gutu ha mutolu, kua fakamoli foki ke he tau lima ha mutolu, kua pehe mai, To eke ni e mautolu ha mautolu a omonuo ne omonuo ai e mautolu ke fakavela ai e tau mena manogi ke he patuiki fifine he lagi, mo e liligi atu kia ia e tau poa inu; ati fakamau ai la e mutolu ha mutolu a tau omonuo, ti eke a e mutolu ha mutolu a tau omonuo.
26 Ko e mena ia kia fanogonogo mai a ke he kupu a Iehova, ko mutolu ko e tau tagata Iutaia oti kua nonofo ke he motu ko Aikupito; Kitiala, kua omonuo au ke he haku a higoa lahi, kua pihia mai a Iehova, nakai liu talahau ai haku a higoa he gutu he taha tagata Iuta ha ha i ai ke he motu oti ko Aikupito, kua pehe, Kua moui e Iki ko Iehova.
27 Kitiala, kua mataala au kia malaia a lautolu, ka e nakai ke monuina ai, to fakaoti ai e tau tagata Iuta oti ha ha he motu ko Aikupito, ke he pelu, mo e tatalu, ato fakaoti ai a lautolu.
28 Ka ko lautolu ka hao mai he pelu to liliu atu a lautolu he motu ko Aikupito ke he motu ko Iuta, ko e tokogahoa a lautolu; to iloa foki e Iuta oti ne toe, ne o atu ke he motu ko Aikupito ke api ai, po ke tau kupu a hai ke tumai, po ke haku, po ke ha lautolu.
29 Ko e fakamailoga foki kia mutolu hanai, ke taui atu ai e au kia mutolu ke he mena nai, ke iloa ai e mutolu kua tumau ni haku a tau kupu kia mutolu ke malaia ai a mutolu.
30 Kua pehe mai e vagahau a Iehova, Kitiala, to tuku atu e au e patuiki a Aikupito ko Farao Ofera ke he tau lima ha lautolu ne fai fi kia ia, mo e tau lima ha lautolu ne kumi ke kelipopo a ia; tuga he tuku atu e au a Setekaia ko e patuiki a Iuta ke he lima he patuiki a Papelonia ko Nepukanesa, ne fai fi kia ia, mo e kumi ke kelipopo a ia.