Ieremia 48:1-47
48 KUA vagahau mai pehe he Atua a Isaraela, ko Iehova Sapaota, ki Moapi, Oi te fakalofa kia Nepo! ha kua eke a ia mo mena kua moumou, kua fakamā a Kiriataima, kua fofo a ia; kua fakamā a Misikava, mo e fakamatakutaku ai a ia.
2 Nakai tuai fakaheke ki Moapi, kua eke e lautolu i Hesepono e tau lagatau ke malaia ai a ia; kua pehe age a lautolu, Kia o mai a kia hehele kehe e tautolu a ia, ke nakai tuai eke a ia mo motu; Matameni na e, to fakaoti ni a koe; to mui atu e pelu kia koe,
3 Ko e leo he tagi mai Horonaima, ha ha i ai e moumou mo e malaia lahi.
4 Kua malaia a Moapi; kua logona ai e tagi he hana tau tama ikiiki.
5 Ha kua o hake a lautolu he matiketike ki Luhita mo e tagi; ko e mena foki ne hifo ai i Horonaima, ne logona ai e lautolu ne fai fi kia lautolu, e tagi ha ko e malaia.
6 Kia fehola a, ke hao ai a mutolu, mo e eke a mutolu ke tuga ne malamalaega ke he tutakale.
7 Kua tua a koe ke he hau a tau mena ne eke, mo e hau a tau koloa, ko e mena ia to tapaki ai a koe; to fano foki a Kemosa ke he paeaaga, ko e hana tau ekepoa mo e hana tau iki fakalataha mo ia.
8 To hau foki a ia kua moumou ke he tau maga oti, ti nakai ni hao ha maga; to moumou foki e pahua, to fakaoti foki e kelekele tatai, ha kua vagahau mai ai e Iehova.
9 Kia eke a e tau tapakau ma Moapi, kia lele a ia mo e fano kehe; ha kua eke hana tau maga mo tau mena kua moumou, nakai nofo ai taha.
10 Kia malaia a ia kua eke e gahua a Iehova mo e fakalolelole, kia malaia a ia kua taofi hana pelu mai he toto.
11 Kua nofo a Moapi mo e mafola tali mai he hana vaha fuata, kua nofo a ia ki luga hana tau kele, nakai liligi a ia mai he taha kapiniu ke he taha kapiniu, ti nakai fano a ia ke he paeaaga; ko e mena ia ne tumau ai hana namu, ti nakai hiki hana manogi.
12 Ko e mena ia kitiala, to hohoko mai e tau aho, kua pihia mai a Iehova, ke fakafano atu e au falu kia ia ti fakatakoto e lautolu a ia, mo e liligi e lautolu hana tau kapiniu, mo e lipilipi e lautolu hana tau lupo.
13 To mā foki a Moapi ha ko Kemosa, tuga he mā e magafaoa a Isaraela ha ko Peteli, ne tua a lautolu ki ai.
14 Ke pehe mai fefe a mutolu Ko e tau toa a mautolu, ko e tau tagata malolo ke tau ai ke he tau.
15 Kua eke a Moapi mo mena kua moumou, mo e o hake ai hana tau maga; ko e hana tau fuata fifili foki kua o hifo a lautolu ke kelipopo, kua pihia mai e Patuiki, ko Iehova Sapaota hana higoa.
16 Ko e malaia a Moapi kua tata he hoko mai, ko e mena foki ke kelea ai a ia to alumaki mai a ia.
17 Ko mutolu oti ne agaagai kia ia, kia tagi a mutolu ha ko ia; ko mutolu oti foki kua iloa hana higoa, kia pehe atu a mutolu, Oi te? kua fati e tokotoko mao, ko e akau fulufuluola.
18 Ko koe na ko e tama fifine kua nofo i Tipono, kia hifo a mai he lilifu, mo e nofo a koe ke he motu fia inu; ha kua hake kia koe a ia ne moumou a Moapi, kua fakaoti e ia hau a tau taue.
19 Ko koe na kua nofo i Aroeru, kia tu a ke he puhala mo e kitekite atu; kia huhu atu kia ia ne hola, mo ia ne hao, kia pehe atu, Ko e heigoa kia e mena kua eke?
20 Kua mā a Moapi; ha kua fakamatakutaku a ia; kia tagi fekapai a mutolu mo e tagi; kia talahau atu e mutolu i Aranona, kua eke tuai a Moapi mo mena kua moumou,
21 Kua hoko foki e fakahala ke he kelekele tatai; ko Holona, mo Iahesa, mo Mefata,
22 Mo Tipono, mo Nepo, mo Petitipelata,
23 Mo Kiriataima, mo Petekamulo, mo Petemeona,
24 Mo Keriota, mo Posara, mo e tau maga oti ke he motu ko Moapi, ko e tau maga mamao, mo e tau maga ne tata mai.
25 Kua hehele kehe e hoe a Moapi, mo e fati hana lima, kua pihia mai a Iehova.
26 Kia fakainu e mutolu a ia ke konahia; he fakatokoluga a ia kia Iehova; ti taveli a Moapi ke he hana koko, ti eke foki a ia mo mena ke feki ki ai.
27 Nakai kia eke a Isaraela mo mena ke feki ki ai kia koe? ne moua kia a ia fakalataha mo e tau tagata kaiha? ha ko e mena ka vagahau a koe kia ia kua luelue e koe hau a ulu.
28 Ko mutolu kua nonofo i Moapi, kia tiaki e mutolu e tau maga, mo e nonofo a mutolu ke he kaumaka; ki eke a mutolu ke tuga ne lupe, kua taute e ia hana fata ke he tau fahi he gutu luo.
29 Kua logona e mautolu e fakatokoluga a Moapi, kua fakatokoluga lahi a ia; ko e hana fiamua, mo e hana mahani fakahakehake, mo e hana fakaikaluga, mo e fakatokoluga he hana loto.
30 Kua pehe mai a Iehova, Kua iloa e au, ko au ni, hana a ita, ka e noa maka ni; ko e hana tau vagahau fakateaga nakai ni eke e tau mena ia.
31 Ko e mena ia to tagi aue au ha ko Moapi, mo e tagi au ha ko Moapi oti; to tauoi a lautolu ha ko e tau tagata Kiriaresa.
32 Ko e vine a Sipema na e, to tagi au tuga ne tagi a Iasaru ha ko koe; ne totolo atu hau a tau tatupu ke he fahi atu he tahi, ne hohoko atu ke he tahi a Iasaru; kua oho mai a ia ne moumou ke he hau a tau fua akau momoho, mo e tanakiaga he hau a tau fua vine.
33 Kua uta kehe e fiafia mo e kolikoli he fonua talumelie, mo e motu ko Moapi; kua fakahiku e au e uaina he holiaga vine; nakai tuai taholi mo e kalaga fiafia; ko e kalaga fiafia nakai ko e kalaga fiafia haia.
34 Ha ko e tagi a Hesepona ne feheaaki a lautolu ke hoko ki Eleale, ke hoko ni ki Iaesa ke kamata mai Soara ke hoko atu ki Horonaima, ki Ekelata-salisia; ha kua eke foki e tau vai i Nimara mo e tau mena kua moumou.
35 Kua pehe mai a Iehova, to fakaoti e au i Moapi, a ia ne eke poa ai ke he mena tokoluga, mo ia kua fakavela e tau mena manogi ke he hana tau atua.
36 Ko e mena ia kua tagi ai hoku loto tuga ne kofe ha ko Moapi, kua tagi foki haku loto tuga ne kofe ha ko e tau tagata Kiriaresa; ha ko e tau mena loga ne moua e lautolu kua oti he moumou.
37 Ha kua hifi puga ha lautolu a tau ulu oti, mo e helehele e tau hafe oti; kua mahele foki e tau lima oti, mo e tapulu ai e tau tokupu ke he ie talatala.
38 Kua tagi aue ai ki luga he tau tua fale oti i Moapi, mo e hana tau male oti; ha kua lipilipi e au a Moapi, tuga e kapiniu kua nakai fiafia ki ai, kua pihia mai a Iehova.
39 Kua tagi fekapai a lautolu kua pehe age, Oi te! kua eke a ia mo tau mena kua moumou. Oi te! kua liu ki tua a Moapi mo e mā. To eke foki a Moapi mo vāaga mo mena foki ke matakutaku ai kia lautolu oti kua agaagai kia ia.
40 Ha kua pehe mai e vagahau a Iehova, Kitiala, to lele a ia tuga ne aeto, mo e fofola ai e ia hana tau tapakau ki luga a Moapi.
41 Kua fofo a Keriota, kua moua foki e tau taue, ti eke e tau loto he tau toa a Moapi ke he aho ia tuga e loto he fifine ne mamahi ke fanau.
42 To fakaoti a Moapi, nakai eke a ia mo motu, he fakatokoluga a ia kia Iehova.
43 Kua pehe mai a Iehova, Ha ha ia koe kua nofo i Moapi, e matakutaku, mo e luo, mo e hele.
44 Ko ia kua hola he matakutaku to to a ia ke he luo; ko ia kua hake mai he luo to moua ai a ia he hele; ha ko e mena to fakahoko e au kia ia, ki Moapi ni, e tau ke taui mai ai kia lautolu, kua pihia mai a Iehova.
45 Ko lautolu ne fehola, kua tutu a lautolu ke he ata a Hesepona, kua nakai fai malolo a lautolu; ha kua fina atu e afi mai Hesepona, mo e afi puhopuho mai loto a Sikono, kua fakaoti ai e fahi a Moapi, mo e tau tumuaki ulu he tau tagata fa go.
46 Moapi na e, oi te fakaalofa kia koe! kua fakaoti e motu ko Kemosa; ha kua uta hau a tau tama tane ke he paeaaga, mo e hau a tau tama fifine ke he paeaaga.
47 Ka to liu aki mai e au e paeaaga a Moapi, ke he tau aho a mui, kua pihia mai a Iehova. Ti liu mai ai he mena ia e fakahala a Moapi.