Ieremia 49:1-39
49 KUA pehe mai e vagahau a Iehova ke he fanau a Amoni, Nakai kia fai tama tane a Isaraela? nakai kia fai hakeaga a ia? Ti kua eke he ha e Malekama a Kato māna, ti nonofo ai hana tau tagata ke he tau maga hana?
2 Ko e mena a kitiala, to hoko mai e vaha, kua pihia mai a Iehova, to eke e au ke logona ai e kalaga ke tau ki Rapa, ko e maga he fanau a Anomi; to eke ia mo tumutumu, he tau mena kua moumou, to huhunu ke he afi hana tau maga ne fofo; ti eke e Isaraela a lautolu māna, ko lautolu ne eke a ia ma lautolu, kua pihia mai a Iehova.
3 Hesepona na e, kia tagi fekapai ā, ha kua eke a Ai mo mena kua moumou; kia tagi ā mutolu ko e tau tama fifine a Rapa, kia tapulu a a mutolu ke he ie talatala, kia tagi tatuki ā, mo e tafepoi taufeliuaki ke he tau kaupa; ha ko e mena to fano a Malekama ke he paeaaga, ko e hana tau ekepoa katoa mo e hana tau iki fakalataha mo ia.
4 Ko e hula he ha a koe ke he tau pahua, ko e hau a pahua ne tafe ai e tau mena oti, ko koe na ko e tama fifine ne liu kehe? ne tua a ia ke he hana tau koloa, kua pehe mai, Ko hai kia ke hau kia au?
5 Kua pehe mai e Iki ko Iehova Sapaota, Kitiala, to fakahoko e au kia koe e matakutaku, mai ia lautolu oti kua agaagai kia koe; to vega foki a mutolu takitokotaha he mena ha ha i ai ki mua hana; ti nakai ha ha i ai taha ke fakapotopoto a lautolu ne fehola.
6 Ka mole atu e tau mena ia, ti liuaki mai e au e fanau a Amoni he paeaaga, kua pihia mai a Iehova.
7 Kua pehe mai e vagahau a Iehova Sapaota kia Etoma Nakai tuai ha ha ia Timanu kia e iloilo? kua fakaoti kia e pulega mai he tau tagata pulotu? kua mole atu kia ha lautolu a iloilo?
8 Ko mutolu ne nonofo i Titana, kia fehola ā mutolu, kia liliu ā, kia nonofo ā mutolu ke he tau mena hokulo; ha ko e mena to fakahoko e au e malaia a Esau ki luga hana, ke he hana vaha ke taui atu ai e au kia ia.
9 Kane o atu kia koe e tau tagata faki fua vine, po kua nakai kia toka e lautolu falu a fuhi vine? kane o atu kia koe e tau tagata kaiha ke he po, po kua nakai kia moumou mena e lautolu ke lata ma lautolu?
10 Ka kua fakatokanoa e au a Esau; kua fakakite e au hana tau mena galo, ti nakai ni maeke ke fakamumuli a ia; kua fakaoti hana fanau, mo e hana tau matakainaga, mo lautolu ne katofia mo ia; ti nakai ha i ai foki a ia.
11 Kia toka a hau a tau tama kua nakai fai matua, to fakamoui e au a lautolu; kia tua foki kia au hau a tau fifine takape.
12 Ha kua pehe mai e vagahau a Iehova, Kitiala, ko lautolu nakai lata ke inu ke he kapiniu, kua inu ai a lautolu; ka ko koe, ke noa kia a koe mo e fakahala? nakai ni hao a koe, ha ko e mena inu ai ni a koe.
13 Ha kua pehe mai a Iehova, Kua omonuo e au kia au, ke eke a Posara mo mena ke ofo ai, mo mena ke eke fakakelea ki ai; mo mena tiaki, mo mena foki ke kaialu ki ai; to eke foki hana tau maga oti mo tau mena kua moumou tukulagi.
14 Kua logona e au e ogo mai ia Iehova, kua fakafano atu foki e fekau ke he tau motu kehe, kua pehe atu, Kia fakapotopoto ā mutolu, mo e o mai a mutolu kia ia, mo e mamatike ā mutolu ke tau ai ke he tau.
15 Ha ko e mena kitiala, to eke e au kia fakateaga a koe ke he tau motu, kia vihiatia a koe he tau tagata.
16 Ko e hau a matakutakuina, mo e fakatokoluga he hau a loto kua fakahehe ai a koe, ko koe kua nofo ke he tau poko maka he maka tumau, kua taofi ai e mena tokoluga he mouga; pete he tokoluga e mena kua tuku ai hau a fata tuga ne aeto, to liti hifo au a koe he mena ia, kua pihia mai a Iehova.
17 To eke foki a Etoma mo mena ke ofo ai; to ofo a lautolu oti takitaha ne o age ai, mo e fakakatakatakē ai ke he hana tau mauku oti.
18 Tuga he fakaotioti a Sotoma mo Komora, mo e tau maga ne fetataaki mo lautolu, kua pehe mai a Iehova, nakai nofo ai taha he mena ia, to nakai api ai ha tama he tagata.
19 Kitiala, to hake a ia tuga ne leona mai he fulufuluola a Ioritana, ke he mena mau ke nofo ai; ha ko e mena to fakaohooho fakalutukia e au a ia ke fano kehe fakaave a ia ia ia; ko hai foki e tagata kua fifili, to kotofa e au a ia ke pule kia ia; ha ko hai kia ke tatai mo au? ko hai foki ke kotofa e tau aho kia au? ko hai foki e leveki mamoe na kua maeke ke tu ki mua haku?
20 Ko e mena ia kia fanogonogo mai a mutolu ke he pule a Iehova kua pule ai a ia ki Etoma, mo e hana tau manamanatuaga ne manamanatu ai e ia ke kelea ai a lautolu ne nonofo i Timanu, ko e moli to toho kehe e lautolu a lautolu, ko lautolu ne mua he ikiiki he fuifui mamoe; ko e moli, to eke e ia ha lautolu a tau mena ne nonofo ai mo tau mena kua moumou ki luga ha lautolu.
21 Ko e tomumu ke veveli a lautolu kua luelue ai e lalolagi; ko e leo foki he hana tagi kua logona ia ke he Tahi Kula.
22 Kitiala, to hake a ia mo e lele tuga ne aeto, to fofola foki e ia hana tau tapakau ki luga a Posara; to eke foki e tau loto he tau toa i Etoma ke he aho ia, ke tuga e loto he fifine ne mamahi ke fanau.
23 Ko e tau kupu ki Tamaseko. Kua mā a Hamato mo Arepata; he logona e lautolu e ogo tamaki; kua liu puke vai a lautolu; ha ha he tahi e fakaatukehe; nakai maeke ke okioki a ia.
24 Kua lolelole tuai a Tamaseko, ne tafilu a ia ke hola, kua moua a ia he matakutaku; kua moua a ia he matematekelea mo e mamahi tuga e mamahi fanau he fifine kua fatu.
25 Nakai tiaki ai e maga ne fakaheke ki ai, ko e maga ne fiafia au ki ai?
26 Ko e mena ia to veveli ai hana tau fuata ke he hana tau male, to mamate foki he aho ia hana tau tagata tau oti, kua pihia mai a Iehova Sapaota.
27 To huhunu foki e au ke he afi e kaupa a Tamaseko, to fakaoti ai foki e tau fale iki a Penihata.
28 Kua pehe mai e vagahau a Iehova, ki Kitara, mo e tau kautu a Hasora ne ta e Nepukanesa ko e patuiki a Papelonia, Kia mamatike ā mutolu, kia o hake a mutolu ki Katara mo e fakaoti e mutolu e tau tagata he fahi uta.
29 To fofo e lautolu ha lautolu a tau fale ie mo e ha lautolu a tau fuifui mamoe; to uta foki e lautolu ma lautolu e tau ie puipui ha lautolu, mo e ha lautolu a tau mena oti, mo e ha lautolu a tau kamela; to tagi foki a lautolu ha ko lautolu, Ha ha ai ke he tau fahi oti e matakutaku.
30 Ko mutolu kua nonofo i Hasora, kia fehola a, kia fehola fakalahi ā mutolu, kia nonofo ā mutolu ke he tau mena hokulo, kua pihia mai a Iehova; ha kua pule kia mutolu e patuiki a Papelonia ko Nepukanesa, kua manamanatu e ia ke he tau lagatau ke kelea ai a mutolu.
31 Kia mamatike ā mutolu mo e o hake ke he motu kua nonofo fakatekiteki, kua nonofo fakahanoa a lautolu, kua pihia mai a Iehova; kua nakai fai gutuhala a lautolu, ti nakai fai akau fakalava, kua nonofo a lautolu ni hoko lautolu.
32 Ko e ha lautolu a tau kamela foki to eke ia mo mena ne fofo he tau, mo e ha lautolu a tau fuifui manu loga to eke mo mena kaiha; to fakamavehevehe foki e au ke he tau mata matagi oti a lautolu ne hifi ha lautolu a tau hafe kakau; to ta mai foki e au ha lautolu a malaia mai he tau fahi oti, kua pihia mai a Iehova.
33 To eke foki a Hasora mo mena ke ofaga ai e tau luko, ko e mena kua moumou ke hoko ke he tukulagi; nakai nofo ai ha tagata ke he mena ia, ti nakai api ai foki ha tama he tagata.
34 Ko e kupu a Iehova ne hoko mai ke he perofeta ko Ieremia ki Elama; ke he kamataaga he eke a Setekaia ko e patuiki a Iuta, mo patuiki, kua pehe mai,
35 Kua pehe mai e vagahau a Iehova Sapaota, Kitiala, to fafati e au e kaufana a Elama, ko e mena ne mua ia ha lautolu ke malolo ai.
36 To ta mai foki e au e tau matagi ne fa he tau fahi lagi ne fa ki luga a Elama, mo e fakamavehevehe e au a lautolu ke he tau matamatagi oti; ti nakai fai motu ke nakai hohoko atu ki ai e tau tagata Elama kua vega.
37 To fakamatakutaku foki e au a Elama ki mua ha lautolu ne fai fi kia lautolu, ki mua foki ha lautolu ne kumi a lautolu ke tamate; to fakahoko e au e malaia ki luga ha lautolu ko e haku a ita lahi, kua pihia mai a Iehova; to fakafano atu foki e au e pelu ke mui atu kia lautolu, ato fakaoti e au a lautolu.
38 To fakatu e au haku a nofoaiki i Elama, ti fakaoti ai e au ke he mena ia e patuiki mo e tau iki, kua pihia mai a Iehova.
39 Ka e hoko atu ke he tau aho a mui, ti liuaki mai ai e au e paeaaga a Elama, kua pihia mai a Iehova.