Ieremia 50:1-46
50 KO e kupu ne vagahau mai ai a Iehova ki Papelonia mo e motu ko Kaletaia, ia Ieremia ko e perofeta.
2 Kia talahau atu a e mutolu ke he tau motu mo e fakailoa atu ai; kia nikiti ki luga foki e matini; kia fakailoa atu ā, aua neke fufu; kia pehe atu ā mutolu, Kua fofo a Papelonia, kua fakama a Pele, kua matakutaku ai a Merotaka; kua fakamā hana tau tupua, kua matakutaku hana tau tupua.
3 Ha kua hake mai e motu he fahi tokelau ke tau mo ia, to eke e ia hana kelekele mo mena kua moumou, ti nakai nofo ai taha; kua fehola a lautolu ko e tau tagata mo e tau manu, kua o a lautolu.
4 Ko e tau aho ia, mo e vaha ia, kua pehe mai a Iehova, to o mai ai e fanau a Isaraela, ko lautolu fakalataha mo e fanau a Iuta, to o ai a lautolu mo e tagi, mo e kumi e lautolu a Iehova ha lautolu a Atua.
5 To huhu a lautolu ke he puhala ki Siona mo e tau mata ha lautolu kua haga mai ki hinai, kua pehe, Kia o mai a, kia fakalataha a tautolu mo Iehova ke he maveheaga tukulagi, nakai nimo.
6 Ko e haku a motu ko e fuifui mamoe kua hehe, kua hehe a lautolu; kua fakahehe a lautolu he tau leveki ha lautolu; ne fakaliliu kehe e lautolu a lautolu ke he atu mouga; kua o fano a lautolu ke he taha mouga mo e taha mouga, kua nimo ia lautolu ha lautolu a mena ke tatakoto ai.
7 Kua kai a lautolu e lautolu oti ne moua a lautolu; ne pehe age foki a lautolu ne favale age kia lautolu, Nakai nonofo a mautolu mo e kelea, ha kua hala a lautolu kia Iehova, ko e mena kua nofo ai e mahani tututonu, ko Iehova, ko e amaamanaki he tau matua ha lautolu.
8 Kia fehola a mai loto a Papelonia, mo e o atu a he kelekele a Kaletaia; kia eke a mutolu ke tuga ne tau koti tane ki mua he fuifui.
9 Ha ko e mena, kitiala, to fakaohooho e au, mo e ta hake ai e au e fakapotopotoaga he tau motu lalahi mai he motu ke he fahi tokelau, ke tau mo Papelonia; ti tatanaki atu a lautolu ke tau mo ia; to fofo foki a ia mai he mena na; to eke ha lautolu a tau fana ke tuga ne tau fana he toa iloilo; nakai ni liliu noa mai.
10 To eke foki a Kaletaia mo mena ne fofo he tau, to mamakona ai a lautolu ne fofo hana tau mena, kua pihia mai a Iehova.
11 Ha kua fiafia a mutolu, ha kua olioli a mutolu, ko mutolu ne fofo haku a tufaaga; ha kua hopohopo a mutolu tuga he povi fifine ne taholi e tau saito, mo e tagi a mutolu tuga ne tau solofanua malolo;
12 To mā lahi ni ha mutolu a matua fifine, to mā a ia ne fanau a mutolu; kitiala, to eke a ia mo muikau he tau motu, ko e tutakale, ko e motu nakai fai vai, ko e motu talue.
13 Nakai kakai a ia ha ko e ita a Iehova, ka e eke oti ni mo tau mena kua moumou; ti ofo takitaha a lautolu oti ne o age ki Papelonia, mo e fakakatakatakē ke he hana tau malaia oti.
14 Kia tatanaki atu a mutolu ke tau mo Papelonia ke he hana tau fahi oti; ko mutolu oti kua loloku e tau kaufana, kia fana atu a kia ia, aua neke toka e tau fana; ha kua hala a ia kia Iehova.
15 Kia kalaga takai a mutolu kia ia, kua tuku mai e ia hana tau lima; kua veveli hana tau fakaveaga, kua ulu moumou hana tau kaupa; ha ko e taui a Iehova hanai; kia lalago au a mutolu kia ia; tuga he eke e ia, kia eke pihia e mutolu kia ia.
16 Kia vevehe kehe mo Papelonia a ia ne gana e tau fua saito, katoa foki mo ia ne toto e helesaito ke he vaha ke helehele ai e tau saito; kia takitaha a lautolu mo e liu ke he hana motu, kia takitaha foki a lautolu mo e hola ke he hana kelekele, mai mua he pule favale.
17 Ko Isaraela ko e mamoe a ia he fuifui kua fakamavehevehe; ne vega he tau leona a ia; ko e fakamua, ne kai he patuiki a Asuria a ia; ka ko e fakamui, ko e patuiki nai a Papelonia ko Nepukanesa, kua gutiguti e ia hana tau hui atua.
18 Ko e mena ia kua pehe mai e vagahau a Iehova Sapaota, ko e Atua a Isaraela. Kitiala, to taui atu e au ke he patuiki a Papelonia mo e hana motu, tuga he taui atu e au ke he patuiki a Asuria.
19 To liuaki e au a Isaraela ke he mena ne nofo ai a ia; to kai ai e ia i Karamelu mo Vasana, to makona foki a ia ke he mouga ko Efaraimo mo Kiliata.
20 Ko e tau aho ia, mo e vaha ia, kua pehe mai a Iehova, to kumi e mahani kelea a Isaraela, ka e nakai ha i ai; to kumi foki e tau hala a Iuta ka e nakai moua; ha kua fakamagalo atu e au kia lautolu ne toka e au, mo tau tagata ne toe.
21 Kia hake a ke he motu ko Merataima ke tau mo ia, mo lautolu kua nonofo i Pekota; kia kelipopo mo e fakotioti ai a lautolu kua mumui atu kia lautolu, kua pihia mai a Iehova; kia eke foki e koe ki ai ke lata mo e tau mena oti ne poaki atu ai e au kia koe.
22 Ha ha i ai ke he motu e tomumu he tau mo e ulu moumou lahi ni.
23 Oi te! kua fati mo e malipilipi e hamala he lalolagi oti. Oi te! kua eke a Papelonia mo mena ke ofo ai ke he atu motu
24 Papelonia na e, kua tuku e au e hele māu, kua moua ai a koe, ka e nakai iloa e koe; kua moua a koe, kua tapaki foki a koe, ha kua tau a koe kia Iehova.
25 Kua vevete e Iehova hana mena ne toka ai e tau kanavaakau, kua ta mai ai e ia e tau kanavaakau he hana ita; ha kua fai gahua ke eke he Iki, ko Iehova Sapaota, ke he motu he tau tagata Kaletaia.
26 Kia o mai a kia ia mai he fahi mamao, kia vevete a hana tau fale ne tatanaki ai e tau mena kai; kia fakatumutumu e mutolu a ia tuga ne tau tumutumu saito, mo e fakaotioti ni a ia, aua neke toe ha mena ia ia.
27 Kia kelipopo ā hana tau povi tane oti, kia o hifo a lautolu ke kelipopo; oi te fakaalofa kia lautolu! ha kua hoko mai ha lautolu a aho, ko e vaha ke taui ai kia lautolu.
28 Ko e leo ha lautolu kua fehola, mo lautolu kua hao mai he motu ko Papelonia, ke talahau atu i Siona e lalago a Iehova ha tautolu a Atua, ko e lalago ha ko e hana faituga.
29 Kia fakapotopoto mai e tau tagata fana ke tau mo Papelonia, ko lautolu oti kua loloku e kaufana; kia hē api takai a mutolu kia ia, aua neke hao taha; kia taui atu e mutolu kia ia ke lata mo e hana tau gahua; ke tuga ne tau mena oti ne eke e ia, kia eke pihia e mutolu kia ia; ha kua fakatokoluga a ia kia Iehova, ko ia ne Tapu i Isaraela.
30 Ko e mena ia to veveli ai hana tau fuata ke he hana tau male, to mamate ai foki ke he aho ia hana tau tagata tau oti, kua pihia mai a Iehova.
31 Ko koe na kua fakatokoluga, kitiala, to eke e au a koe mo fi haku, kua pihia mai e Iki, ko Iehova Sapaota; ha kua hoko mai e aho hau, ko e vaha ke taui ai e au kia koe.
32 To tupetupe mo e veli a ia ne fakatokoluga, ti nakai ha ha i ai taha ke fakamatike aki a ia; to tafu e au e afi ke he hana tau maga, ti oti ai ni he vela hana tau fahi oti.
33 Kua pehe mai e vagahau a Iehova Sapaota, Ne pehia he favale fakalataha e fanau a Isaraela mo e fanau a Iuta; ko lautolu oti ne uta a lautolu mo tau tagata ne fofo he tau, ne taofi e lautolu a lautolu; nakai mafai a lautolu ke toka a lautolu ke o.
34 Kua malolo a ia ne laveaki a lautolu, ko Iehova Sapaota ko e hana higoa haia; to eke fakalahi e ia ha lautolu a fetoko, kia fakanofo ai e ia e lalolagi mo e mafola, kia fakavivivivi foki e ia a lautolu kua nonofo i Papelonia.
35 Kua pehe mai a Iehova, kua hoko e pelu ke he tau tagata Kaletaia, mo lautolu ne nonofo i Papelonia, mo e hana tau iki mo e hana tau tagata pulotu.
36 Ko e pelu ke hoko ke he tau tagata pikopiko ti goagoa ai a lautolu; ko e pelu ke hoko ke he hana tau toa ti matakutaku ai a lautolu.
37 Ko e pelu ke hoko ke he hana tau solofanua, mo e hana tau kariota, mo e tau tagata kehekehe oti ha ha i loto ia ia, ti eke a lautolu mo tau fifine; ko e pelu ke hoko ke he hana tau koloa, ti fofo he tau e tau mena ia.
38 To hoko e vevela ke he hana tau vai ti mamiti ai; ha ko e motu ni a ia he tau tupua kua ta, kua heketia a lautolu ke he tau mena matakutakuina.
39 Ko e mena ia to nonofo ai e tau manu favale he vao, fakalataha mo e tau luko, to nonofo ai foki e tau iaena; nakai liu kakai ai tukulagi; nakai ni nofo ai taha ke hahau mo hahau.
40 Tuga he momou he Atua a Sotoma mo Komora, mo e tau maga ne katofia mo lautolu, kua pehe mai a Iehova, to nakai nofo ai taha, to nakai api ai foki ha tama he tagata.
41 Kitiala, kua o mai e motu mai he fahi tokelau, ko e motu lahi; to fakaohooho ai foki e tau patuiki tokologa mai he motuaga he lalolagi.
42 Kua toto e lautolu e tau kaufana mo e tau tao; kua favale a lautolu, mo e nakai fai fakaalofa a lautolu; kua tomumu e leo ha lautolu tuga ne tahi; kua heke solofanua a lautolu; kua takitaha a lautolu mo e tauteute tuga ne tau tagata tau kia tau a lautolu mo koe, ko e tamafifine a Papelonia na e.
43 Ne logona he patuiki a Papelonia e tala kia lautolu, ti lolelole ai hana tau lima; ti moua a ia he matematekelea, ko e mamahi foki tuga ne mamahi ke fanau he fifine.
44 Kitiala, to hake a ia tuga ne leona mai he fulufuluola a Ioritana ke he mena mau ke nofo ai; ha ko e mena to fakaohooho fakalutukia e au a lautolu ke o kehe fakaave a lautolu ia ia; ko hai foki e tagata kua fifili, to kotofa e au a ia ke pule kia ia; ha ko hai kia ke tatai mo au? ko hai foki ke kotofa e tau aho kia au? ko hai foki e leveki mamoe na, kua maeke ke tu mai ki mua haku?
45 Ko e mena ia ke fanogonogo mai a mutolu ke he pule a Iehova kua pule ai a ia ki Papelonia, mo e hana tau manamanatuaga kua manamanatu ai e ia ke kelea ai e motu ko Kaletaia, Ko e moli to toho kehe e lautolu a lautolu, ko lautolu ne mua he ikiiki he fuifui mamoe; ko e moli, to eke e ia ha lautolu a tau mena ne nonofo ai mo tau mena kua moumou.
46 Ko e tomumu he moua ai a Papelonia, kua luelue ai e lalolagi, ti logona ai e tagi ke he tau motu kehe.