Ieremia 51:1-64
51 KUA vagahau mai pehe a Iehova, Kitiala, to fakaagi e au e matagi ki Papelonia ke moumou ai, katoa foki mo lautolu oti kua nonofo ai ko lautolu ne tutu mai kia au.
2 To fakafano atu e au e tau tagata kehe ki Papelonia, ti fakahavili e lautolu a ia, tuga he fakahavili e tau fua saito, mo e liligi e lautolu hana motu ke maha; ha ko e mena to tau a lautolu mo ia ke he tau fahi oti ke he aho ke malaia ai a ia.
3 Kia loloku he tagata fana hana kaufana ke fana atu kia ia kua loloku mai hana kaufana, mo ia kua hula ai ke he hana tapulu tau lapatoa; ti aua neke fakahao hana tau fuata, kia fakaotioti a hana kau oti ni.
4 To veveli a lautolu ne keli ke he motu he tau tagata Kaletaia, mo lautolu ne hokaia ti ati to veveli ke he hana tau puhala.
5 Ha ko e mena pete he puke ha lautolu a motu ke he hala kia ia ne Tapu i Isaraela, nakai tiaki a Isaraela, po ko Iuta he ha lautolu a Atua, ko Iehova Sapaota.
6 Kia fehola a mutolu mai loto a Papelonia, kia takitaha e tagata mo e fakahao hana moui; aua neke mamate a mutolu ke he hana tau hala; ha ko e vaha nai ke lalago ai e Iehova; to taui atu ai kia ia hana taui.
7 Ko Papelonia ko e kapiniu auro haia ke he lima a Iehova, ne konahia ai e lalolagi oti; ne inu e tau motu ke he hana uaina; ko e mena ia kua goagoa ai e tau motu.
8 Kua veli fakalutukia a Papelonia, kua malipilipi a ia; kia tagi fekapai a mutolu ha ko ia; kia uta a e pili pasama ke he hana mamahi, po ke malolo nakai a ia.
9 Ne taute e tautolu a Papelonia ke malolo ai, ka e nakai malolo a ia, kia tiaki e tautolu a ia, ti takitaha a tautolu mo e fano ke he hana a motu; ha kua hoko atu hana fakahala ke he lagi, kua tokoluga ke hoko ke he tau aolagi.
10 Kua fakakite e Iehova ha tautolu a mahani tututonu; kia o mai a, kia talahau ai e tautolu i Siona e gahua a Iehova ha tautolu a Atua.
11 Kia kana e mutolu e tau fana ke kikila; kia toto a e tau akau punuti ke mau; kua fakaohooho e Iehova e tau loto he tau patuiki a Metai; ha ko e hana finagalo ke tau a lautolu mo Papelonia, ke fakaoti ai a ia; ha ko e lalago a Iehova hanai, ko e lalago ni ha ko e hana faituga.
12 Kia nikiti a ki luga e matini ke he tau kaupa a Papelonia, kia fakamalolo ai e kau leoleo, kia kotofa tau leoleo, kia kotofa a e kau ke tatao ai; ha kua finagalo ni a Iehova, ti eke ai e ia e tau mena ne vagahau mai e ia kia lautolu kua nonofo i Papelonia.
13 Ko koe na kua nofo ki luga he tau vai loga, kua loga ai e tau koloa, kua hoko mai hau a fakahikuaga, ko e fafati he hau a velevelemena.
14 Kua omonuo e Iehova Sapaota kia ia ni, kua pehe, Ko e moli, to fakapuke e au a koe ke he tau tagata, tuga ne tau hē aleki to kalaga atu a lautolu kia koe.
15 Ne eke e ia e lalolagi ke he hana malolo, ne fakatumau e ia e atu motu ke he hana iloilo, ne fofola foki e ia e lagi ke he hana pulotu.
16 Kua vagahau mai hana leo ti ha i ai e go he tau vai ke he lagi; kua ta hake foki e ia e tau aolu mai he tau kala he lalolagi, kua eke e ia e uhila katoa mo e uha; kua ta mai e ia e matagi mai he hana tau fale koloa.
17 Kua takitaha e tagata mo e goagoa a lautolu oti, nakai fai iloilo a lautolu; kua takitaha foki e tufuga eke mena auro, mo e fakamā ai ha ko e hana tupua kua tā; ha ko e mena fakavai ha lautolu a tau tupua auro, nakai ha ha ia lautolu ha fafagu.
18 Ko e tau mena nakai aoga ia, ko e gahua ke va ki ai; to fakaoti a lautolu ke he vaha ke ahi atu ai a lautolu.
19 Nakai tuga e tau mena na e tufaaga a Iakopo; ha ko ia ni ne eke e tau mena oti; ko e magafaoa foki he hana tufaaga ko Isaraela haia; ko Iehova Sapaota ko e hana higoa haia.
20 Ko koe ko e haku a katoua mo e tau kanavaakau ke tau ai; ko koe ke tuki malipilipi ai e au e tau motu, ko koe foki ke fakaoti ai e au e tau kautu;
21 Ko koe foki ke tuki malipilipi ai e au e solofanua mo ia kua heke ai; ko koe foki ke tuki malipilipi ai e au e kariota mo ia kua heke ai;
22 Ko koe foki ke tuki malipilipi ai e au e tane mo e fifine; ko koe foki ke tuki malipilipi ai e au e fuakau mo e tama tote; ko koe foki ke tuki malipilipi ai e fuata mo e tamāfine tote;
23 Ko koe foki ke tuki malipilipi ai e au e leveki mamoe mo e hana fuifui; ko koe foki ke tuki malipilipi ai e au e tau takitaki mo e tau pule.
24 To taui atu foki e au ki Papelonia, mo lautolu oti kua nonofo i Kaletaia, e tau mahani kelea oti ha lautolu ne eke e lautolu i Siona ki mua ha mautolu, kua pihia mai a Iehova,
25 Kua pehe mai a Iehova, Kitiala, to eke e au a koe mo fi haku, ko koe na, ko e mouga kua fakaoti ai; kua fakaoti ai e lalolagi oti; to fakaolo atu e au haku a lima ki luga hau, mo e fuluhi hifo e au a koe mai he maka tumau, mo e eke e au a koe mo mouga kua vela.
26 Ti nakai uta e lautolu ia koe ha maka ke eke mo malokuaga, po ke maka ke eke mo fakaveaga; ha ko e mena to eke a koe mo tau mena kua moumou tukulagi, kua pihia mai a Iehova.
27 Kia nikiti ki luga e mutolu e matini ke he lalolagi, kia ulo a e pu ke he tau motu, kia tauteute e mutolu e tau motu ke tau mo ia, kia ui atu e mutolu ke he tau kautu ko Ararata, mo Meni, mo Asekenaso ke o mai ke tau mo ia; mo e kotofa e iki ke pule ke he tau kau ke tau mo ia; kia o hake foki e tau solofanua ke tuga ne tau hē aleki fulufulu.
28 Kia tauteute a e tau motu ke tau mo ia, ko e tau patuiki a Metai, mo e hana tau takitaki, mo e hana tau pule oti, mo e motu oti kua pule a ia ki ai.
29 Kua vivivivi e kelekele mo e mamahi ai; ha kua tumau e pule a Iehova ki Papelonia; to eke e motu ko Papelonia mo tau mena kua moumou, to nakai nofo ai taha.
30 Kua tiaki he tau toa i Papelonia e tau, kua nonofo a lautolu ke he tau taue; kua mole atu ha lautolu a malolo; kua eke a lautolu mo tau fifine; kua huhunu hana tau mena ke nonofo ai; kua fatifati hana tau fakamau fakalava.
31 To poi e tagata mafiti ke fonofono e tagata mafiti, ko e tagata uta ogo foki to fonofono a ia e tagata uta ogo, ke tala age ai ke he patuiki a Papelonia kua fofo hana maga ke he tau fahi oti.
32 Kua moua foki e tau hala, kua huhunu e tau kaho ke he afi, kua fakaatukehe e tau tagata tau.
33 Ha kua pehe mai e vagahau a Iehova Sapaota, ko e Atua a Isaraela, Ko e tama fifine a Papelonia kua tuga ne mena taholi saito a ia ke he vaha ne taholi ai; toe tote, ti hoko kia ia e vaha ke helehele ai e tau saito.
34 Kua kai he patuiki a Papelonia ko Nepukanesa au, kua fakaoti e ia au, kua eke e ia au mo kapiniu kua nakai toka ai ha mena, kua folo e ia au tuga ne tanimo; kua fakapuke e ia hana manava ke he haku a tau mena fakafiafia; kua vega kehe e ia au.
35 Kua pehe age a ia kua nofo i Siona, Ko e favale mai kia au mo e haku a tino, kia ha ha i luga ia Papelonia haia; kua pehe age foki a Ierusalema, Kia ha ha i luga ia lautolu kua nonofo i Kaletaia haku a toto.
36 Ko e mena ia kua pehe mai e vagahau a Iehova, Kitiala, to eke ni e au hau a taufetoko, to lalago atu e au ha ko koe; to fakamaha e au hana vai, mo e fakamamiti ai e au hana vai puna.
37 To eke foki a Papelonia mo tau tatanakiaga maka, ko e mena ke ofaga ai e tau luko, ko e mena foki ke ofo ai, mo mena foki ke fakakatakatakē ai, to nakai nofo ai foki taha.
38 To tagi fakalataha a lautolu tuga ne tau leona, to leo lahi foki a lautolu tuga ne tau punua leona.
39 To taute e au ha lautolu a galue ka vevela a lautolu; ti fakainu e au a lautolu ke konahia, kia olioli a lautolu, mo e momohe a lautolu ke he mohe tukulagi, mo e nakai ala a lautolu, kua pihia mai a Iehova.
40 To ta hifo e au a lautolu tuga ne tau punua mamoe ke tamate, ke tuga foki e tau mamoe tane mo e tau koti tane.
41 Oi te! kua fofo tuai a Sisaka; kua moua a ia ne fakaheke ki ai e lalolagi oti. Oi te! kua eke tuai a Papelonia mo mena ke ofo ai e tau motu.
42 Kua hake e vai ki luga a Papelonia; kua ufia a ia he tau peau loga hana.
43 Kua eke hana tau maga mo tau mena kua moumou, ko e motu nakai fai vai, mo e motu talue; ko e motu nakai nofo ai ha tagata, to nakai fina age ai foki e tama he tagata.
44 To taui atu e au kia Pele i Papelonia; to toho mai e au he gutu hana e mena ne fofo ai e ia; to nakai tuai tafe atu kia ia e tau motu; ko e moli, to malŏlŏ foki e kaupa a Papelonia.
45 Haku motu na e, kia o kehe a a mutolu mai loto ia ia, mo e takitaha a mutolu mo e fakahao hana moui mai he ita lahi a Iehova.
46 Aua neke fakalolelole ha mutolu a tau loto, ti ua matakutaku a mutolu ha ko e ogo kua logona ai e mutolu ke he motu; ha ko e mena to hau e ogo ke he taha tau, to ha i ai foki e favale ke he motu, kua taufetoko ai e taha pule mo e taha pule.
47 Ko e mena ia kitiala, to hoko mai ai e tau aho ke taui atu ai e au ke he tau tupua kua ta i Papelonia; ti ma ai hana motu oti; to veveli foki i loto ia ia hana tau tagata oti kua keli.
48 Ti kalaga fiafia ai e lagi, mo e lalolagi, mo e tau mena oti ha ha i ai, ha ko Papelonia; ha ko e mena to o mai kia ia e tau tagata he fahi tokelau ke moumou ai, kua pihia mai a Iehova.
49 To veli ni a Papelonia, ko mutolu ko e tau tagata Isaraela kua kelipopo; to veveli foki fakalataha mo Papelonia e tau tagata ne kelipopo ke he tau motu oti.
50 Ko mutolu kua hao mai he pelu, kia o ā mutolu, aua neke tutu a mutolu; kia manatu e mutolu a Iehova mai he motu mamao; kia manamanatu foki a mutolu ki Ierusalema.
51 Kua ma a mautolu, ha kua logona e mautolu e ekefakakelea; kua ufiufi ha mautolu a tau mata he ma; ha kua huhu atu e tau tagata kehe ke he tau mena tapu he fale a Iehova.
52 Ko e mena ia kitiala, kua pehe mai a Iehova, to hoko mai e vaha, ke taui atu e au ke he hana tau tupua kua ta, to tauoi ai foki e tau tagata kua kafokia ke he hana motu oti.
53 Pete he hake a Papelonia ke he lagi, pete ni he taute foki e ia e taue ke he mena tokoluga ke malolo ai a ia, ka e o atu ia au kia ia e tau tagata ke moumou, kua pihia mai a Iehova.
54 Ko e leo he tagi mai Papelonia, mo e lipilipi lahi mai he motu he tau tagata Kaletaia!
55 Ha kua moumou e Iehova a Papelonia, mo e fakaoti e ia e leo lahi mai ia ia; kua gu mai hana tau peau tuga ne tau vai loga, kua go mai ha lautolu a leo;
56 Ha kua hoko kia ia, ki Papelonia ni, e tagata ke moumou, ha kua tapaki hana tau toa kua fatifati ha lautolu a tau kaufana; ha ko Iehova ko e Atua a ia ke taui atu, to taui atu fakalahi e ia.
57 To fakainu e au hana tau iki ke konahia, mo e hana tau tagata iloilo, mo e hana tau takitaki, mo e hana tau pule, mo e hana tau toa; ti momohe a lautolu ke he mohe tukulagi ti nakai ala a lautolu, kua pihia mai e patuiki, ko Iehova Sapaota, ko e hana higoa haia.
58 Kua pehe mai e vagahau a Iehova Sapaota, To ulu ni ki lalo e tau kaupa laulahi a Papelonia to huhunu ke he afi hana tau gutuhala tokoluga; ko e tau motu to gahua teao a lautolu, ko e tau tagata foki to gahua a lautolu ma e afi, ti mategugu ai a lautolu,
59 Ko e kupu ne poaki atu ai he perofeta ko Ieremia kia Seraia ko e tama a Neria, ko e tama a Mahasaia, he fano a ia fakalataha mo e patuiki a Iuta ko Setekaia ki Papelonia, ke he tau fa hana he eke mo Patuiki. Ko Seraia foki ko e iki ne pule ke he tau mena ke api ai e fenoga haia.
60 Ne tohi e Ieremia ke he taha tohi e malaia oti ko e hoko ha ne fai ki Papelonia, ko e tau kupu oti na kua tohia ki Papelonia.
61 Ti pehe atu a Ieremia kia Seraia, ka hoko a koe ki Papelonia, mo e kitia, mo e totou ai e koe e tau kupu oti nai,
62 Ti pehe atu a koe, Iehova na e, kua vagahau mai e koe ke he mena nai ke fakaoti ai, ke aua neke nofo ai taha, ko e tagata po ke manu, ka e eke ai mo tau mena kua moumou tukulagi.
63 Ka oti foki he totou e koe e tohi nai, ti pipi e koe e maka ki ai, mo e liti ai e koe ki loto a Eufirate;
64 Ti pehe atu a koe,To tomo pihia a Papelonia, mo e nakai mafuta mai he malaia ke fakahoko ai e au ki luga hana; to mategugu foki a lautolu. Ti hiku ai e tau kupu a Ieremia.