Ieremia 8:1-22
8 KUA pehe mai a Iehova, Ko e vaha ia to ta mai ai e tau hui atua he tau patuiki a Iuta, mo e tau hui atua he hana tau iki, mo e tau hui atua he tau ekepoa, mo e tau hui atua he tau perofeta, mo e tau hui atua ha lautolu ne nonofo i Ierusalema he tau tukuaga ha lautolu.
2 Ti tolo ai e lautolu ke he la, mo e mahina mo e kau oti he lagi, ko e tau mena ne loto a lautolu ki ai, mo e fekafekau a lautolu ki ai, mo e mumui atu a lautolu ki ai, mo e kumi ki ai e lautolu, mo e fakaveveli fakafohifo a lautolu ki ai; nakai fakapotopoto ai e tau hui atua ti nakai tanu; ka e eke ni mo otaota ki luga he kelekele.
3 To mua he fia mate ke he fia moui ha lautolu oti ne toe, ko lautolu ne toe he magafaoa mahani kelea nai, ko lautolu ne toe ke he tau mena oti ne vega e au a lautolu ki ai, kua pihia mai a Iehova Sapaota.
4 Kia pehe atu foki a koe kia lautolu, Kua vagahau mai pehe a Iehova, Kaeke ke veveli e tau tagata nakai kia liliu tutu a lautolu? Ke fano kehe kia taha, ti nakai kia liu mai a ia?
5 Ti kua liliu kehe he ha e motu nai ko Ierusalema mo e liliu kehe fakaoti? ne taofi e lautolu e tau mena fakavai ke mau, ti nakai mafai a lautolu ke liliu mai.
6 Ne hagao atu au, mo e fanogonogo atu; ka e nakai vagahau mai mo e fakamoli a lautolu; nakai fai tagata kua tokihala he hana tau mahani kelea, kua pehe mai ko e heigoa e mena kua eke e au? Kua takitaha a lautolu mo e liliu atu ke he ha lautolu a tau mena ke tafepoi ai, tuga ne oho atu e solofanua ke he tau.
7 Kua iloa ni he kasita he pulagi hana ni a vaha; ko e kulukulu foki, mo e pekapeka, mo e akuru, kua taofi e lautolu e vaha ke o mai ai a lautolu; ka e nakai iloa he motu haku e fakafiliaga a Iehova.
8 Po ke pehe mai fefe a mutolu, Kua iloilo a mautolu, ha ha ia mautolu foki e fakatufono a Iehova? Kitiala, ko e moli, ko e tau peni pikopiko he tau tohikupu kua eke ia mo pikopiko.
9 Kua fakamā ai e tau tagata iloilo, kua matakutaku a lautolu, mo e moua; kitiala, kua tiaki e lautolu e kupu a Iehova; ti heigoa kia e iloilo ha ha ia lautolu?
10 Ko e mena ia to age e au e tau hoana ha lautolu ke he falu, mo e tau fonua ha lautolu kia lautolu kua eke ai ma lautolu; ha ko e tau lalo tagata katoa mo e tau iki kua velevelemena e lautolu oti, ko e tau perofeta katoa mo e tau ekepoa kua mahani fakavai a lautolu oti kana.
11 Ne fakamaulu fakateaga e lautolu e kafokia he tama fifine he haku a motu, kua pehe age, Kua monuina, kua monuina; ka e nakai fai monuina.
12 Ne ma nakai a lautolu ha ko e tau mena vihiatia ne eke e lautolu? Nakai ni mā a lautolu, nakai fakai ke iloa e lautolu e mā; ko e mena ia ke veveli ai a lautolu fakalataha mo lautolu ne veveli; ko e vaha ke ahi atu e au a lautolu to tupetupe ai a lautolu, kua pihia mai ai a Iehova.
13 Kua pehe mai a Iehova, to fakaotioti ni e au a lautolu; to nakai ni fai fuhi vine ke he tau vine, ti nakai fai fua mati ke he tau mati, to fifigo foki e tau lau; ko e tau mena foki ne foaki atu ai e au kia lautolu to mole kehe ia ia lautolu.
14 Kua nonofo noa a tautolu he ha? Kia fakapotopoto ā mutolu, ti o atu a tautolu ke he tau maga kua nonofo taue mo e fakamamate ai a tautolu ke he tau mena ia; ha ko Iehova ha tautolu a Atua kua fakamamate ai a tautolu, ti fakainu ai e ia a tautolu ke he vai kona, ha kua hala a tautolu kia Iehova.
15 Ne tatali a tautolu ke he monuina, ka e nakai moua ai ha mitaki; ne tatali foki a tautolu ke he vaha ke fakamalolo ai, ti kitiala, ko e matakutaku.
16 Kua logona mai i Tano e fagu he hana tau solofanua; ko e leo he tagi he hana tau solofanua malolo kua vivivivi ai e fuga kelekele oti; kua hohoko mai foki a lautolu, ti fakaoti ai e lautolu e motu mo e tau mena ne puke ai, ko e tau maga foki, mo lautolu ne nonofo ai.
17 Ka ko e mena kitiala, to fakafano atu e au kia mutolu e tau gata ko e tau gata gagau, nakai maeke ke fakavai a lautolu; ti gagau e lautolu a mutolu, kua pihia mai a Iehova.
18 Kua eke haku a fiafia mo mānu i loto ia au, kua lolelole haku loto i loto ia au.
19 Kitiala, ko e leo he tagi he tama fifine he haku a motu mai he motu mamao. Nakai kia ha i Siona a Iehova? nakai kia ha ha i ai hana patuiki? Ko e heigoa kia e mena kua fakahogohogomanava mai a lautolu kia au ke he ha lautolu a tau tupua kua ta, mo e tau mena kehe kua fakateaga.
20 Kua mole atu e vaha ke helehele ai e tau saito, kua oti e tau mafana ka e nakai fakamomoui a tautolu.
21 Kua malipilipi haku loto ha kua tuki malipilipili e tamafine he haku a motu; kua mānu au; kua moua au he fakaatukehe.
22 Nakai kia fai pili pasama i Kiliata? nakai kia ha ha i ai ha ekekafo? Ti ko e ha kua nakai fakamalolo ai e tama fifine he haku a motu.