Ioane 1:1-51
1 HA he kamataaga e Loko, ha he Atua e Loko, ko e Atua foki e Loko.
2 Ko ia ni ha he Atua ke he kamataaga.
3 Ne eke e ia e tau mena oti kana; nakai fakai foki ha mena taha ne eke, nakai eke e ia.
4 Ha ha ia ia e moui; ko e moui foki, ko e maama haia he tau tagata.
5 Kua kikila mai foki e maama ke he pouli, ka e nakai talia he pouli.
6 Kua fakafano mai mai he Atua e taha tagata, ko Ioane hana higoa.
7 Kua hau a ia ko e ogo kia talahau e ia e maama, kia talia he tau tagata oti kana ha ko ia.
8 Nakai ko e maama a ia ni, ka e ha i ai a ia kia talahau ai e maama ia ni.
9 Ko e maama moli kua fakamaama aki e tau tagata oti kana, ne haele mai a ia ke he lalolagi.
10 Ha he lalolagi a ia, ne eke foki e ia e lalolagi; ka e nakai ni iloa a ia he lalolagi.
11 Kua haele mai a ia ke he hana tau tagata ka e nakai talia a ia he hana tau tagata.
12 Ka ko lautolu oti ne talia a ia, mo e tua ke he hana higoa, ne age e ia ki ai e pule kia eke a lautolu mo fanau he Atua.
13 Ko lautolu, nakai ko e toto ne fanau ai, ti nakai ko e manako foki he tino, ti nakai ko e loto foki he tagata, ka ko e Atua ni.
14 Kua faliu tino tagata e Loko, ne nofo foki a ia fakalataha mo tautolu, (ne kitekite a mautolu ke he hana lilifu; ko e lilifu haia he Tama fuataha he Matua,) kua puke ke he fakaalofa noa mo e fakamoli.
15 Kua talahau e Ioane a ia, mo e ui age, kua pehe, Ko ia hanai ne tala atu ai e au, Ko ia ka mui mai kia au, kua mua a ia kia au, ha ko e mena ne mua tuai a ia kia au.
16 Kua moua e tautolu oti kana mai hana katoatoaga, ko e fakaalofa noa foki ke lafilafi ke he fakaalofa noa.
17 Ha ko e mena ne tuku mai e Mose e fakatufono, ka ko e fakaalofa noa mo e mena moli, mai ia Iesu Keriso ia.
18 Nakai fakai ni taha ne kitia e Atua; ko e Tama fuataha hokoia ha he fatafata he Matua, ko ia ne fakailoa mai a ia.
19 Ko e talahau hanai a Ioane ka kua fakafano atu he tau tagata Iutaia ni falu he tau ekepoa mo e magafaoa a Levi mai Ierusalema, kia hūhu atu a lautolu kia ia, Ko hai kia a koe?
20 Ti talahau fakatonu e ia, nakai fufu, ka kua talahau fakatonu mai, Nakai ko e Keriso au.
21 Ti hūhu atu a lautolu kia ia, Ti ko e heigoa? Ko Elia kia a koe? Ti pehe age a ia, Nakai ko au. Ko e perofeta kia a koe? Ti tala age a ia, Nakai.
22 Ati tala age a lautolu kia ia, Ko hai kia a koe? kia uta e mautolu e tonu kia lautolu ne fakafano mai a mautolu; ko heigoa kia hāu a talahau kia koe ni?
23 Ati pehe age ai a ia, Ko au ko e leo he taha ne ui ke he tutakale, Fakahako a e puhala he Iki, tuga ne talahau mai ai he perofeta ko Isaia.
24 Ko lautolu ne fakafano mai, ko e falu he tau farasaio a lautolu.
25 Ti hūhu a lautolu kia ia, mo e pehe age kia ia, Ti ko e heigoa e mena ne papatiso ai e koe, ka nakai ko e Keriso a koe, ti nakai ko Elia, ti nakai ko a perofeta ia?
26 Kua tala age a Ioane kia lautolu, kua pehe age, Kua papatiso e au ke he vai, ha ne tu mai e taha ke he vaha loto ha mutolu, nakai iloa e mutolu a ia;
27 Ko ia haia ne mui mai kia au, kua mua ni a ia kia au; nakai aoga au ke vevete e au e pipi he hana afialoalohui.
28 Ko e tau mena ia ne eke i Petapara, ke he fahi atu a Ioritana, ne papatiso ai e Ioane.
29 A pogipogi, kua kitia e Ioane a Iesu; ha ne haele mai kia ia, ti pehe age a ia, Kitiala, ko e Punua mamoe he Atua, ko ia ke uta kehe e hala he lalolagi.
30 Ko ia haia ne tala atu ai au, Ha ne mui mai kia au e tagata, kua mua ni kia au, ha ko e mena mua tuai a ia kia au.
31 Nakai iloa foki e au a ia; ka kia fakakite a ia kia Isaraela, ko e mena ia ne hau ai au ke papatiso ke he vai.
32 Kua talahau foki e Ioane, kua pehe, Ne kitia e au e Agaga ne hifo mai he lagi, tuga ne lupe, mo e nofo ki luga ia ia.
33 Ti nakai iloa e au a ia, ka ko ia ne fakafano mai au ke papatiso ke he vai, ko ia ne tala mai kia au, Ko ia ka kitia e koe e Agaga kua hifo ki ai, mo e nofo i luga ia ia, ko ia haia ni ke papatiso ke he Agaga Tapu.
34 Ti kua kitia tuai e au mo e talahau atu, ko ia ni ko e Tama he Atua.
35 A pogipogi, kua liu foki tu ai a Ioane mo e na tutaki hana;
36 Ti kitekite a ia kia Iesu, ha ne fina age, ti pehe mai a ia, Kitiala, ko e Punua mamoe he Atua.
37 Kua logona foki he tokoua a tutaki ke he hana ne tala age, ati mumui atu ai a laua kia Iesu.
38 Kua haga atu a Iesu, kua fioia e ia a laua ha ne mumui mai, ati tala age ai a ia kia laua, Ko heigoa ha mua ne kumi? Ti pehe mai a laua kia ia, Rapai na e! (ko e hana kakano ka fakamatala, Ko e akoako na e!) kua nofo a koe i fe?
39 Kua tala age a ia kia laua, Ati o mai a, mo e kikite ki ai. Kua o age a laua mo e kitekite ke he mena ne nofo ai a ia; ti nonofo a lautolu mo ia ke he aho ia, ha ko e magaaho tokai ko e hogofulu.
40 Ko Aneterea ko e matakainaga a Simona Peteru, ko e taha haia ia laua ne fanogonogo kia Ioane, mo e mui atu kia Iesu.
41 Kua moua fakamua e ia hana ni a matakainaga, ko Simona; ti tala age kia ia, Kua moua tuai e mautolu e Mesia, (ko e hana fakamatala ko e Keriso).
42 Ti uta e ia a ia kia Iesu; ne fioia e Iesu a ia, kua tala age, Ko Simona a koe, ko e tama a Iona, to ui a koe ko Kefa, (ko e hana fakamatala, ko Peteru).
43 A pogipogi, kua finagalo a Iesu ke haele ki Kalilaia. Kua fioia e ia a Filipo, ti tala age kia ia, Mui mai a kia au.
44 Ko e tagata Petesaita foki a Filipo; ko e maga haia a Aneterea mo Peteru.
45 Ne kitia e Filipo a Natanielu, ti tala age kia ia, Kua moua e mautolu a ia ne tohia e Mose ke he fakatufono, katoa mo e tau perofeta; ko Iesu haia, ko e tama a Iosefa, ko e Nasareta.
46 Kua pehe age a Natanielu kia ia, Maeke kia ke tupu ha mena mitaki mai Nasareta? Kua tala age a Filipo kia ia, Ati hau a, mo e kitekite.
47 Kua fioia e Iesu a Natanielu, ha ne hau kia ia, ti tala age kia ia, Kitiala, ko e Isaraela moli, nakai pikopiko a ia.
48 Kua tala age a Natanielu kia ia, ne fioia e koe au i fe? Kua tala age a Iesu, kua pehe age kia ia, Ne kitia e au a koe ke he lalo mati, ka e nakaila ui atu ni a Filipo kia koe.
49 Ati tala age ai a Natanielu, kua pehe age kia ia, Rapai na e, ko koe ni ko e Tama he Atua, ko koe ni ko e Patuiki a Isaraela.
50 Kua tala age a Iesu, kua pehe age kia ia, Kua talia kia e koe ha ko e mena tala atu e au kia koe, ne kitia e au a koe ke he lalo mati? to kitia e koe e tau mena ke mua ke he tau mena nai.
51 Kua tala age foki a ia kia ia, Ko e moli, ko e moli, ke tala atu e au kia mutolu nā, a taha aho to kitia ai e mutolu e lagi kua maihi mai; ko e tau agelu foki he Atua, ke o hake, mo e o hifo ki luga he Tama he tagata.