Ioane 12:1-50
12 KUA toe ono e aho to eke ai e paseka; ati haele atu ai a Iesu ki Petania, ha i ai a Lasalo ne mate, ne fakatu foki e ia ia lautolu kua mamate.
2 Ati taute ai e lautolu e kaiaga mena māna ke he mena ia; ti fekafekau ai a Mareta, ka ko Lasalo ko e taha a ia ia lautolu ne tatakoto ke kai mena fakalataha mo ia.
3 Ati toto ai e Maria e litara he lolo nato fakafua uka; ti tākai aki e ia e tau ve a Iesu, mo e holoholo hana tau ve ke he lauulu hana. Kua puke foki e fale ke he manogi he lolo.
4 Ati tala age ai e taha he hana tau tutaki, ko Iuta Isakariota ko e tama a Simona ko ia ke afo a ia,
5 Ko e ha nakai fakafua ai e lolo manogi ia ke he tolu geau e tenari, mo e age ke he tau nonofogati?
6 Nakai pihia age a ia, he fakaalofa ke he tau nonofogati, ka ko e kaiha a ia, ha ia ia foki e kato, kua uta foki e ia e tau mena ne fafao ai.
7 Ati pehe age ai a Iesu, Tokai a ia; kua toka e ia e mena nai ke leo aki e aho he tauteuteaga he haku a tanuaga.
8 Ha ko e mena nonofo mau a mutolu mo e tau nonofogati, ka ko au, nakai nofo mau au ia mutolu.
9 Kua iloa he moto tagata tokologa he tau Iutaia ha i ai a ia, ati o age ai a lautolu; nakai ko Iesu hokoia, ka kia kitia foki e lautolu a Lasalo, ne fakatu mai e ia ia lautolu ne mamate.
10 Ka kua pulepulega e tau ekepoa ne mua, ke kelipopo foki a Lasalo.
11 Ha ko e mena tokologa e tau tagata Iutaia ne o kehe ha ko ia, mo e tua a lautolu kia Iesu.
12 A pogipogi, kua fanogonogo ai he moto tagata tokologa ne o mai ke he galue, kua haele mai a Iesu ki Ierusalema.
13 Ati uta ai e lautolu e tau lau pama, ti o ke fonofono a ia; ti ui ai a lautolu, Hosana! Kia monuina a ia ne haele mai ke he higoa he Iki, ko e Patuiki a ia a Isaraela.
14 Kua moua e Iesu e punua asini, ati heke ai a ia, ke tuga he tohi,
15 Ua matakutaku a koe, ko e tama fifine na e a Siona; kitiala, kua haele mai hau a Patuiki, ha ne heke e punua asini.
16 Kua nakai iloa he hana tau tutaki e tau mena na ke he kamataaga; kua hoko a Iesu ke he hana lilifu, ati manatu ai na lautolu kua tohi e tau mena ia kia ia; kua eke foki e lautolu e tau mena ia kia ia.
17 Ati talahau ai he moto tagata ne nofo ai mo ia, he ui e ia a Lasalo mai he tukuaga, mo e fakatu mai a ia ia lautolu kua mamate.
18 Ko e mena ia ne fonofono ai a ia e moto tagata, he logona e lautolu ne eke e ia e fakamailoga ia.
19 Ati vagavagahau ai e tau farasaio, Nakai kia iloa e mutolu, kua nakai aoga taha mena ke eke e mutolu. Kitiala, kua mumui atu kia ia e lalolagi.
20 Ha i ai e falu a Heleni ia lautolu ne o hake ke tapuaki he galue.
21 Ti o age ai a lautolu kia Filipo, ko ia ko e Petesaita i Kalilaia, ti ole a lautolu kia ia, kua pehe age, Ko e iki na e kua fia kitia e mautolu a Iesu.
22 Kua fina age a Filipo mo e tala age kia Aneterea; ati tala age ai e Aneterea mo Filipo kia Iesu.
23 Ka e tala age a Iesu kia laua, kua pehe age, Kua hoko mai e vaha ke hoko ai e Tama he tagata ke he hana lilifu.
24 Ko e moli, ko e moli, ke tala atu e au kia mutolu, Kaeke kua nakai to e fua saito ke he kelekele mo e mate ai, ti tumau ni e mena taha; kaeke ke mate, ti fua mai ai e tau fua loga.
25 Ko e tagata ne fakahelehele hana moui, to moumou ai e ia; ka ko e tagata ne fakavihia hana moui ke he lalolagi nai, to taofi ai e ia kia hoko ke he moui tukulagi.
26 Ka fia fekafekau mai taha kia au, kia mui mai a ia kia au; ko e mena ke nofo ai au, ha ha i ai foki haku a fekafekau; ka fekafekau mai foki taha kia au, ti fakalilifu ai e Matua a ia.
27 Ha ne fakaatukehe nai hoku loto; to talahau e au ha ha? Ma Matua na e, fakamoui au mai he magala nai; ka ko e mena ia ne hoko mai ai au ke he magala nai.
28 Ma Matua na e, fakaheke a ke he hau a higoa. Ati hau ai e leo mai he lagi, Kua fakaheke au ki ai, ato liu foki fakaheke au kia ai.
29 Ati pehe age ai e moto tagata ne tutu mai mo e fanogonogo ki ai, Ha ha ne pakulagi; ka kua pehe age falu, Ne vagahau taha agelu kia ia.
30 Ti tala age ai a Iesu, kua pehe age, Nakai ko au ne hau ai e leo nei; ka ko mutolu.
31 Ha ne fakafili ainei e lalolagi nai; to vega ainei e iki he lalolagi nai.
32 Ko au foki ka ta hake au mai he kelekele, ti futiaki mai e au e tau tagata oti kia au.
33 Kua tala age e ia e kupu ia ke fakailoa ai e kakano he hana mate, ko e mate ai ha ne fai a ia.
34 Kua tala age e moto tagata kia ia, Kua fanogonogo a mautolu ke he fakatufono, to tumau muatua e Keriso tukulagi. Ti kua tala mai fefe e koe, Ke lata ai he ta hake e Tama he tagata? Ko hai kia e Tama nai he tagata?
35 Ati tala age ai a Iesu kia lautolu, Toe tote he ha i ai e maama ia mutolu; ati o fano a he toka ai e maama ia mutolu, neke moua a mutolu he pouli kikio; ko ia ke fano he pouli nakai kitia e ia e mena ke fano ki ai.
36 Kia talia e mutolu e maama he toka ai e maama ia mutolu, kia uta a mutolu mo fanau he maama. Kua tala age e Iesu e tau mena na, ati haele ai a ia kua fakamumuli kia lautolu.
37 Ne eke e ia e tau fakamailoga lalahi ki mua ha lautolu, ka e nakai talia e lautolu a ia,
38 Kia fakamoli ai e kupu he perofeta ko Isaia, ne pehe mai, Ko e Iki na e, ko hai kia kua talia ha mautolu a tala? Kua fakakite atu foki kia hai e lima he Iki?
39 Ko e mena ia nakai maeke foki e lautolu ke talia ha kua pehe mai foki a Isaia,
40 Kua fakapouli e ia ha lautolu a tau mata, mo e fakamao e ia ha lautolu a tau loto, neke kikite ha lautolu a tau mata, neke manamanatu ha lautolu a tau loto, neke fakamafoki mai foki a lautolu, mo e fakamalolo ai e au a lautolu.
41 Kua tala mai e Isaia e tau kupu na he kikite atu a ia ke he hana lilifu, mo e vagahau mai kia ia.
42 Ka e tokologa e tau iki ne tua kia ia, ka e nakai fakakite atu ai, ha ko e tau farasaio, neke vega a lautolu he sunako.
43 Ha ko e mena mua ha lautolu a manako ke he fakahekeaga mai he tau tagata, ka e tote e manako ke he fakahekeaga mai he Atua.
44 Kua ui atu foki a Iesu, mo e pehe atu, Ko e tagata ke tua mai kia au, nakai tua mai a ia kia au, ka ko ia ne fakafano mai au.
45 Ko e tagata foki kua kikite mai kia au, kua kikite atu a ia kia ia ne fakafano mai au.
46 Kua hau au ko e maama he lalolagi, kia nakai tumau muatua e pouli ke he taha ke tua mai kia au.
47 Kaeke foki ke fanogonogo taha ke he haku a tau kupu, ka e nakai talia ai, nakai fakahala e au a ia; ha ko e mena nakai hau au ke fakahala e lalolagi, ka kia fakamomoui e au e lalolagi.
48 Ko e tagata ke totoko mai kia au, mo e nakai talia e ia haku a tau kupu, ha ha ia ia taha ke fakahala a ia; ko e kupu ne vagahau atu e au ke fakahala aki a ia ke he aho fakamuiaki;
49 Ha ko e mena nakai vagahau noa au, hoko au; ka ko e Matua ne fakafano mai au, ko ia ni ne tuku mai kia au e poaki ke he tau mena ke tala atu ai e au, mo e tau mena ke vagahau ai e au.
50 Kua iloa foki e au ko e hana poaki ni ko e moui tukulagi haia. Ko e hanai, ko e tau mena kua vagahau e au, tuga ne tala mai ai e Matua kia au, ke pihia foki he vagahau e au.