Ioane 13:1-38
13 KA e nakala hoko ke he galue he paseka, kua fioia e Iesu kua hoko mai hana vaha kia tokai e ia e lalolagi nai, ka e fano ke he Matua; kua fakaalofa a ia ke he hana tau tagata ha he lalolagi, ti fakaalofa ni a ia kia lautolu kua hoko ke he fakaotiaga.
2 Kua eke e kaiaga mena ke he afiafi, ka kua tuku tuai he tiapolo e manatu ke he loto a Iuta Isakariota, ko e tama a Simona ke afo a ia;
3 Kua fioia e Iesu kua tuku he Matua e tau mena oti kana ke he hana tau lima, kua haele mai foki a ia mai he Atua, ko e liu atu foki ne fai ke he Atua;
4 Ti tu a ia ki luga ke he kaiaga mena, kua tuku kehe hana tau tapulu, kua toto e holoholo, kua pipi aki a ia.
5 Ati liligi ai e ia e vai ke he kapiniu holoholo, ti kamata ai a ia ke holoholo e tau hui he hana tau tutaki, mo e fakamōmō aki ke he holoholo ne pipi aki a ia.
6 Ti hoko atu ai a ia kia Simona Peteru, ti pehe atu a ia kia ia, Ko e Iki na e, ke holoholo kia e koe haku a tau hui?
7 Kua tala age a Iesu, kua pehe age kia ia, Ko e mena kua eke e au, nakai la iloa ainei e koe, ka to iloa fakamui e koe.
8 Kua pehe age a Peteru kia ia, Nakai holoholo e koe haku a tau hui tukulagi. Ti tala age a Iesu kia ia, Kaeke ke nakai holoholo e au a koe ti nakai fai mena a koe fakalataha mo au.
9 Ti pehe age a Simona Peteru kia ia, Ko e Iki na e aua neke kuenaia ko e tau hui haku, ka ko e tau lima foki haku, katoa mo e hoku ulu.
10 Ti pehe age a Iesu kia ia, Ko ia kua koukou, nakai aoga kia ia ke holoholo ka ko e tau hui hokoia, ti kua mea oti a ia; kua mea foki a mutolu, ka e nakai ko mutolu oti kana.
11 Ha ko e mena kua fioia ne ia a ia ke afo a ia; ko e mena ia ne pehe mai ai, Nakai mea a mutolu oti kana.
12 Kua oti tuai he holoholo e ia ha lautolu a tau hui; kua toto foki hana tau tapulu, mo e liu foki takoto; ti pehe age a ia kia lautolu, Kua iloa nakai e mutolu e mena kua eke e au kia mutolu?
13 Kua tokutoku mai e mutolu au, ko e Akoako mo e Iki; ti kua mitaki ha mutolu ne talahau mai, ha ko au ni haia.
14 Hanai, kaeke foki ko e Iki au, mo e Akoako, ti holoholo ni e au e tau hui ha mutolu; kua lata ia mutolu ke feholoholoaki ha mutolu a tau hui.
15 Ha kua ta atu e au e fakafifitaki kia mutolu, kia tuga he eke e au kia mutolu, kia eke pihia ni e mutolu.
16 Ko e moli, ko e moli, ke tala atu e au kia mutolu, nakai mua e fekafekau ke he hana iki; ti nakai ni mua e fekau kia ia ne fakafano a ia.
17 Kaeke kua iloa e mutolu e tau mena nai, uhoaki a mutolu kaeke kua eke e mutolu.
18 Nakai ko mutolu oti kua vagahau atu ai e au; kua iloa e au a lautolu ne fifili e au; ka kia fakamoli ai e Tohi, Ko e tagata ne kai mena fakalataha mo au, kua aka mai e ia au ke he hana muihui.
19 Kua tala atu nai e au kia mutolu, ka e nakala hoko mai, kia talia e mutolu, ka hoko mai, ko au ni haia.
20 Ko e moli, ko e moli, ke tala atu e au kia mutolu, ko ia ke talia taha ka fakafano atu e au, kua talia e ia au, ko ia foki kua talia au, kua talia e ia a ia ne fakafano mai au.
21 Kua vagahau e Iesu e tau mena na, ti fakaatukehe hana finagalo, ati talahau ai a ia, kua pehe, Ko e moli, ko e moli, ka tala atu e au kia mutolu, to afo e taha ia mutolu au.
22 Ati fakafehinoaki ai e tau tutaki, kua mahalohalo a lautolu po ke talahau mai a ia kia hai.
23 Kua takoto age foki e taha he hana tau tutaki ke he fatafata a Iesu, ko ia ne ofania e Iesu.
24 Ati kemokemo ai a Simona Peteru kia ia ke hūhu age po ko hai ne talahau mai ki ai.
25 Kua falanaki atu a ia ke he fatafata a Iesu, kua pehe age kia ia, Ko e Iki na e, ko hai kia?
26 Kua tala age a Iesu, Ko ia ka age ki ai e au e mena kai ka oti he fufui e au, ko ia haia. Ati fufui ai e ia e mena kai, kua age kia Iuta Isakariota, ko e tama a Simona.
27 Kua mole e mena kai, ati heke ai e Satani e tagata ia. Ti pehe age ai a Iesu kia ia, Ko e tau mena ka eke e koe, kia eke fakaave a.
28 Ka e nakai iloa e taha ia lautolu ne tatakoto e mena ne tala age ai e ia e kupu na kia ia.
29 Ha ko e falu piko na lautolu ne tala age a Iesu ke he kato tupe, ne toka ia Iuta, Ati fakafua mai a e tau mena ke lata ia tautolu ke he galue; po ke age ha mena ke he tau nonofogati.
30 Kua talia foki e ia e mena kai, ati fano ai agataha a ia ki fafo, kua po foki.
31 Kua fano a ia ki fafo, ati pehe ai a Iesu, Kua lilifu a enei e Tama he tagata, kua lilifu foki e Atua kia ia.
32 Kaeke ke lilifu e Atua ha ko ia, mo e lilifu a ia ke he Atua kia ia ni, ke vave foki he lilifu a ia kia ia.
33 Ma fanau na e, toe tote haku a nofo ia mutolu, to kumi e mutolu au, ka e tuga ne tala atu e au ke he tau tagata Iutaia, Ko e mena ke fano au ki ai nakai maeke ia mutolu ke o ki ai; pihia foki he tala atu nai e au kia mutolu.
34 Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu.
35 Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.
36 Kua tala age a Simona Peteru kia ia, Ko e Iki na e, to haele atu a koe ki fe? Kua tala age a Iesu kia ia, Ko e mena ka fano au ki ai, nakai maeke ia koe ke mui mai ainei kia au, ka ko e taha aho ke mui mai ai a koe kia au.
37 Kua tala age a Peteru kia ia, Ko e Iki na e, ko e heigoa e mena nakai maeke ai ia au ke mui atu ainei kia koe? To tuku atu e au haku a moui ke hukui aki a koe.
38 Kua tala age a Iesu kia ia, To tuku atu kia e koe hau a moui ke hukui aki au? Ko e moli, ko e moli, ke tala atu e au kia koe, nakai kō e moa, ato fakatikai lagatolu mai a koe kia au.