Ioane 16:1-33
16 KUA tala atu e au e tau mena nai kia mutolu, neke tupetupe a mutolu.
2 To vega e lautolu a mutolu he tau sunako; to hoko mai foki e vaha ka kelipopo e taha a mutolu ti manatu e ia kua eke e ia e poa ke he Atua.
3 To eke foki e lautolu e tau mena ia kia mutolu, ha kua nakai iloa e lautolu e Matua mo au.
4 Ka kua tala atu e au e tau mena nai kia mutolu kia manamanatu ai a mutolu ka hoko mai e vaha ia, ne tala atu ai au kia mutolu. Nakai tala atu e au e tau mena nai kia mutolu ke he kamataaga, ha ko e mena ha i ai au ia mutolu.
5 Ka ko e fano ne fai au kia ia ne fakafano mai au, nakai hūhu mai foki taha ia mutolu kia au, To fano a koe ki fe?
6 Ka kua puke ha mutolu a tau loto ke he fakatutuku, he tala atu ai e au e tau mena nai kia mutolu.
7 Ka ko au, ko e mena moli ni ke tala atu e au kia mutolu, kua aoga kia mutolu ke fano kehe au; ha ko e mena ka nakai fano kehe au, ti nakai haele mai e Lagomatai kia mutolu; kaeke ke fano au, ti fakafano mai e au a ia kia mutolu.
8 Ka haele mai a ia, ti fakailoa atu e ia ke he lalolagi e hala, mo e tututonu, mo e fakafiliaga.
9 Ko e hala, ha ko e mena nakai tua a lautolu kia au;
10 Ko e tututonu, ha ko e mena fano au ke he haku a Matua; ti nakai tuai kitia e mutolu au;
11 Ko e fakafiliaga, ha ko e mena kua fakafili e iki he lalolagi nei.
12 Loga gaia e tau mena ia au ke tala atu e au kia mutolu, ka kua nakai maeke ke talia e mutolu ke he vaha nai.
13 Ka haele mai a ia, ko e Agaga ke tupu ai e kupu moli haia, ti takitaki e ia a mutolu ke he tau kupu moli oti; ha ko e mena nakai talahau noa e ia hokoia, ka ko e tau mena oti kua fanogonogo ai a ia, to talahau ai ni, to fakailoa mai foki kia mutolu e tau mena ka tutupu.
14 Ko ia ni ke fakaheke mai kia au, ha ko e mena moua mai e ia ia au, ati fakailoa atu ai kia mutolu.
15 Ko e tau mena oti ni ha he Matua, ha ha ia au foki ia; ko e mena ia ne tala atu ai e au, kua moua mai e ia ia au, ti fakailoa atu ai kia mutolu.
16 Toe tote ti nakai kitia e mutolu au; toe tote foki ti kikite mai ai a mutolu kia au, ha ko e mena fano au ke he Matua.
17 Ati vagavagahau ai e falu he hana tau tutaki, Ko heigoa e mena nai kua talahau mai e ia kia tautolu, Toe tote ti nakai kitia e mutolu au; ti toe tote foki ti kikite mai a mutolu kia au, ha ko e mena fano au ke he Matua?
18 Ati pehe age ai a lautolu, Ko heigoa e mena kua talahau mai nai e ia, Toe tote? Nakai iloa e tautolu e mena kua talahau mai ai e ia.
19 Kua fioia e Iesu ha lautolu a fia hūhu mai kia ia; ati pehe age ai a ia kia lautolu, Kua vagavagahau kia a mutolu ke he mena ia he pehe atu au, Toe tote ti nakai kitia e mutolu au; ti toe tote foki ti kikite mai a mutolu kia au?
20 Ko e moli, ko e moli, ke tala atu e au kia mutolu, to tagi a mutolu mo e tagi tautau, ka e kolikoli e lalolagi; to momoko a mutolu, ka e liu ha mutolu a momoko ke he kolikoli.
21 Ka fanau taha fifine kua momoko ai a ia, ha kua hoko mai hana aho; ka oti he fanau mai e tama, ti nakai tuai manamanatu a ia ke he hana mamahi, ha ko e fiafia, nukua fanau mai e tagata ke he lalolagi.
22 Hanai foki, kua moua a mutolu ke he vaha nei he momoko; to liu foki feleveia a tautolu mo au, ti fiafia ai ha mutolu a tau loto, ti nakai uta kehe e taha ha mutolu a fiafia.
23 Ko e vaha ia nakai tuai hūhu mai ai a mutolu kia au ke he taha mena. Ko e moli, ko e moli, ke tala atu e au kia mutolu, ko e tau mena oti ke ole atu ai a mutolu ke he Matua ha ko e haku a higoa, to foaki mai e ia kia mutolu.
24 Kua hoko mai ke he vaha nai nakala ole atu a mutolu ha mena, ha ko e haku a higoa. Ati ole atu a, ti moua ni e mutolu, kia katoatoa ai ha mutolu a fiafia.
25 Kua tala atu e au kia mutolu e tau mena nai ke he tau kupu fakatai; ka e hoko atu ke he vaha ia, nakai tuai tala atu ai e au ha mena kia mutolu ke he tau kupu fakatai; ka e fakailoa fakatonu atu e au kia mutolu e tau kupu ke he Matua.
26 Ko e vaha ia ke ole atu ai a mutolu ha ko e haku a higoa; nakai pehe foki au kia mutolu, ke tala age au ke he Matua ma mutolu.
27 Ha ko e mena fakaalofa mai ni e Matua kia mutolu, ha kua fakaalofa a mutolu kia au, mo e talia kua hau au mai he Atua.
28 Kua hau au mai he Matua, mo e hau au ke he lalolagi; ko e toka foki ne fai e au e lalolagi, mo e fano au ke he Matua.
29 Ati tala age ai hana tau tutaki kia ia, Kitiala, kua talahau fakatonu mai ni e koe ainei, kua nakai talahau mai e koe e kupu fakatai.
30 Kua iloa e mautolu ainei kua fioia e koe e tau mena oti kana, nakai aoga foki ia koe ke hūhu atu taha kia koe; ko e mena ia kua talia ai e mautolu, ne haele mai a koe mai he Atua.
31 Kua tala age a Iesu kia lautolu, Kua talia ainei kia e mutolu?
32 Kitiala, to hoko ke he aho, kua hoko nai foki ki ai, ke mavehevehe ai a mutolu ke takitaha mo e fano ke he hana faoa ka e toka tokotaha au, ka e nakai tokotaha au, ha ko e Matua ha ha ia au.
33 Kua tala age e au e tau mena nei kia mutolu, kia moua ai e mutolu e monuina ia au, to moua foki e mutolu e matematekelea ke he lalolagi, kia fakamanavalahi a mutolu, kua kautu au ke he lalolagi.