Ioane 18:1-40
18 KUA tala age e tau kupu ia, ati o ai a Iesu mo e hana tau tutaki ke he fahi atu he vailele ko Ketarono, ha i ai e kaina; kua o a lautolu ki ai mo e hana tau tutaki.
2 Kua iloa foki e Iuta e mena ia, ko ia ne afo a ia, ha ko e mena mahani a Iesu ke haele ka ai fakalataha mo e hana tau tutaki.
3 Kua moua foki e Iuta e kau, mo e tau fekafekau mai he tau ekepoa ne mua mo e tau farasaio, kua fina atu a ia ke he mena ia mo e tau hulu, mo e tau lamepa, mo e tau kanavaakau.
4 Kua fioia foki e Iesu e tau mena oti ko e hohoko ha ne fai kia ia, ti haele atu a ia, kua pehe age kia lautolu, Ko hai kia ne kumi e mutolu?
5 Kua tala age a lautolu kia ia, Ko Iesu ko e Nasareta. Ti tala age a Iesu kia lautolu, Ko au hanai. Kua tutu fakalataha foki mo lautolu ko Iuta, ko ia ne afo a ia.
6 Kua pehe age a Iesu kia lautolu, Ko au hanai, ati tukumuli ai a lautolu, mo e veveli ke he kelekele.
7 Ati liu foki hūhu atu ai a Iesu kia lautolu, Ko hai kia ne kumi e mutolu? Kua tala mai a lautolu, Ko Iesu ko e Nasareta.
8 Ti tala age a Iesu, Kua tala atu tuai e au kia mutolu, ko au hanai; hanai, kaeke ke kumi mai e mutolu au, ati toka ai a lautolu nai ke o;
9 Kia fakamoli ai e kupu ne talahau e ia, Ko lautolu ne foaki mai e koe kia au, nakai malaia taha.
10 Ko Simona Peteru foki, ne toka ia ia e pelu, kua aki ai e ia, mo e ta aki e fekafekau he ekepoa ne mua, kua motupū ai hana teliga matau; ko Maliko e higoa he fekafekau.
11 Ati tala age ai a Iesu kia Peteru, Kia toka e pelu hau ke he hana tokaaga; nakai kia inu au ke he kapiniu ne ta mai kia au he haku a Matua?
12 Ati tapaki atu ai a Iesu he kau, mo e takitaki, mo e tau fekafekau he tau tagata Iutaia ti lili e lautolu a ia.
13 Ati takitaki fakamua ai e lautolu a ia kia Ana, ha ko e matua fugavai haia a Kaiafa, ko e ekepoa ne mua a ia ke he vaha ia.
14 Ko Kaiafa foki haia ne tala age ke he tau tagata Iutaia, kua aoga ka mate taha tagata ke hukui aki e motu.
15 Kua mumui atu kia Iesu a Simona Peteru mo e taha tutaki; kua kitia foki e tutaki ia he ekepoa ne mua; ti hu atu a ia fakalataha mo Iesu ke he fale he ekepoa ne mua.
16 Ka ko Peteru, kua tu a ia ki fafo ke he gutuhala. Ati fina age ai e taha tutaki ne kitia he ekepoa ne mua, kua vagahau age ke he leoleo gutuhala, ti takitaki mai a Peteru ki loto.
17 Ati pehe age ai e fekafekau fifine ne leoleo e gutuhala kia Peteru, Nakai kia ko koe e taha tutaki he tagata na? Kua tala age a ia, Nakai ko au.
18 Ha ne tutu atu e tau fekafekau mo e tau leoleo ne tafu e lautolu e afi kaka, ha kua makalili ti mumu ai a lautolu; kua tu foki a Peteru fakalataha mo lautolu, mo e mumu ai.
19 Ati hūhu mai ai e ekepoa ne mua kia Iesu, ke he hana tau tutaki mo e hana tau kupu.
20 Kua tala age a Iesu kia ia, Kua talahau fakakite au ke he tau tagata, kua fakaako mau au ke he tau sunako mo e faituga, ne tolo mau ki ai e tau tagata Iutaia; ka e nakai talahau fakagalo e au ha mena.
21 Ko e ha ne hūhu mai ai a koe kia au? Kia hūhu a koe kia lautolu ne fanogonogo ai, po ke heigoa e mena ne talahau atu e au kia lautolu; kitiala, kua iloa e lautolu e tau mena ne tala age ai e au.
22 Kua vagahau a ia ke he tau kupu na, ati poki atu ai kia Iesu e taha fekafekau ne tu ai, kua pehe age, Kua tali atu pihia kia e koe ke he ekepoa ne mua?
23 Ati tala age ai e Iesu kia ia, Kaeke kua kelea haku a kupu, ti talahau la e koe hana a kelea; kaeke kua mitaki, po ke heigoa e mena ne poki mai ai e koe au?
24 Kua fakafano e Ana a ia kua lili kia Kaiafa, ko e ekepoa ne mua.
25 Ne tu ai a Simona Peteru, kua mumu a ia; ati pehe mai ai a lautolu kia ia, Ka e nakai kia ko koe e taha he hana tau tutaki? Kua fakatikai atu a ia, kua pehe atu, Nakai ko au.
26 Kua tala age e taha fekafekau he ekepoa ne mua, ko e magafaoa a ia he tagata ne hio kehe ai e Peteru hana teliga, Ka e nakai kia kitia e au a koe fakalataha mo ia ke he kaina?
27 Ti liu foki fakatikai atu a Peteru, ti kō ai agataha e moa.
28 Ati takitaki ai e lautolu a Iesu ia Kaiafa ke he fale he iki; kua aho foki; ka e nakai huhū a lautolu ke he fale he iki; neke kelea ai a lautolu, ti nakai maeke ke kai e paseka.
29 Ti hu atu ai a Pilato ki fafo kia lautolu, kua pehe atu, Ko heigoa e mena kua hokotaki ai e mutolu e tagata na?
30 Kua tala age a lautolu, kua pehe age kia ia, Ane mai nakai fai mahani kelea a ia, po kua nakai tuku atu e mautolu a ia kia koe.
31 Ti pehe age ai a Pilato kia lautolu, Ati uta kehe a e mutolu a ia, ti fakafili e mutolu a ia ke he fakatufono ha mutolu. Ati pehe mai ai e tau Iutaia kia ia, Kua tapu ia mautolu ke kelipopo ha tagata.
32 Kia fakamoli ai e kupu a Iesu, ne tala age ai a ia ke fakailoa atu ai e kakano he hana mate ko e mate ai ha ne fai a ia.
33 Ati liu foki hu a Pilato ke he fale he iki, ti ui a ia kia Iesu, mo e tala age kia ia, Ko koe kia ko e patuiki he tau tagata Iutaia?
34 Kua tala age a Iesu kia ia, Mai ia koe kia e kupu ia, po ke tala atu ai he falu kia koe e kupu na kia au?
35 Kua tala age a Pilato, Ko au kia ko e tagata Iutaia? Kua tuku mai kia au a koe he motu hau mo e tau ekepoa ne mua; ko e heigoa ne eke e koe?
36 Kua tala age a Iesu, Nakai ko e kautu he lalolagi nai haku a kautu; ane mai ko e kautu he lalolagi nai haku a kautu, po kua tau haku a tau fekafekau, neke tuku atu au ke he tau tagata Iutaia; ka ko e ainei nakai mai i hinai haku a kautu.
37 Ati tala age ai a Pilato kia ia, Ti ko e patuiki kia a koe? Kua tala age a Iesu, Haia ni, ko au ko e patuiki. Ko e mena hanai ne fanau mai ai au, mo e hau ai au ke he lalolagi, kia talahau e au e kupu moli. Ko lautolu oti kana ha ha he kupu moli, kua fanogonogo mai a lautolu ke he haku a leo.
38 Kua pehe mai a Pilato kia ia, Ko heigoa e kupu moli? Kua tala atu e kupu ia, ati liu foki hu atu a ia ki fafo ke he tau tagata Iutaia, kua tala age foki kia lautolu, Nakai moua e au ha mena ke fakahala ai a ia.
39 Ka ko e mahani ha mutolu ke vevete atu e au kia mutolu taha tagata ke he paseka. Ko e hanai, po kua manako nakai a mutolu kia vevete atu e au kia mutolu e iki he tau tagata Iutaia?
40 Ati liu foki tauhea a lautolu oti kana, kua pehe, Toka ai e tagata ia; ka ko Parapa. Ko e tagata fofo mena ni a Parapa.