Ioane 19:1-42
19 ATI uta ai e Pilato a Iesu, mo e fahi a ia.
2 Ne fakavihi foki he kau e foufou ke he lakau fotofoto, kua tuku ke he hana fufuga, kua fakatapulu foki a ia ke he tapulu kula uhi.
3 Ati tala age ai a lautolu, Fakaalofa! e patuiki he tau tagata Iutaia. Kua poki atu foki e lautolu a ia.
4 Ati liu foki hu atu a Pilato ki fafo, kua tala age kia lautolu, Kitiala, kua takitaki mai e au a ia ki fafo kia mutolu, kia iloa e mutolu, nakai moua e au ha mena ke fakahala ai a ia.
5 Ati hu atu ai a Iesu ki fafo, kua toka agaia e foufou fotofoto, mo e tapulu kula uhi. Kua tala age foki a Pilato kia lautolu, Kitiala e tagata!
6 Kua kitia a ia he tau ekepoa ne mua, mo e tau fekafekau, ati ui ai a lautolu, kua pehe, Ati fakasatauro a! fakasatauro a! Kua tala age a Pilato kia lautolu, Ati uta a e mutolu a ia, mo e fakasatauro ai e mutolu, ha ko au nakai moua e au ha mena ke fakahala ai a ia.
7 Kua tala age e tau tagata Iutaia kia ia, Ha ha ia mautolu e fakatufono, kua lata foki mo e fakatufono ha mautolu ke mate a ia, ha kua eke e ia a ia mo Tama he Atua.
8 Kua logona e Pilato e kupu ia, ti au atu ai he matakutaku a ia.
9 Kua liu foki hu mai a ia kehe fale he iki, mo e pehe age kia Iesu, Ko e tagata mai fe kia a koe? Ka ko Iesu nakai tali atu ni kia ia.
10 Ati pehe age ai a Pilato kia ia, Nakai kia lea mai a koe kia au? Nakai kia iloa e koe, ha ha ia au e pule ke fakasatauro ai a koe ha ia au foki e pule ke vevete a koe?
11 Kua tala age a Iesu, Nakai pule a koe kia au, kane nakai tuku mai kia koe mai luga; ko e mena ia, ke au atu ai e kelea hana ne tuku mai au kia koe.
12 Tali mai he mena ia, kua fia vevete atu ai e Pilato a ia, ka e tauui e tau tagata Iutaia, kua pehe atu, Kaeke ke vevete atu e koe e tagata na, ti nakai fakaalofa a koe kia Kaisara; ka fia patuiki e taha, kua eke fakakelea a ia kia Kaisara.
13 Ne fanogonogo a Pilato ke he kupu ia, ati takitaki ai e ia a Iesu ki fafo; kua nofo foki a ia ke he nofoa fakafili ke he mena ne higoa, Ko e tau maka ati, ka ko e kupu Heperu, ko Kapata.
14 Ko e aho ia he tauteaga he paseka, na ko e magaaho ono. Kua tala mai a ia ke he tau tagata Iutaia, Kitiala, e patuiki ha mutolu!
15 Ka kua tauui a lautolu, Uta kehe a; ati uta kehe a; kia fakasatauro a ia. Kua pehe age a Pilato kia lautolu, Ke fakasatauro kia e au e patuiki ha mutolu? Kua tali atu e tau ekepoa ne mua kia ia, Nakai fai patuiki a mautolu, ka ko Kaisara hokoia.
16 Ati tuku atu ai e ia a ia kia lautolu, kia fakasatauro.
17 Ati uta ai e lautolu a Iesu, mo e takitaki atu; kua fua foki e ia hana satauro, kua fina age ke he mena ne higoa, Ko e mena ne tokai ai e tau ulupoko; kua higoa ke he kupu Heperu, ko Kolokota.
18 Ati fakasatauro ai e lautolu a ia ke he mena ia, katoa mo e tokoua a tagata fakalataha mo ia, ko e taha ke he taha fahi, mo e taha ke he taha fahi; ka ko loto a Iesu.
19 Kua tohi foki e Pilato e tohi fakamailoga, mo e tuku ki luga he satauro. Ko e kupu hanai ne tohi, KO IESU, KO E NASARETA, KO E PATUIKI HE TAU TAGATA IUTAIA.
20 Ati totou ai e fakamailoga ia he tokologa e tau tagata Iutaia, ha ko e mena ne fakasatauro ai a Iesu, kua tata age ia ke he maga; ne tohi foki ke he kupu Heperu, mo e Heleni, mo e Roma.
21 Ati pehe ai e tau ekepoa ne mua a Iutaia kia Pilato, Ua tohi e koe, Ko e patuiki he tau tagata Iutaia; ka kia pehe, Kua tala mai a ia, ko au ko e patuiki he tau tagata Iutaia.
22 Kua tala age a Pilato, Ko e mena ne tohi e au, kua tohi tuai e au ni.
23 Kua oti he fakasatauro e lautolu a Iesu, ati uta ai he kau hana tau tapulu kua vevehe fa, ke takitaha e tagata tau mo e hana mena; ko e tapulu he tino foki ka e nakai tuitui e tapulu he tino, kua lalaga katoatoa kua kamata ke he potu ki luga.
24 Ati vagavagahau ai a lautolu, Aua neke hēhē ai e tautolu, ka e vili e tautolu, po ko hai ka eke māna, kia fakamoli ai e Tohi, ne pehe mai, Kua tufatufa e lautolu haku a tau tapulu ma lautolu, ti kua eke e lautolu e vili ke he haku a tapulu tino. Ko e tau mena ia ne eke he tau tagata tau.
25 Ne tutu fakatata age ke he satauro a Iesu hana matua fifine, mo e matakainaga he hana matua fifine, ko Maria e hoana a Kalopa, mo Maria ko e Makatala.
26 Kua kikite atu a Iesu ke he hana matua fifine, mo e tutaki ne ofania e ia, kua tutu mai, ati tala age ai e ia ke he hana matua fifine, Teme na e, kitiala, ko e hau a tama.
27 Ti pehe age a ia ke he tutaki ia, Kitiala, ko e hau a matua fifine. Tali mai foki he magaaho ia, kua uta a ia he tutaki ia ke he hana kaina.
28 Kua mole atu e mena ia, kua fioia e Iesu, kua oti he fakamoli e tau mena oti; kia fakamoli ai e Tohi, kua pehe a ia, Kua fia inu au.
29 Ne toka ai foki e vai, kua puke ke he vineta. Kua fuifui e lautolu e omomi ke he vineta; kua pipi ke he hisopo, mo e tuku hake ai ke he hana gutu.
30 Kua talia e Iesu e vineta, ati pehe age ai a ia, Kua fakaoti tuai. Kua fakatalofe hana fufuga, ati tuku atu ai hana agaga.
31 Kua ole age e tau tagata Iutaia kia Pilato, kia pakipaki ha lautolu a tau hui, ti uta kehe a lautolu, neke toka ai e tau tino ki luga he satauro ke he sapati, ko e aho ke taute ai, ko e aho homo atu foki e sapati ia.
32 Ati o age ai e tau tagata tau, kua pakipaki e tau hui he taha katoa mo e taha, ne fakasatauro fakalataha mo ia.
33 Ka kua hoko a lautolu kia Iesu, kua kitia e lautolu kua matulei tuai a ia, ati nakai pakipaki ai hana tau ve;
34 Ka ko e taha tagata tau kua hoka e ia hana kahokaho ke he tao; ati hau ai agataha e toto mo e vai.
35 Ko ia ne kitekite atu ki ai, kua talahau ai e ia, ko e moli foki hana ne talahau; kua iloa foki e ia, ko e moli ni hana kupu, kia talia ai e mutolu.
36 Ha kua eke e tau mena ia, kia fakamoli ai e Tohi, Nakai papaki taha hui hana.
37 Kua pehe mai foki taha Tohi, To kitekite atu a lautolu kia ia ne hoka e lautolu.
38 Kua mole e tau mena ia; ati ole atu ai a Iosefa ko e Aramataia kia Pilato, kia uta kehe ai e ia e tino a Iesu; (ko e taha tutaki a Iesu a ia, ka e fakagalogalo, he matakutaku ke he tau tagata Iutaia;) kua tuku mai foki e Pilato. Ati fina age ai a ia, kua uta e tino a Iesu.
39 Ti fina age foki a Nikotemo, ko ia ne fano fakamua kia Iesu ke he po; kua uta foki e ia e muro ne fiofio mo e aloe, toka ai ne teau e litara.
40 Ati uta ai e laua e tino a Iesu, kua tauteute ai ke he ie ke tanu aki, mo e tau mena manogi, ke tuga e mahani a Iutaia he tauteaga he tanuaga.
41 Ha he mena ne fakasatauro ai a ia e taha kaina, ha he kaina foki ia e tukuaga fou, nakaila tanu ai taha.
42 Ati toka ai a Iesu e laua ke he mena ia, ha ko e tauteaga he tau tagata Iutaia, ha ko e mena ne tata mai e tukuaga.