Ioane 20:1-31
20 KO e aho fakamua he fahi tapu, ke he pogipogi, kua pouli agaia ni, kua fina age ai a Maria e Makatala ke he tukuaga; ti kitia e ia e maka kua uta kehe mai he tukuaga.
2 Ati poi ai a ia, kua fano kia Simona Peteru mo e taha tutaki ne ofania e Iesu, kua tala age kia laua, Kua uta kehe tuai e lautolu e Iki mai he tukuaga; nakai iloa foki e mautolu e mena kua tuku ai e lautolu a ia.
3 Ati o atu ai a Peteru mo e taha tutaki, kua o atu a laua ke he tukuaga.
4 Kua tafepoi fakalataha a laua; ka ko e taha tutaki kua poi atu kua mua ia Peteru, ti hoko mua ni ke he tukuaga.
5 Kua tukutuku hifo ai a ia, kua kitia ai e tau ie ne tanu aki, ha ne toka ai, ka e nakai hu atu a ia.
6 Ati hoko atu ai a Simona Peteru, ne mui atu kia ia, kua hu atu a ia ki loto he tukuaga, kua kikite atu ke he tau ie ne tanu aki ha ne toka ai,
7 Ko e holoholo foki ha he fufuga hana, nakai toka fakalataha mo e tau ie ne tanu aki, ka kua toka kehe mo e vakavakai ke he taha fahi.
8 Ati hu atu ai e taha tutaki ne mua ke he tukuaga, kua kikite atu, ati talia ai.
9 Ha ko e mena nakala iloa e laua e Tohi, kia matike foki a ia kia lautolu kua mamate ke lata ai.
10 Ati liu ai e tau tutaki ia ke he tau magafaoa ni ha laua;
11 Ka ko Maria, kua tu a ia ki fafo ne tata age ke he tukuaga, kua tagi ai. Kua tagi a ia, mo e tukutuku hifo ke he tukuaga,
12 Ti kitia atu e ia e tokoua e agelu, kua tapulu hina mai, kua nonofo ke he mena ne tuku ai e tino a Iesu; ko e taha ha he ulu, mo e taha ha he tau ve.
13 Kua tala mai a laua kia ia, Teme na e, kua tagi a koe he ha? Kua pehe a ia kia laua, Ha kua uta kehe e lautolu haku a Iki, ti nakai iloa e au e mena ne tuku ai e lautolu a ia.
14 Kua tala atu e ia e tau kupu ia, ati haga ai ki tua; ati kikite atu ai kia Iesu kua tu mai; ka e nakai iloa e ia ko Iesu ni haia.
15 Kua tala age a Iesu kia ia, Teme na e, kua tagi a koe he ha? Ko hai kia ne kumi e koe? Ka ko e fifine, piko na ia, ko e leoleo a ia he kaina, kua tala age kia ia, Ko e iki na e, kaeke kua uta kehe e koe a ia, ati talahau mai a kia au, po ko fe e mena ne tuku ai a ia e koe, ke uta kehe ai e au a ia.
16 Kua tala age a Iesu kia ia, Ma Maria na e. Ati haga age ai a ia, kua pehe age kia ia, Raponi na e, (ko e hana kakano, Ko e akoako na e.)
17 Kua tala age a Iesu kia ia, Aua neke piki mai a koe kia au, ha ko e mena nakala hake ni au ke he haku a Matua; ka e fano a koe ke he haku a tau matakainaga, mo e tala age kia lautolu, To hake au ke he haku a Matua mo e Matua ha mutolu, ke he haku a Atua mo e ha mutolu Atua.
18 Kua fina atu a Maria e Makatala, kua fakailoa atu ke he tau tutaki, kua kitia tuai e ia e Iki, kua tala mai foki e ia e tau mena ia kia ia.
19 Kua hoko ke he afiafi, ko e aho fakamua haia he fahi tapu, kua pāpā e tau gutuhala ke he mena ne fakapotopoto ai e tau tutaki, he matakutaku ke he tau tagata Iutaia; kua haele age a Iesu kua tu ki loto, ti pehe age a ia kia lautolu, Kia monuina a mutolu.
20 Kua tala atu a ia e kupu ia, ati fakakite atu ai kia lautolu hana tau lima mo e hana kahokaho. Ati fiafia ai e tau tutaki he kitia e lautolu e Iki.
21 Ti liu foki tala age a Iesu kia lautolu, Kia monuina a mutolu. Tuga ne fakafano mai au he Matua, ke pihia foki he fakafano atu e au a mutolu.
22 Kua tala atu e ia e kupu ia, ati fafagu ai a ia, mo e pehe age kia lautolu, Kia moua e mutolu e Agaga Tapu.
23 Ko lautolu oti kana, ke fakamagalo ai e mutolu ha lautolu a tau hala, to fakamagalo ia kia lautolu; ko lautolu oti kana ke toka e mutolu ha lautolu a tau hala, to toka ni a ia.
24 Ka ko Toma, ko e taha he tokohogofulu ma ua, kua higoa foki ko Titumo, nakai fakalataha a ia mo lautolu, he haele age ai a Iesu.
25 Ati tala age ai e tau tutaki oti kia ia, Kua kitia tuai e mautolu e Iki. Ka e pehe mai a ia kia lautolu, Kaeke nakai kikite atu au ke he hana tau lima, ke he tau mena ne pao ai e tau fao, mo e toka haku a lima ke he mena ne pao ai e tau fao, mo e toka haku e lima ke he hana kahokaho, nakai talia ni e au.
26 Kua mole atu e aho valu, kua liu foki fakalataha he fale hana tau tutaki, ne fakalataha ai foki a lautolu mo Toma; kua haele atu ai e Iesu, kua pāpā e tau gutuhala, kua tu a ia ki loto, mo e pehe age, Kia monuina a mutolu.
27 Ati tala age ai a ia kia Toma, Ta mai a hau a matalima ki hinei, kikite foki ke he haku a tau lima; ta mai a foki hau a lima, mo e tuku ke he kahokaho haku; ti ua faliuliu a koe, ka kia talia fakatonu.
28 Ati tala age ai a Toma, kua pehe mai kia ia, Hoku Iki na e, mo e hoku Atua na e!
29 Kua tala age a Iesu kia ia, Ma Toma na e, kua talia kia e koe ha kua kikite mai a koe kia au? Uhoaki a lautolu nakai kitia, ka e talia ai ni.
30 Ne loga foki e falu a fakamailoga ne eke e Iesu ki mua he hana tau tutaki, nakai tohi ke he tohi nai.
31 Ka kua tohi e tau mena nai, kia talia ai e mutolu, ko Iesu, ko e Keriso ni haia, ko e Tama he Atua; kia moua ai foki e moui he hana higoa e mutolu kua talia ai.