Ioane 3:1-36
3 KO e taha tagata he tau farasaio, ko Nikotemo hana higoa, ko e taha patu a ia a Iutaia.
2 Ne fina age a ia kia Iesu he po, kua tala age kia ia, Rapai na e, kua iloa e mautolu, ko e akoako a koe, ne haele mai mai he Atua; ha ko e mena nakai maeke e taha he eke e tau fakamailoga ia ne eke e koe, aua e Atua mo ia.
3 Kua tala age a Iesu, kua pehe age kia ia, Ko e moli, ko e moli, kua tala atu nai e au kia koe, ka nakai liu foki fanau e tagata, ti nakai maeke ke kitia e ia e kautu he Atua.
4 Kua tala age a Nikotemo kia ia, Ke maeke kia fefe he fanau e tagata motua? To maeke kia ke liu foki hao ke he manava he hana matua fifine, ke fanau mai ai?
5 Kua pehe age a Iesu, Ko e moli, ko e moli, ke tala atu e au kia koe, kaeke kua nakai fanau e tagata ke he vai mo e Agaga, ti nakai maeke ke hao a ia ke he kautu he Atua.
6 Ko ia kua fanau mai mai he tino, ko e tino haia; ko ia kua fanau mai mai he Agaga, ko e agaga haia.
7 Aua neke ofo a koe he pehe atu au kia koe, Kia liu foki fanau a mutolu ke lata ai.
8 Kua agi e matagi ke he mena ne loto ki ai a ia, kua fanogonogo foki a koe ke he hana agi, ka e nakai kitia e koe e mena he hau ai, mo e mena ne fina atu ki ai; ke pihia foki e tau tagata oti ka fanau mai mai he Agaga.
9 Kua tala age a Nikotemo, kua pehe age kia ia, To maeke fefe e tau mena ia ka eke?
10 Kua tala age a Iesu, kua pehe aga kia ia, Ko koe kia ko e akoako a Isaraela, ka e nakai kia iloa e koe e tau mena na?
11 Ko e moli, ko e moli, ke tala atu e au kia koe, kua vagahau a mautolu ke he tau mena ne iloa e mautolu, kua talahau foki e tau mena ne kitekite a mautolu ki ai, ka e nakai talia mai e mutolu ha mautolu a talahau.
12 Kaeke ke vagahau atu e au kia mutolu ke he tau mena he lalolagi, ka e nakai talia mai e mutolu, po ke talia fefe e mutolu ka vagahau atu e au kia mutolu ke he tau mena ha ha he lagi?
13 Nakai fakai foki taha ne hake ke he lagi, ko ia ni hokoia ne hifo mai he lagi, ko e Tama he tagata haia ha he lagi.
14 Ke tuga a Mose, ne ta hake ki luga e gata ke he tutakale; kia ta hake pihia e Tama he tagata ke lata ai;
15 Kia nakai mate taha ne tua kia ia, ka kia moua e moui tukulagi.
16 Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.
17 Ha ko e mena nakai fakafano mai he Atua hana Tama ke he lalolagi ke fakahala e lalolagi, ka kia fakamomoui e lalolagi kia ia.
18 Ko ia ne tua kia ia, nakai fakahala ai a ia, ka ko ia nakai tua, kua mau tuai e fakahala kia ia ha kua nakai tua a ia ke he higoa he Tama fuataha he Atua.
19 Ko e fakahala foki hanai, kua hoko mai e maama ke he lalolagi, ka ko e tau tagata kua mua ha lautolu a manako ke he pouli he ha lautolu a manako ke he maama; ha kua kelea ha lautolu a tau mahani.
20 Ha ko lautolu oti kua eke mena kelea, kua vihiatia e lautolu e maama; ti nakai o mai ni ke he maama, neke fakailoa ai ha lautolu a tau mahani.
21 Ka ko ia kua eke e mahani fakamoli, kua hau ni a ia ke he maama, kia fakailoa hana tau mahani, ha kua lata ia mo e Atua.
22 Kua mole atu e tau mena ia, ti haele atu a Iesu mo e hana tau tutaki ke he fahi ko Iutaia; kua nofo ai mo lautolu, mo e papatiso ai.
23 Ne papatiso foki e Ioane i Ainona, kua tata age ki Salima, ha ko e mena loga ai e tau vai; ne o mai foki e tau tagata, kua papatiso ai.
24 Ha ko e vaha ia nakaila tuku ni a Ioane ke he fale puipui.
25 Ti kua taufetoko e falu a tutaki a Ioane mo e falu a Iutaia ke he fakameaga.
26 Kua o mai a lautolu kia Ioane, ti pehe mai kia ia, Rapai na e, ko ia ne fakalataha mo koe ke he fahi atu a Ioritana, ne talahau ai e koe, kitiala, ha ne papatiso e ia, kua o atu foki kia ia e tau tagata oti kana.
27 Ati tala age ai a Ioane, kua pehe age, Nakai maeke ke moua he tagata ha mena ka nakai foaki mai kia ia mai he lagi.
28 Ko mutolu ni ke talahau au, ne pehe atu au, Nakai ko e Keriso au nai; ka kua fakafano mai ni au, ke mua kia ia.
29 Ko e tagata hana e hoana, ko e kitofaihoana a ia; ka ko e kapitiga he kitofaihoana, kua tu mai mo e fanogonogo kia ia, kua fiafia lahi ke he leo he kitofaihoana; ko e haia foki kua katoatoa ai haku a fiafia nai.
30 Kia tupu mau a ia ke lata ai; ka ko au nai, ko e au atu ne fai he tote au.
31 Ko ia ne haele mai mai luga, kua mua a ia ke he tau mena oti. Ko ia ha he lalolagi, ko e ha he lalolagi ni a ia, kua vagahau foki a ia ke he tau mena he lalolagi, ka ko ia ne haele mai mai he lagi, kua mua a ia ke he tau mena oti kana.
32 Ko e tau mena foki ne fioia e ia mo e fanogonogo ki ai, kua talahau ai; nakai talia foki e taha hana a talahau.
33 Ko ia ne talia hana talahau, kua fakailoa hana taofi kua fakamoli ni e Atua.
34 Ha ko ia ne fakafano mai he Atua, kua vagahau ni a ia ke he tau kupu he Atua; ha ko e mena nakai foaki fakalata mai he Atua e Agaga kia ia.
35 Kua fakaalofa e Matua ke he Tama, kua tuku age foki e tau mena oti ke he hana lima.
36 Ko e tagata ne tua ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui, ka ko e ita he Atua ha ne toka mau ni ki luga hana.