Ioane 5:1-47
5 KUA mole e tau mena ia, ti hoko ke he galue a Iutaia; ti haele hake ai a Iesu ki Ierusalema.
2 Ha i Ierusalema e takeleaga, kua tata ke he gutuhala mamoe, ne talahaua ke he kupu Heperu ko Petesa; ne lima hana fakamaluaga.
3 Ne tatakoto ai e tau tagata gagao ne tokologa, ko e tau matapouli, ko e tau kunekune, mo e tau pipili he gagao, [ha ne tatali ke kalepu e vai.
4 Ha ko e falu a aho kua hifo ai e agelu ke he takeleaga, mo e fakakalepu ai e vai; ko e tagata ne mua hifo, ka kua kalepu e vai, kua malolo ai a ia ke he gagao ne gagao ai a ia.]
5 Ha i ai foki e taha tagata ne gagao tolugofulu ma valu e tau tau.
6 Kua fioia e Iesu a ia, ha ne takoto mai; kua fioia foki kua leva he gagao ai, ti pehe age kia ia, Kua manako nakai a koe ke fia malolo?
7 Kua tala age e tagata gagao kia ia, Ko e iki na e, nakai fai tagata au ke tuku hifo au ke he takeleaga, ka kalepu e vai; ka kua fina atu au, ti mua hifo taha ia au.
8 Kua tala age Iesu kia ia, Ati matike a, uta hau a mohega, ti fano a koe.
9 Ti malolo agataha e tagata; ti uta hana mohega, ti fano ni. Ko e sapati fohi e aho ia.
10 Ko e mena ia, kua tala age ai e tau tagata Iutaia ke he tagata ne fakamalolo, Ko e sapati hanai, kua tapu ke uta ai e koe hāu a mohega.
11 Kua tala age a ia kia lautolu, Ko ia ne fakamalolo au, kua pehe mai a ia kia au, Uta a hāu a mohega, ti fano a.
12 Ati hūhu age ai a lautolu kia ia, Ko hai kia e tagata ne tala atu kia koe, Kia uta a hāu a mohega, ti fano?
13 Ka e nakai iloa he tagata ne fakamalolo, po ko hai, ha kua fano tuli kehe a Iesu, ha ko e moto tagata ha i ai.
14 Kua mole e tau mena ia ti kitia e Iesu a ia ke he faituga, ti pehe age a ia kia ia, Kitiala, kua malolo tuai a koe; aua neke liu a koe ke hala, neke hoko atu kia koe taha kelea lahi ne mua ke he kelea nā.
15 Kua fano e tagata mo e fakailoa atu ke he tau tagata Iutaia, ko Iesu ne fakamalolo a ia.
16 Ko e mena ia ne favale ai e tau tagata Iutaia kia Iesu, kua kolo foki ke kelipopo a ia, ha kua eke e ia e tau mena ia ke he sapati.
17 Ka e tala age a Iesu kia lautolu, Kua gahua haku a Matua kua hoko mai ni ke he aho nei, ha ne gahua foki au.
18 Ti ko e mena ia kua au atu ai he kolo e tau tagata Iutaia ke kelipopo a ia, he nakai kuenaia ko e sapati ne holi e ia, ka kua tala age a ia, ko e Atua ko e hana Matua ni; kua fakatai e ia a ia mo e Atua.
19 Ti tala age a Iesu kia lautolu, kua pehe age ai, Ko e moli, ko e moli, ke tala atu e au kia mutolu, nakai maeke ke he Tama ke eke taha mena, ko ia ni hokoia; ka ko e tau mena ne kikite atu ke he Matua ha ne eke; ko e tau mena foki ne eke e ia, ko e tau mena foki ia ha ne eke pihia he Tama.
20 Ha ko e mena fakaalofa mai e Matua ke he Tama, kua fakakite mai foki kia ia e tau mena oti kana ne eke e ia; to fakakite mai foki e ia kia ia e tau gahua ke mua he he tau gahua ia, kia ofo ai a mutolu.
21 Ha ko e mena, ke tuga e fakamatike mo e fakamomoui he Matua a lautolu kua mamate, ke pihia foki e Tama kua fakamomoui foki e ia a lautolu kua loto a ia ki ai.
22 Ha ko e mena nakai fakafili he Matua taha, ka kua tuku mai ke he Tama e fakafiliaga oti kana.
23 Kia fakalilifu he tau tagata oti kana e Tama, ke tuga ha lautolu a fakalilifu ke he Matua. Ko ia nakai fakalilifu ke he Tama, nakai fakalilifu a ia ke he Matua ne fakafano mai a ia.
24 Ko e moli ko e moli, ke tala atu e au kia mutolu, ko ia ne fanogonogo mai ke he haku a tau kupu, mo e tua kia ia ne fakafano mai au, to moua e ia e moui tukulagi; nakai hoko foki kia ia e fakahala, ka kua hoko a ia ke he moui, mai he mate.
25 Ko e moli, ko e moli, ke tala atu e au kia mutolu, to hoko ke he aho, kua hoko nai foki ki ai, ke logona ai e lautolu ne mamate e leo he Tama he Atua; ko lautolu foki ke logona ai to momoui ai a lautolu.
26 Ha ko e mena, tuga e Matua ha ne moui, ha ha ia ia ni; kua pihia foki he foaki mai e ia ke he Tama, kia toka ia ia e moui, ha ha ia ia ni.
27 Kua foaki mai foki e pule kia ia, kia eke e ia e fakafiliaga, ha ko ia ko e Tama he tagata.
28 Aua neke ofo a mutolu he mena ia, ha ko e mena hoko ke he aho ke logona ai ke he hana leo a lautolu katoa ha he tau tukuaga, mo e o mai ai.
29 Ko lautolu ne mahani mitaki, to tutu mai ke he moui; ka ko lautolu ne mahani kelea, to tutu mai ke he fakahala.
30 Nakai maeke ia au hoko au ke eke taha mena taha; ke fakalata haku a fakafiliaga ke he fanogonogo haku; ti tonu ni haku a fakafiliaga, ha ko e mena nakai fifitaki au ke he haku a loto ni, ka ko e finagalo he Matua ne fakafano mai au.
31 Kaeke ke talahau e au a au, ti nakai moli haku a talahau;
32 Ha ne talahau taha kia au, kua iloa foki e au ko e moli e talahau ha ne talahau e ia kia au.
33 Ne fakafano atu e mutolu e falu kia Ioane, ti kua talahau tuai e ia ke he mena moli.
34 Ka e nakai aoga kia au e talahau he tagata; ka e tala atu e au kia mutolu e tau mena nai kia momoui ai a mutolu.
35 Ko e lamepa a ia, ne puho mo e kikila; ne loto foki a mutolu ke he taha magaaho ke fiafia ke he hana maama.
36 Ha ha ia au e talahau ke mua kia Ioane; ha ko e tau gahua ne tuku mai kia au he Matua kia fakaoti e au, ko e tau gahua ia ha ne eke e au, kua talahau ia kia au, ne fakafano mai au he Matua.
37 Ko e Matua foki ne fakafano mai au, ko ia ni kua talahau a au. Nakai logona ni e mutolu hana leo, nakai kitekite atu foki ke he hana tino mai.
38 Nakai toka mau foki hana kupu i loto ia mutolu; ha ko ia ne fakafano mai e ia kua nakai tua a mutolu kia ia.
39 Kia kumikumi a mutolu ke he tau Tohi, ha ko e mena kua manatu a mutolu, ke moua ai e mutolu e moui tukulagi; ko e tau Tohi foki ia kua talahau a au.
40 Ka e nakai mafai a mutolu ke o mai kia au ke moua ai e mutolu e moui.
41 Nakai aoga kia au e fakahekeaga mai he tau tagata.
42 Ka kua kitia e au ni a mutolu, nakai ha ha i loto ia mutolu e fakaalofa ke he Atua.
43 Ko e higoa he haku a Matua ne hau ai au, ka e nakai talia e mutolu au; ka hau taha ke he hana higoa ni, ati talia ai e mutolu a ia.
44 To maeke fefe he talia e mutolu ko mutolu ne manako ke he fakahekeaga he taha kia taha; ka ko e fakahekeaga mai he Atua ni, nakai kumikumi ai e mutolu?
45 Ua manatu a mutolu ke hokotaki e au a mutolu ke he Matua; ha ha i ai taha ke hokotaki e ia a mutolu, ko Mose haia, kua tua a mutolu ki ai.
46 Ha ko e mena ane mai talia e mutolu a Mose, po kua talia mai e mutolu au; ha ko e mena tohi e ia kia au.
47 Kaeke kua nakai talia e mutolu hana tau tohi, po ke talia fefe e mutolu haku a tau kupu?