Ioane 7:1-53
7 KUA mole e tau mena ia, ati haele fano ai a Iesu i Kalilaia; nakai finagalo foki a ia ke haele i Iutaia, ha ko e mena kolo he tau tagata Iutaia ke kelipopo a ia.
2 Kua tata e galue a Iutaia he tau fale api.
3 Ko e mena ia ne tala age ai hana tau matakainaga kia ia, Kia toka e koe e mena nai, ka e fina age ā ki Iutaia, kia kitia foki hau a tau tutaki ke he hau a tau gahua kua eke e koe.
4 Ha kua nakai eke fufu e taha ha mena, ka e fia fakakite a ia; kaeke kua eke e koe e tau mena nai, kia fakakite e koe a koe ke he lalolagi.
5 Ha ko e mena nakai tua hana tau matakainaga kia ia.
6 Ati tala age ai a Iesu kia lautolu, Nakaila hoko mai haku a vaha; ka ko e tau vaha oti ke lata mo mutolu.
7 Nakai maeke ke he lalolagi ke fakavihia a mutolu; ka e fakavihia a au, ha kua talahau e au a ia, kua kelea hana tau mahani.
8 O hake a a mutolu ke he galue ia; nakaila hake au ke he galue ia, ha ko e mena nakaila hoko mai haku a vaha.
9 Kua tala age a ia e tau mena na kia lautolu, kua nofo mau a ia i Kalilaia.
10 Kua o hake hana tau matakainaga, ati haele hake ai a ia ke he galue, nakai fakakite, ka e tuga ne hake fufu.
11 Ati kumi fano ai he tau tagata Iutaia a ia ke he galue, kua pehe age, Ka ko fe a ia?
12 Kua fefanafanaaki lahi foki e moto tagata kia ia; kua pehe e falu, Ko e tagata mahani mitaki a ia; ka kua pehe falu, Nakai, ka kua fakahehe e ia e tau tagata.
13 Ka e nakai vagahau fakatonu taha kia ia, he matakutaku ke he tau tagata Iutaia.
14 Kua hoko ke he aho tulo he galue, kua hake a Iesu ke he faituga, mo e fakaako ai.
15 Ati ofo ai e tau tagata Iutaia, kua pehe age, Kua pulotu fefe e tagata nei, nakai fakaako a ia?
16 Kua tala age a Iesu kia lautolu, kua pehe age, Ko e haku a tau kupu, nakai ko e haku, ka ko e hana ne fakafano mai au.
17 Ka manako taha ke eke hana finagalo, ti iloa ai e ia e tau kupu, po ke mai he Atua, po ke vagahau noa ni e au.
18 Ko ia ke talahau e ia a ia, kua kumi e ia e fakahekeaga māna ni; ka ko ia ne kumi e fakahekeaga hana ne fakafano mai a ia, kua fakamoli a ia, nakai fai mahani hepehepe a ia.
19 Ka e nakai kia tuku atu e Mose e fakatufono kia mutolu? ka e nakai fakai taha ia mutolu ke oma e fakatufono; ko heigoa e mena ne kolo ai e mutolu ke kelipopo au?
20 Ati tala age ai e moto tagata, kua pehe mai, Ha ha ia koe e temoni; ne kolo e hai ke kelipopo a koe?
21 Kua tala age a Iesu, kua pehe age kia lautolu, Taha e gahua ne eke e au, ti ofo ai a mutolu oti kana.
22 Haia, ne tuku atu ai e Mose kia mutolu e peritome, (ka e nakai ko e fu a Mose, ka ko e tau matua) ko e sapati foki kua fakaperitome ai e mutolu e tau tagata.
23 Kaeke ke talia he tagata e peritome ke he sapati, neke holia e fakatufono a Mose, ti ko heigoa e mena ne ita mai ai a mutolu kia au, he fakamalolo e au e tino katoa he tagata ke he sapati?
24 Ua fakafili fakahanoa, ka kia fakafili e fakafiliaga tonu.
25 Ati pehe age ai e falu a tagata i Ierusalema, Ka e nakai kia ko e tagata hanā ne kolo e lautolu ke kelipopo?
26 Kitiala, kua vagahau fakakite ni a ia, ka e nakai tala age e lautolu ha kupu kia ia; po kua iloa fakatonu kia he tau patu ne pule, ko e Keriso moli hanā?
27 Ka kua iloa e tautolu e mena ne hau ai e tagata na; ka ko e Keriso, ka haele mai a ia, nakai fakai taha ke iloa po ke mai fe a ia.
28 Ati ui ai a Iesu, ha fakaako ke he faituga, kua pehe age, Kua iloa e mutolu au, kua iloa foki e mutolu e mena ne hau ai au; nakai hau noa au, ka kua moli ni a ia ne fakafano mai au, nakai iloa e mutolu a ia;
29 Ka kua iloa e au a ia, ha ko e mena hau au ia ia ni; ko ia foki ne fakafano mai au.
30 Ati foli e lautolu ke tapaki a ia; ka e nakai hoko ha lima taha kia ia; ha ko e mena nakala hoko ke he hana vaha.
31 Ka kua tua kia ia e tokologa ha he moto tagata, mo e pehe age a lautolu, Ka haele mai e Keriso, to mua kia he loga e tau fakamailoga ke eke e ia ke he tau fakamailoga kua eke he tagata nei?
32 Kua logona he tau farasaio, kua fefanafanaaki e moto tagata kia ia ke he tau mena ia; ati fakafano ai he tau farasaio mo e tau ekepoa ne mua e tau fekafekau ke tapaki a ia.
33 Ti pehe age ai a Iesu kia lautolu, Toe tote he nofo ai au ia mutolu, ti fano ai au kia ia ne fakafano mai au.
34 To kumi e mutolu au, ka e nakai kitia au; ko e mena foki ke nofo ai au, nakai maeke e mutolu he o ki ai.
35 Ati pehe ai e tau tagata Iutaia ko e taha kia taha, To fano ki fe a ia he nakai maeke ke kitia e tautolu a ia? To fano kia a ia ke he tau tagata kua paea ki Heleni, ke fakaako e tau tagata Heleni?
36 Ko heigoa e kupu ne talahau mai nai e ia, To kumi e mutolu au, ka e nakai kitia au; ko e mena foki ke nofo ai au, nakai maeke he o ki ai a mutolu?
37 Ko e aho fakamui, ko e aho lahi he galue, kua tu ai Iesu, mo e ui, kua pehe age, Kaeke ke fia inu taha, ati hau a kia au ke inu ai.
38 Ko ia ne tua kia au, ke tuga he talahau mai he Tohi, To lele mai e tau vailele mai loto ia ia, ko e vai moui ni.
39 Kua talahau mai e ia e kupu ia ke he Agaga, ke moua e lautolu ne tua kia ia; ha ko e vaha ia nakala moua ai e Agaga Tapu, ha ko e mena nakala hoko a Iesu ke he hana lilifu.
40 Kua fanogonogo e tokologa he moto tagata ke he kupu ia, ati pehe ai a lautolu, Ko e moli, ko e perofeta ia ni hanai.
41 Kua pehe foki e falu, Ko e Keriso hanā; ka kua pehe falu, To tupu kia e Keriso mai Kalilaia?
42 Nakai kia talahau mai e Tohi, ke tupu mai e Keriso he fanau a Tavita, mai Petelehema ko e maga ne nofo ai a Tavita?
43 Ti kua veveheua ai e moto tagata ia ia.
44 Ko e manako he falu ke tapaki a ia, ka e nakai toto atu ha lima taha kia ia.
45 Ati liliu atu ai e tau fekafekau ke he tau ekepoa ne mua; mo e tau farasaio, ati pehe age ai a lautolu kia lautolu, Ko e ha nakai takitaki mai ai e mutolu a ia?
46 Ati tala age ai e tau fekafekau, Kua nakai fai tagata taha ke vagahau ke tuga e tagata na.
47 Ati tala age ai e tau farasaio kia lautolu, Po kua fakahehe ai foki a mutolu?
48 Po kua talia kia a ia he taha patu ne pule, po ke taha he tau farasaio?
49 Ka ko e moto tagata na, nakai iloa e fakatufono, kua ulaafia ni a lautolu.
50 Kua tala age a Nikotemo kia lautolu, (ko ia ne fano kia ia he po, ko e taha foki ia a lautolu).
51 Kua fakahala kia taha tagata ke he fakatufono ha tautolu, ka e nakai fanogonogo fakamua kia ia, mo e iloa hana tau mena ne eke?
52 Ati tala age ai a lautolu, kua pehe age kia ia, Ko e Kalilaia foki kia a koe? Kia kumi a e koe mo e iloa ai, nakai tu mai ni ha perofeta mai Kalilaia.
53 (Ati o ai a lautolu, takitokotaha ke he hana fale.