Ioane 9:1-41
9 KUA haele age a ia, kua fioia e ia e tagata kua matapouli tali he fanau mai.
2 Ti hūhu hana tau tutaki kia ia, kua pehe age, Rapai na e, ko hai ne hala, ko ia nai, po ke hana tau matua? he fanau mai ai a ia mo e matapouli.
3 Kua tala age a Iesu, Nakai hala e tagata nai, po ke hana tau matua; ka kia fakailoa ai e tau gahua he Atua ia ia.
4 Ko e mena lata ke eke e tautolu e tau gahua hana ne fakafano mai au, he aho; ka hoko ke he po, ti nakai maeke ia taha ke gahua ai.
5 Ko au ko e maama he lalolagi, he nofo au ke he lalolagi.
6 Kua vagahau atu e tau kupu ia, ti anu hifo ai a ia ke he kelekele; ti eke ai e pelapela ke he anu, kua goigoi aki e tau mata he matapouli ke he pelapela;
7 Kua pehe age foki kia ia, Fano a, holoholo ke he takeleaga i Siloa, (ko e hana kakano ka fakamatala Ko e fakafano). Ati fano ai a ia, kua holoholo, ti liu mai kua ala tuai.
8 Ati tala age ai a lautolu ne katofia mo ia, mo lautolu ne kitia fakamua a ia ka kua matapouli, Ka e nakai kia ko ia hanai ne nofo mo e kaiole?
9 Kua pehe ni falu, Ko ia hanai; ka kua pehe falu, Tuga a ia ni; ka ko ia kua pehe mai, Ko au ni hanai.
10 Ati tala age ai a lautolu kia ia, Po ke fakaala fefe hau a tau mata?
11 Kua tala age a ia, kua pehe age, Ko e taha tagata, ne higoa ko Iesu, ne eke e ia e pelapela, mo e goigoi aki haku tau mata, ti pehe mai a ia kia au, Fano a ke he takeleaga i Siloa mo e holoholo ai a koe. Ati fano ai au, mo e holoholo ai, ti ala ai au.
12 Ti tala age ai a lautolu kia ia, Ti ko e fe a ia? Kua pehe age a ia, Nakai iloa e au.
13 Ati takitaki ai e lautolu e tagata ne matapouli ke he tau farasaio.
14 (Ko e sapati foki ne eke ai e Iesu e pelapela, mo e fakaala ai hana tau mata).
15 Ati liu foki hūhu e tau farasaio kia ia, Po ke ala fefe hau a tau mata. Kua pehe age a ia kia lautolu, Ne tuku mai e ia e pelapela ke he haku a tau mata, ti holoholo ai e au, ti kua ala tuai au.
16 Ti pehe age ai e falu he tau farasaio, Nakai ko e tagata mai he Atua a ia, ha ko e mena nakai omaoma e ia ke he sapati. Ka kua pehe falu, Kua maeke kia he taha tagata hala ke eke e tau fakamailoga pehena? Ati veveheua ai na lautolu.
17 Ti liu foki tala age a lautolu ke he matapouli, Po ke heigoa hau a talahau kia ia, he fakaala e ia hau a tau mata? Kua pehe age a ia, Ko e perofeta ni a ia.
18 Ka e nakai talia he tau tagata Iutaia ne matapouli a ia, mo e ala, ato ui e lautolu ke he tau matua he tagata hana e tau mata ne fakaala.
19 Ti hūhu age ai a lautolu kia laua, kua pehe age, Ko e tama kia ha mua a enei, ne tala mai e mua kua matapouli he fanau mai, po ke ala nai fefe?
20 Kua tala age hana tau matua kia lautolu, kua pehe age, Kua iloa e maua, ko e tama ha maua a enei, ne matapouli foki e fanau mai.
21 Ka e nakai iloa e maua po ke ala fefe ainei, nakai iloa foki e maua po ko hai e tagata ne fakaala hana tau mata; kua lahi a ia, ati hūhu atu a kia ia, kia talahau atu e ia a ia.
22 Na pihia mai hana tau matua, he matakutaku a laua ke he tau tagata Iutaia, ha kua mau tuai e pulega he tau tagata Iutaia, Kaeke ke totoku e taha, Ko e Keriso a ia, ti vega ai a ia he sunako.
23 Ko e mena ia, ne pehe age ai hana tau matua, Kua lahi a ia, kia hūhu atu a mutolu kia ia.
24 Ati liu foki ui a lautolu ke he tagata ne matapouli, mo e pehe age kia ia, Tuku atu a e fakahekeaga ke he Atua; kua iloa e mautolu ko e tagata hala a ena.
25 Ati tala age ai a ia, kua pehe age, Nakai iloa e au po ke tagata hala a ia; ka e taha e mena kua iloa e au, ne matapouli au, ka kua kitia tuai e au ainei.
26 Ti liu foki pehe a lautolu kia ia, Ko e heigoa e mena ne eke e ia kia koe? Po ke fakaala fefe e ia hau a tau mata?
27 Kua tala age a ia kia lautolu, Kua oti he tala atu e au kia mutolu, ka e nakai fanogonogo mai ni a mutolu, Ko e ha ne fia fanogonogo mai ai foki a mutolu? Po ke manako kia a mutolu ke eke mo tutaki hana?
28 Ati vagahau kelea ai a lautolu kia ia, kua pehe age, Ko koe hana tutaki; ka ko mautolu, ko e tau tutaki a Mose a mautolu.
29 Kua iloa e mautolu ne vagahau mai e Atua kia Mose; ka ko e tagata na, nakai iloa e mautolu po ke mai fe a ia.
30 Kua tala age e tagata, kua pehe age kia lautolu, Ko e mena hanai ke ofo ai, he nakai iloa e mutolu po ke mai fe a ia, ka kua fakaala mai e ia haku a tau mata.
31 Kua iloa foki e tautolu, nakai fanogonogo e Atua ke he tau tagata hala; kaeke ke matakutaku taha ke he Atua, mo e eke hana finagalo, kua fanogonogo mai a ia kia ia.
32 Nakai logona ni tali mai he vaha tuai, he fakaala e taha e tau mata ha taha ne fanau mai kua matapouli.
33 Ane nakai hau mai he Atua e tagata na, po kua nakai maeke ia ia ha mena taha ke eke.
34 Kua tala age a lautolu, kua pehe age kia ia, Ne fanau mai a koe mo e hala ni kua lahi, ke fakaako mai kia e koe a mautolu? Ati vega ai e lautolu a ia ki tua.
35 Ne logona e Iesu kua vega e lautolu a ia ki tua, kua kitia foki e ia, kua pehe age kia ia, Po kua tua nakai a koe ke he Tama he Atua?
36 Kua tala age a ia kua pehe age, Ko e iki na e, ko hai kia a ia, kia tua au kia ia?
37 Kua tala age a Iesu kia ia, Kua kitia e koe a ia, ko ia foki hanai kua vagahau nai kia koe.
38 Ti pehe age ai a ia, Ko e Iki na e, kua tua tuai au; ti hufeilo ai a ia kia ia.
39 Ti pehe age a Iesu, Ko e fakafiliaga, ne hau ai au ke he lalolagi nai, kia kitia e lautolu kua nakai kitia, kia fakamatapouli foki a lautolu ne kitia.
40 Ti logona e tau mena ia he falu e tau farasaio ne nonofo mo ia, ti pehe mai a lautolu kia ia, Kua matapouli kia foki a mautolu?
41 Kua pehe age a Iesu kia lautolu, Ane mai kua matapouli a mutolu, po kua nakai fai hala a mutolu; ka kua pehe a mutolu ainei, Ko e mena ala a mautolu; ko e mena ia ke toka mau ai ha mutolu a hala.