Ioelu 1:1-20
1 KO e kupu a Iehova ne hoko mai kia Ioelu, ko e tama a Petuelu.
2 Ko e tau patu na e, kia fanogonogo mai a mutolu ke he mena nai, ko mutolu oti kua nonofo ke he motu kia fakateliga mai a a mutolu; ne fai mena pehenai nakai ke he vaha ha mutolu, po ke vaha he tau matua ha mutolu?
3 Kia talahau ai e mutolu ke he fanau ha mutolu; ti tala age e fanau ha mutolu ke he fanau ha lautolu, mo e fanau ha lautolu ke he hau ka tupu hake.
4 Ko e tau mena ne toe he tau hē kasama, kua kai he tau hē akerise; ko e tau mena ne toe he tau he akerise kua kai he tau hē aleki; ko e mena foki ne toe he tau he aleki kua kai ai he tau hē kasili.
5 Ala mai a a mutolu ne inu ke konahia, mo e tagi a mutolu; kia tagi fekapai foki a mutolu oti kua inu uaina, ha ko e mena nakai tuai inu a mutolu he huhua vine.
6 Ha kua o hake e motu kehe ke he kelekele haku, ne malolo a lautolu, to nakai maeke ke totou a lautolu he loga; ko e tau nifo ha lautolu ko e tau nifo he leona haia, ne fai nifo gao foki tuga ne tau gao he leona lahi.
7 Kua moumou e lautolu haku a tau vine, kua folefole e lautolu haku a tau mati; kua folefole oti ni e lautolu, kua liti hifo foki ni; kua hina ai hana tau la.
8 Kia tagi aue tuga ne tamafine tote kua pipi ke he ie talatala ha ko e tane hana, he faitane a ia ki ai ka kua tamafine a ia.
9 Kua nakai tuai fai poa mena kai, mo e poa inu ke he fale a Iehova; kua mānu ai e tau ekepoa ko e tau fekafekau a Iehova.
10 Kua maona e fonua, kua mānu e kelekele; ha kua maona e saito; kua mamiti e uaina; kua oti e puke lolo.
11 Ko e tau tagata gahua fonua na e, kia ma a mutolu, ko mutolu ko e tau tagata taute vine, kia tagi fekapai ā mutolu, ha ko e saito mo e karate; ha kua maona e tau saito he fonua.
12 Kua magomago e tau vine, kua fifigo e tau mati, ko e tau rimoni, mo e tau pama, mo e tapua, mo e tau akau oti he vao kua magomago ia; ha kua mole atu e fiafia he tau tagata.
13 Ko e tau ekepoa na e, kia pipi e mutolu a mutolu ke he ie talatala mo e tagi; kia tagi fekapai ā mutolu kua fekafekau ai ke he fatapoa; o mai a, kia tapulu ai a mutolu ke he ie talatala ato ahogia, ko mutolu ko e tau fekafekau he Atua haku; ha kua nakai tuai fai poa mena kai mo e poa inu ke he fale he Atua ha mutolu.
14 Kia kotofa e mutolu e tau aho ke fakakanopogi ai; kia ui e mutolu e fakapotopotoaga ke o mai, kia fakapotopoto ai e mutolu e tau patu, katoa mo lautolu oti kua nonofo ke he motu, ke he fale a Iehova ha mutolu a Atua; mo e tagi atu ā mutolu kia Iehova.
15 Oi te fakaalofa ke he aho! ha kua tata mai e aho a Iehova, to hoko mai tuga e malaia mai ia Ia hana e malolo oti kana.
16 Nakai kai maona ai e tau mena kai ki mua ha tautolu, kua uta kehe foki e fiafia mo e olioli he fale he Atua ha tautolu?
17 Kua popo ai e tau fua saito i lalo hifo he kelekele ne gana ai, kua eke mo tau mena kua moumou e tau fale saito, kua malŏlŏ ai e tau fale koloa ha kua fifigo e tau saito.
18 Kau tagi lahi mahaki e tau manu huifa, kua fakaatukehe e tau fuifui povi he nakai fai mena kai a lautolu; kua mamate foki e tau fuifui mamoe.
19 Iehova na e, kua ui atu au kia koe ha kua kai he afi e tau kaina he vao ne totolo ai e tau manu, kua huhunu ke he afi puhopuho e tau akau oti he vao.
20 Kua tagi foki kia koe e tau manu he vao; ha kua mamiti e tau vailele, kua kai foki he afi e tau kaina he vao ne totolo ai e tau manu.