Ioelu 2:1-32
2 KIA ulo e mutolu e pu i Siona, kia tomumu ai ke he haku a mouga tapu, kia vivivivi ai a lautolu oti kua nonofo ke he motu, ha kua hoko mai e aho a Iehova, ha kua tata mai.
2 Ko e aho pouli mo e pouli kikio, ko e aho malu mo e pouli kikio, tuga e maama he matafatafa ata he aho kua totolo ki luga he tau mouga; ko e motu lahi mo e malolo, nakai fai mena pihia i tuai; ka mole ia nakai pihia foki ke hahau mo hahau.
3 Kua fakaoti ai he afi ki mua ha lautolu, kua huhunu ai e afi puhopuho ki tua ha lautolu; ko e fonua ki mua ha lautolu ne tuga e kaina ko Etena ia, ka ko tua ha lautolu, ko e tutakale kua maona, nakai fai mena kua hao ia lautolu.
4 Ne tino mai a lautolu tuga ne tino mai e tau solofanua; tuga ne kau heke solofanua, kua pihia ni he tafepoi a lautolu.
5 Kua hopohopo a lautolu, tuga ne tomumu he tau kariota ke he tau tapunu mouga, tuga e tomumu he afi puhopuho ne huhunu ai e tau gutugutu saito, tuga ne motu malolo kua tatanaki ai ke tau.
6 Kua vivivivi e tau tagata ki mua ha lautolu, kua maaki tea e tau mata he tau tagata oti.
7 Kua tafepoi a lautolu tuga e tau tagata toa, kua o hake a lautolu he kaupa tuga e tau tagata tau; kua o a lautolu takitaha ke he hana puhala, ti nakai afe age foki a lautolu ke he taha mena he o a lautolu.
8 Nakai tulei atu taha ke he taha; kua o a lautolu takitaha ke he hana puhala; ka feoho atu foki a lautolu ke he tau kanavaakau nakai kafokia ai a lautolu.
9 Kua tafepoi fano a lautolu ke he maga; kua tafepoi foki a lautolu ke he kaupa kua hake a lautolu ke he tau fale; kua huhu atu a lautolu ke he tau fakamaama tuga ne kaiha.
10 Kua luelue e lalolagi ki mua ha lautolu; kua vivivivi e lagi; kua fakapouligia e la mo e mahina, nakai tuai kikila mai foki e tau fetu.
11 Kua vagahau age foki e leo a Iehova ke he hana kau; he lahi mahaki ni hana kau; ha kua malolo a ia ke fakahoko ai hana finagalo, ha ko e aho a Iehova ko e aho lahi haia, kua matakutakuina lahi ni, po ko hai kua maeke ke fakauka ai?
12 Ka ko ainei foki, kua pehe mai a Iehova, kia liliu mai a mutolu kia au mo e ha mutolu a tau loto katoa, mo e fakakanopogi, mo e tagi, mo e tagi aue;
13 Kia hēhē e mutolu e tau loto ha mutolu, ka e nakai ko e tau tapulu ha mutolu, mo e liliu atu a mutolu kia Iehova ha mutolu a Atua; ha kua fakaalofa noa mai a Iehova, mo e fakaalofa hofihofi noa a ia, kua fakatuai hana a ita, ka e lahi ni hana a fakaalofa, kua tokihala a ia ha ko e kelea.
14 Kua iloa e hai, po ke liu mai nakai a ia, mo e tokihala, mo e toka mai ai e monuina ka mole atu a ia ko e poa mena kai haia; mo e poa inu kia Iehova ha mutolu a Atua?
15 Kia ulo a e mutolu e pu i Siona, kia kotofa e mutolu e tau aho ke fakakanopogi ai, kia ui e mutolu e fakapotopotoaga ke o mai.
16 Kia fakapotopoto e mutolu e motu, kia fakatapu ai e mutolu e tutuutaaga, kia fakapotopoto a e mutolu e tau patu, kia tatanakai ai e tau tama ikiiki, katoa mo lautolu ne kai huhu; kia fina atu ai e kitofaihoana he hana poko, mo e kitofaitane he hana moheaga.
17 Kia tagi e tau ekepoa ko e tau fekafekau a Iehova, ke he vaha he fakamaluaga mo e fatapoa, mo e pehe atu a lautolu, Iehova na e kia fakahao e koe hau a motu, aua neke tuku atu foki hau a tufaaga ke ma ai a lautolu, neke eke ai mo fakatai ke he tau motu kehe, ke pehe he ha a lautolu ke he tau motu, Ko fe kia ha lautolu a Atua?
18 Ti ita tafuā ai a Iehova ha ko e hana motu, ne fakaalofa hofihofi a ia ke he hana tau tagata.
19 Ti tali mai a Iehova, mo e pehe mai ke he hana motu, Kitiala, to fakafano atu e au kia mutolu e tau fua saito, mo e uaina, mo e puke lolo ke makona ai a mutolu; to nakai tuku atu foki e au a mutolu ke fakamā ai ke he tau motu kehe.
20 To uta fakamamao e au ia mutolu e kau mai he fahi tokelau, to vega foki e au a lautolu ke he motu fia inu kua nakai nofo ai taha, to to a lautolu ne mataulu aki e kau ke he tahi he fahi uta, ka ko lautolu ne muiaki e kau ke he tahi he fahi lalo, to hake ai foki e elo ia lautolu, to hake ai foki ia lautolu e namu kelea, he lalahi e tau mena ne eke e lautolu.
21 Ko e fonua na e, aua neke matakutaku a koe; kia fiafia mo e olioli, ha kua eke e Iehova e tau mena lalahi.
22 Ko e tau manu he vao na e, aua neke matakutaku a mutolu, ha kua tupu ai e vao mui ke he tau kaina he vao, ha kua fua mai e akau hana tau fua, ko e mati katoa mo e vine kua fua lahi mai ni.
23 Ko mutolu foki ko e fanau a Siona na e, kia fiafia a mutolu mo e olioli kia Iehova ha mutolu a Atua; ha kua foaki fakalata mai e ia e uha fakamua kia mutolu, kua fakato hifo foki e ia e uha ma mutolu, ko e uha fakamua katoa mo e uha fakamui ke he mahina fakamua.
24 To puke e tau mena taholi saito ke he tau fua saito, to puapuā foki ha lautolu a tau holiaga vine mo e tau holiaga olive ke he uaina mo e puke lolo.
25 To taui atu e au kia mutolu e tau tau ne kai ai he tau hē akerise, mo e tau hē aleki, mo e tau hē kasili, mo e tau hē kasama, ko e haku a kau lahi ne fakafano atu e au kia mutolu.
26 To kai ni a mutolu mo e makona, to fakaheke atu ai foki a mutolu ke he higoa a Iehova ha mutolu a Atua ko ia ne eke mana kia mutolu; nakai ma foki haku a motu tukulagi.
27 To iloa foki e mutolu ko au ha ha i ai ia Isaraela, ko au ni ko Iehova, ha mutolu a Atua ka e nakai ha i ai taha; nakai ma tukulagi haku motu.
28 Ka mole atu e tau mena ia, to liligi hifo e au haku Agaga ki luga he tau tagata oti; ti perofeta ai ha mutolu a tau tama tane, mo e ha mutolu a tau tama fifine, to miti ha mutolu a tau patu, to kitia he tau fuata ha mutolu e tau fakakiteaga;
29 To liligi hifo foki e au haku Agaga ke he tau fekafekau mo e tau fekafekau fifine ke he aho ia.
30 To tuku atu foki e au e tau mana ke he lagi mo e lalolagi, ko e toto, mo e afi, mo e ahua kua fakatupou.
31 To faliu fakamua e la ke he pouli mo e mahina ke he toto, to hoko mai e aho a Iehova kua lahi mo e matakutakuina.
32 Ati oti foki to fakamomoui ai a lautolu oti kana kua ui atu ke he higoa a Iehova; ha ko e mena ha i ai e fakamouiaga ke he mouga ko Siona mo Ierusalema, tuga he pehe mai a Iehova, to ha i ai foki kia lautolu ne toe ko lautolu ne ui ki ai e Iehova.