Iona 1:1-17
1 TI hoko mai ai e kupu a Iehova kia Iona ko e tama a Amitai, kua pehe mai,
2 Kia matike a koe, ti fano a koe ki Nineva ko e maga lahi, mo e ui atu ki ai; ha kua hoko mai ha lautolu a mahani kelea ki mua haku.
3 Ka e matike a Iona ke hola ki Tasesa mai mua a Iehova, ti hifo a ia ki Iopa, mo e moua ai e ia e vaka ko e fano ha ne fai ki Tasesa; ti age ai e ia e totogi he vaka, mo e hifo ki ai; ke o mo lautolu ki Tasesa mai mua a Iehova.
4 Ti fakato e Iehova e matagi lahi ke he moana, ti to ai e afa lahi ke he moana, ti tuga ne mena ko e malipilipi ne fai e vaka.
5 Ti matakutaku e tau kauvaka, ti takitokotaha a lautolu mo e tagi atu ai ke he hana tau atua; ti liti e lautolu ki tahi e tau mena he vaka, ke fakamama ai a ia. Ka e hifo ni a Iona ke he liu vaka; ti takoto a ia mo e mohepopo ai.
6 Ti fina atu e ikivaka kia ia mo e pehe atu kia ia, Ko e heigoa e mena ne mohepopo ai a koe? kia matike a a koe ti ui atu ai ke he Atua hau, po ke manatu mai nakai e Atua kia tautolu neke mahaikava a tautolu.
7 Ti fevagahauaki a lautolu, Kia o a tautolu ke eke e vili, ke iloa ai e tautolu po ko hai kua to mai ai e mauku nai kia tautolu. Ti eke ai e lautolu e vili, ti hagao atu e vili kia Iona.
8 Ti pehe age a lautolu kia ia, Kia tala mai la a koe kia mautolu, po ko hai kua to mai ai e mauku nai kia tautolu? ko e heigoa kia hau a feua? ko e mena fe ne hau ai a koe? ko fe kia e motu hau? ko hai foki e tau tagata ne tupu mai ai a koe?
9 Ti pehe age a ia kia lautolu, Ko e tagata Heperu au; kua matakutaku au kia Iehova ko e Atua he lagi, ko ia ne eke e tahi mo e kelekele momo.
10 Ti matakutaku lahi ai e tau tagata ia, mo e pehe age a lautolu kia ia, Ko e heigoa e mena nai kua eke e koe? Ha kua iloa he tau tagata mena hola a ia mai mua a Iehova, he tala age a ia kia lautolu.
11 Ti pehe age a lautolu kia ia, Ko e heigoa kia e mena ke eke e mautolu kia koe, ke maha ai e moana kia mautolu? ha kua hake ai e tau peau moana mo e loka.
12 Ti pehe age a ia kia lautolu, Kia toto e mutolu au, mo e liti e mutolu au ki tahi, ti maha ai e moana kia mutolu; ha kua iloa e au kua to ai e afā lahi nai kia mutolu ha ko au.
13 Ka e alo fakalahi ni he tau tagata ke liu hake ki uta; ka e nakai maeke kia lautolu ha kua hake ai e moana mo e loka lahi kia lautolu.
14 Ti ui atu a lautolu kia Iehova, kua pehe atu Iehova na e, kua ole atu a mautolu kia koe ke aua neke mahaikava ai a mautolu ha ko e moui he tagata nai, ti aua neke tuku e koe ki luga ha mautolu e toto he tagata nakai hala; ha ko koe Iehova na e, kua eke e tau mena ne finagalo ai a koe.
15 Ti ta hake e lautolu a Iona, mo e liti e lautolu a ia ki tahi, ti maha ai e moana ne loka.
16 Ti matakutaku lahi ai e tau tagata ia kia Iehova, ti eke poa ai e lautolu kia Iehova, mo e omonuo ai e lautolu ke he tau omonuo.
17 Ne kotofa ai e Iehova e ika lahi ke folo a Iona. Ti ha i ai e Iona ke he manava he ika ke he tolu e aho mo e tolu e po.