Iopu 11:1-20
11 TI tali age ai a Sofara ko e tagata Naama, kua pehe age,
2 Ka e nakai kia tali atu ai ke he tau kupu loga? po ke talahaua tututonu kia e tagata vagahau mau?
3 Ke fanogonogo kia e tau tagata ha ko e hau a vagahau ne palau ai a koe? ke va mai kia a koe, ka e nakai ha i ai taha ke fakama a koe?
4 Kua pehe mai a koe, Kua tonu haku a tau kupu fakaako, kua mea foki au ki mua hāu.
5 Ka e mitaki ke to mai e tau kupu he fofoga he Atua, mo e vagahau mai a ia kia koe;
6 Mo e fakakite mai e ia kia koe e tau mena galo he iloilo, kua mua ue atu ia ke he tau mena kua fakailoa mai; kia iloa ai e koe kua fakanimonimo he Atua ha ko koe falu he tau hala hau.
7 Ko e kumi ti moua ai kia e Atua? to moua katoatoa kia kia Ia hana e malolo oti kana?
8 Kua tokoluga a ia tuga ne lagi; ko e heigoa kia e mena ke eke e koe? Kua mua hana hokulo ki seoli; ko e heigoa kia ke iloa ai e koe?
9 Ko e hana loa kua mua ia ke he loa he lalolagi, kua mua foki hana laulahi ke he laulahi he moana.
10 Kaeke ke oho mai a ia, mo e puipui mai, mo e fakapotopoto mai, po ko hai kia ke fakaliu atu a ia?
11 Ko e mena iloa e ia e tau tagata matahavala; kua kitekite mai foki a ia ke he mahani kelea, ka kua nakai manamanatu a ia ki ai.
12 Ka e nakai fai loto matala e tagata goagoa , ka kua fanau e tagata kua tatai mo e punua he asini vao a ia;
13 Kaeke ke taute e koe hāu a loto, mo e fakaolo atu hāu a tau lima kia ia;
14 Kaeke ke ha ha i ai ke he tau lima hau e mahani kelea, kia tuku mamao atu a e koe; ti aua neke nofo ai e mahani hepehepe ke he hau a tau fale ie;
15 Ti haga hake hau a mata mo e nakai fai mena a koe ke ila ai; to fakamalolo foki a koe, mo e nakai ni matakutaku.
16 Ha ko e mena to nimo ia koe e matematekelea, to manatu foki a koe ki ai ke tuga ne vai kua lele kehe.
17 To eke foki ke mua he maama e tau aho hau ke he maama he tupoula; ha ha i ai a koe ainei ke he pouli, ka to eke a koe ke tuga e magaaho pogipogi.
18 To tua a koe, ha ko e mena ha ha i ai e amaamanaki; to kumi fano a koe, ti takoto ai a koe mo e nakai haofia.
19 To takoto foki a koe ka e nakai ha i ai taha ke fakamatakutaku atu kia koe; to o atu foki e tau tagata tokologa ke olelalo atu kia koe.
20 Ka to pouli e tau mata ha lautolu ne mahani kelea, to moumou foki e tau mena ha lautolu ke fehola ki ai; ko e amaamanaki foki ha lautolu ke fakahiku ai e fafagu.