Iopu 13:1-28
13 KITIALA, kua kitia he tau mata haku e tau mena oti na, kua fanogonogo ai haku tau teliga mo e logona ai.
2 Ko e tau mena ne iloa e mutolu kua iloa foki e au; nakai mui au kia mutolu.
3 Ka ko au, kua fia vagahau atu e au kia Ia hana e malolo oti kana, kua manako au ke pulega a maua mo e Atua.
4 Ka ko e tau tagata fafati tala pikopiko a mutolu, ko e tau ekekafo nakai aoga a mutolu oti.
5 Ane mai kua fakamamate fakaoti a mutolu, po kua eke ia mo iloilo kia mutolu.
6 Kia fanogonogo mai a ke he haku a fakatonu atu, kia haga mai a a mutolu ke he haku a taufetoko.
7 To vagahau mo e nakai tonu kia a mutolu ha ko e Atua? to vagahau mo e fakavai kia a mutolu ha ko ia?
8 To fakamailoga kia e mutolu a ia? to taufetoko kia a mutolu ha ko e Atua?
9 Kua mitaki kia ke kumi e ia a mutolu? po ke fakavai kia e mutolu a ia tuga ne fakavai he taha ke he taha?
10 To akonaki ni e ia a mutolu, kaeke ke fakamailoga fufu e mutolu e tau tagata.
11 Nakai kia matakutaku a mutolu ke he hana mua ue atu? po ke hoko atu kia kia mutolu e matakutaku kia ia?
12 Ko e tau kupu fakamanatu ha mutolu kua tatai ia mo e efuefu afi, ko e tau taue ha mutolu, ko e tau taue hemeri haia.
13 Kia toka a ha mutolu a vagahau mai, kia toka au ke vagahau atu, ti hoko fakahanoa mai e tau mena kia au.
14 Kia hoko fakahanoa mai e tau mena to kakati e au haku a tino ke he haku a tau nifo, mo e tuku e au haku moui ke he haku lima.
15 Pete he kelipopo e ia au, to tatali atu au kia ia; ka to fakatonu atu e au haku a tau puhala ki mua hana.
16 To eke ni e ia e fakamouiaga maku; ha ko e mena nakai fina atu e tagata kolokolovao ki mua hana.
17 Kia fanogonogo mai a ke he haku a tau kupu, mo e haku a fakamatalaaga ke he tau teliga ha mutolu.
18 Kitiala, kua taute e au e fakafiliaga; kua iloa e au, to talahaua tututonu ni au.
19 Ko hai kia a ia ke taufetoko a ia mo au? ha ko e mena fakanono ne fai au nai, mo e mate ai au.
20 Ua e na mena ia aua neke eke e koe kia au, ti nakai fakamumuli ai au ki mua hau.
21 Kia fakamamao atu e koe hau a lima ia au, ti ua fakamatakutaku mai kia au hau a tau mena matakutakuina.
22 Ti ui mai e koe kia au, ti tali atu ai au kia koe; po ke vagahau atu e au, ti tali mai e koe kia au.
23 Ko e fiha kia haku a tau mahani kelea, mo e haku a tau hala? Kia fakailoa mai e koe kia au haku a tau holifono mo e haku a tau hala.
24 Kua haga kehe he ha e koe hau a fofoga ia au, mo e eke e koe au mo fi hau?
25 To fakamatakutaku kia e koe e laukou ne havilia he matagi, mo e tutuli kia e koe e tau gutugutu saito kua magomago?
26 He tohi mai e koe e tau mena mamafa kia au; kua eke foki e koe mo tufaaga haku e tau mahani kelea he haku a vaha fuata.
27 Kua fakamau foki e koe haku tau hui ke he akau, kua lamalamati foki a koe ke he haku a tau puhala oti; kua puipui e koe haku a tau aloalohui.
28 To popo ia tuga e mena ne oti ai e popo, tuga ne tapulu ne kai he moko.