Iopu 15:1-35
15 TI tali age a Elifasa ko e tagata Timanu, kua pehe age,
2 Kua lata kia ke he tagata pulotu ke tali atu mo e iloilo nakai aoga, mo e fakapuke hana manava ke he matagi mai he faahi uta.
3 Ke akonaki atu kia a ia ke he tau kupu nakai aoga, mo e vagahau ke he tau mena nakai tupu ai e mitaki?
4 Ka ko koe, kua tiaki e matakutaku, mo e fakateaga a koe ke he liogi ki mua he Atua.
5 Ha kua fakailoa he gutu hau ni hau a mahani kelea, mo e fifili e koe māu e alelo he tagata eke lagatau.
6 Kua fakahala a koe he gutu hau ni, ka e nakai ko au; kua talahau mena foki kia koe he tau laugutu hau.
7 Ko e tagata uluaki ne fanau ai kia a koe? po ke fanau fakamua kia a koe, ka e fakamui e tau mouga?
8 Ne fanogonogo kia a koe ke he pulega he Atua? ne taofi kia e koe māu e iloilo?
9 Ko e heigoa kia e mena kua iloa e koe, nakai iloa e mautolu? ko e heigoa ne iloilo ai a koe, nakai ha i ai foki kia mautolu?
10 Ha ha ia mautolu e tau tagata uluhina katoa mo e tau tagata motua, ne fakamua atu ni ke he matua taane hau.
11 Ko e tau mena fakateaga kia kia koe e tau fakamafanaaga mai he Atua, katoa mo e tau kupu molu ne vagahau atu ai kia koe?
12 Ko e ha ne takitaki kehe ai a koe he hau a loto? ko e ha foki ne mata fakatokoluga ai a koe?
13 He fakamafoki kehe e koe hau a loto ke totoko atu ke he Atua, mo e fakato e koe e tau kupu pihia mai he gutu hau.
14 Ko e heigoa kia e tagata ke mea ai a ia, ke mahani tututonu foki a ia ne fanau ai he fifine?
15 Kitiala, nakai tua a ia ke he hana tau tagata tapu; nakai mea foki e lagi he fofoga a ia ki ai.
16 Ti au atu he pihia a ia ne mahani vihiatia mo e kelea, ko e tagata kua inu ai e mahani kelea po ke magavai!
17 To fakailoa atu e au kia koe, kia fanogonogo mai a a koe kia au; to fakamatala atu foki e au e tau mena ne kitia e au;
18 (Ko e tau mena ne talahau mai he tau tagata iloilo, ne iloa mai ai he tau matua ha lautolu, ti nakai fufu ai e lautolu.
19 Ne tuku mai e motu kia lautolu hoko lautolu ni; nakai fina age ai foki ha tagata kehe kia lautolu.)
20 Kua mamahi ni e tagata mahani kelea ke he tau aho oti hana, ko e katoatoaaga ni he tau tau ne toka ai ma e tagata favale.
21 Ha ha he tau teliga hana e leo ke matakutaku ai a ia; to hoko age kia ia a ia kua moumou ka kua monuina a ia.
22 Nakai manatu e ia ke liu mai a ia he pouli, ne takahao foki he pelu kia ia.
23 Ne faifano a ia mo e kumi e tau mena kai, kua pehe age, Po ko fe ne toka ai? ne iloa e ia kua tata mai kia ia e aho pouli.
24 Kua matakutaku a ia he matematekelea mo e mamahi; ne kautu a laua kia ia, tuga ne patuiki kua tauteute ke tau.
25 Ha kua fakaolo atu e ia hana lima ke totoko atu ke he Atua, ne mahani fakatokoluga atu foki a ia kia Ia hana e malolo oti kana.
26 Kua oho atu a ia kia ia mo e ua mao, mo e tau tua he hana tau akau punuti kua tutaki fakalataha.
27 Kua puputa ni hana tau kauvehe he gako, kua gako lahi ni a ia.
28 Ko e mena ia ne nofo ai a ia ke he tau maga ne maona, ko e tau fale nakai nofo ai taha, kua lata he eke mo tau tanakiaga maka.
29 To nakai maukoloa ai a ia, to nakai tumau foki hana tau koloa, to nakai fakaloga ai ha lautolu a tau mena ke he motu.
30 To nakai fano kehe a ia mai he pouli; to fakapakupaku ai hana tau la ke he afi puhopuho, to uta kehe foki a ia he fafagu he hana gutu.
31 Aua neke tua a ia ke he mena fakateaga, mo e fakavai e ia a ia; ha ko e mena to eke e mena fakateaga mo taui hana.
32 To eke ia ka e nakaila katoatoa ai hana tau aho, to nakai tupuolamoui foki hana tau la.
33 To fakato hifo e ia hana tau fua mui, ke tuga ne vine; mo e fakamokulu ai hana tau fiti tuga ne olive.
34 Ha ko e mena noa mo e fua e fakapotopotoaga he tau tagata kolokolovao; to huhunu foki ke he afi e tau fale ie he tau tagata kua talia e tau mena fakaalofa ke fakakeukeu e fakafiliaga.
35 Kua fatu a lautolu ke he mahani kelea, kua fanau foki e lautolu e hala, kua taute foki he tau loto ha lautolu e tau mena fakavai.