Iopu 16:1-22
16 TI tali age a Iopu, kua pehe age,
2 Kua logona e au e tau mena pehenā loga; ko e tau tagata fakamafana fakahukia a mutolu oti.
3 To nakai kia fakahiku ai e tau kupu fakateaga? po ke heigoa e mena ne fakalagalaga ai a koe, he tali mai ai a koe kia au?
4 Na maeke foki kia au ke vagahau tuga na mutolu, ane mai kua fehikitaki a mutolu mo au; po kua maeke ni kia au ke tutaki atu e tau kupu kia mutolu, mo e luelue atu haku ulu kia mutolu.
5 Ka e mena fakamalolo aki e au a mutolu ke he haku gutu, ko e vagahau foki he haku tau laugutu ke fakamaulu ai ha mutolu a mamahi.
6 Kaeke ke vagahau atu au nakai maulu ai haku a mamahi; ka fakamate foki au ko e heigoa kia e mamahi ke galo ai ia au?
7 Ka ko ainei kua fakalolelole ai e ia au; ne fakaoti ai e koe haku a magafaoa oti.
8 Kua taofi e koe au ke mau, ti eke ia mo talahau mena kia au, kua matike foki haku tino pipili nai ke totoko mai kia au, ke talahau mena ke he mata haku.
9 Kua hēhē e ia au ke he hana ita, mo e tutuli e ia au; kua konoi hana tau nifo kia au; kua mataono mai kia au a ia ne fai fi mai kia au.
10 Kua fakamaga e lautolu ha lautolu a tau gutu kia au; kua ta e lautolu haku a kauvehe ke eke mo mena ke ma ai au; kua fakapotopoto fakalataha a lautolu ke ekefakakelea mai kia au.
11 Kua tuku atu he Atua au kia lautolu ne mahani hepehepe, kua tiaki e ia au ke he tau lima ha lautolu ne mahani kelea.
12 Ne monuina au, ka e keli mafatifati ai e ia au; ne tapaki mai foki e ia au ke he haku kakia mo e lipilipi ai e ia au; ne fakatu foki e ia au ke eke mo fakamailoga māna.
13 Kua agaagai mai kia au hana tau tagata fana; kua tuina ia ia haku fatu ti ati ni, ti nakai toka ai e ia; kua liligi e ia haku a ahu ke he kelekele.
14 Kua lipilipi e ia au ke he taha kafokia mo e taha kafokia; kua oho mai a ia kia au tuga ne toa.
15 Kua tuitui ai e au e ie talatala ke he haku tino, mo e fakakelea e au haku a hoe ke he kelekele.
16 Kua fufula haku mata he tagi, ha ha i ai foki ke he tau tua mata haku e ata he mate.
17 Pete he nakai ha i ai ha mahani favale ke he haku tau lima; kua mea foki haku a liogi.
18 Ko e kelekele na e, aua neke ufiufi e koe haku a toto, aua neke ha ha i ai foki ha mena ke lata ai mo e haku a tagi.
19 Hanai foki, kitiala, ha ha he lagi a ia ke talahau mena kia au, ha i luga foki a ia ke fakamoli mena kia au.
20 Kua va mai kia au haku a tau kapitiga; ka e hihina hifo ai he tau mata haku e tau hihina mata ki mua he Atua.
21 Kia fakafili ai e ia e mena he tagata mo e Atua, ko e mena foki he tagata mo e hana kapitiga!
22 Ha ko e mena ka mole atu falu a tau gahoa, ti fano ai au ke he puhala, ti nakai liu mai ai.