Iopu 17:1-16
17 KUA tote haku manava, kua mole atu haku a tau aho, kua taute tuai e tukuaga maku.
2 Ko e moli, ha ha ia au e tau tagata va, kua kitekite mau au ke he fakahogohogomanava ha lautolu.
3 Kia tuku mai a e koe e mena ke fakamoli aki, kia eke a koe mo fakamoli kia au ke he taufetoko ha taua mo koe; ko hai kia ke fetotoaki e tau lima ha maua mo ia?
4 Kua puipui ai e koe e tau loto ha lautolu ke nakai manamanatu ai a lautolu; ko e mena ia nakai fakamatalahi ai e koe a lautolu.
5 Ko ia ne talahau mena ke he tau matakainaga hana ke moua ai e tufaaga; to pouli e tau mata he fanau hana.
6 Kua eke foki e ia au mo kupu fakatai ke he motu; kua vihiatia foki au ki mua ha lautolu.
7 Kua pouli foki haku tau mata he tagi, kua eke foki haku a tau faahi tino oti ke tuga ne ata.
8 To ofomate foki e tau tagata mahani tonu ke he mena na; to matike atu foki a ia kua nakai hala ke he tagata kolokolovao.
9 To tumau a ia ne mahani tututonu ke he hana puhala, to tolomaki atu mau foki e malolo hana ne lima mea.
10 Ka e liliu mai a a mutolu oti, mo e o mai a mutolu; ti nakai moua e au ha tagata iloilo ia mutolu.
11 Kua mole atu haku a tau aho, kua nakai ni hoko e tau mena ne manamanatu ai au, ko e tau manatu ni he haku loto.
12 Kua eke e lautolu e po mo aho; ne pehe a lautolu kua tata e maama ke he pouli.
13 Kaeke kua tatali atu au ki Seoli ke eke mo fale maku; kaeke kua fofola ai e au haku a mohega ke he pouli;
14 Kaeke kua ui ai au ke he popo, Ko e haku a matua taane a koe; ko e uaga foki ko e haku a matua fifine mo e haku a mahakitaga haia.
15 Ti ko fe kia haku a amaamanaki? ko e haku a amaamanaki foki po ko hai kia ke kitia ia?
16 To hifo a ia ke he tau fakamau a Seoli, ka kua okioki ai ke he kelekele.