Iopu 19:1-29
19 TI tali age ai a Iopu, kua pehe age,
2 To fakamamahi mai a mutolu haku loto, mo e lipilipi e mutolu au ke he tau kupu ato a fe kia?
3 Ko e laga hogofulu ia he ekefakakelea mai kia au, kua nakai ma a mutolu he ta e mutolu au.
4 Kaeke foki kua moli kua hehe au, kua toka mau ia au ni haku a hehe.
5 Kaeke ke fakatokoluga mai moli a mutolu kia au, mo e talahau mai e mutolu kia au e tau mena ke eke mo mena ke ma ai au;
6 Kia iloa a e mutolu, ko e Atua ni ne fakahehe au ke he haku a taufetoko, kua takai ai e ia au ke he hana kupega.
7 Kitiala, ne tagi atu au ha ko e favale, ka e nakai fanogonogo mai ai kia au; ne fakatutu ai au, ka e nakai ni fai fakafiliaga.
8 Kua pa e ia haku a puhala, nakai maeke kia au ke fina age ai, kua tuku foki e ia e pouli ke he haku a tau puhala.
9 Kua uta kehe e ia ia au haku a lilifu, kua aki e ia e foufou mai he ulu haku.
10 Kua moumou e ia au ke he tau faahi oti; ko e fano ha ne fai au; kua taaki foki e ia haku a amaamanaki tuga ne akau.
11 Kua ita lahi mai foki a ia kia au, kua tuga foki he eke e ia au mo taha he hana tau fi.
12 Kua o mai fakalataha hana tau kau, mo e fakatumutumu aki e lautolu e kelekele ke eke mo puhala ke tau kia au, kua heapi takai foki a lautolu ke he haku a fale ie.
13 Kua uta fakamamao e ia ia au haku a tau matakainaga, ko lautolu foki ne mahani mo au kua eke au mo tagata kehe kia lautolu.
14 Kua tiaki au e lautolu ne magafaoa fakalataha a mautolu mo lautolu, kua nimo foki au he haku a tau kapitiga fakahele.
15 Ko lautolu kua nonofo ke he haku fale katoa mo e haku a tau fekafekau fifine, kua eke e lautolu au mo tagata kehe; kua eke au mo tagata kehe ke he manatu ha lautolu.
16 Kua ui age e au ke he haku a fekafekau ka e nakai tali mai a ia; pete he ole age e au kia ia ke he gutu haku ni.
17 Kua kehe ni e fafagu haku ke he hoana haku, ti kehe foki e ole haku ke he fanau he haku a matua fifine.
18 Kua fakavihia au ni he tau tama ikiiki, kaeke ke matike au ti fai kupu mai a lautolu kia au.
19 Kua vihiatia au he haku a tau kapitiga fakahele oti kana; ko lautolu foki ne fakaalofa au ki ai kua liliu kehe a lautolu ia au.
20 Kua pipiki haku a tau hui motua ke he haku kili mo e haku kakano, kua hao au mo e kili he haku tau nifo.
21 Kia fakaalofa mai a a mutolu kia au, kia fakaalofa mai a a mutolu haku a tau kapitiga na e; ha kua piki mai kia au e lima he Atua.
22 Ko e ha ne tutuli mai e mutolu au tuga e Atua, mo e nakai makona ai a mutolu ke he haku tino?
23 Ane tohi haku tau kupu po kua mitaki! ane fakamau haku tau kupu ke he tohi po kua mitaki ni!
24 Kia hihika ai ke he peni lapatoa mo e pili ke he kaumaka ke toka ai tukulagi!
25 Ha kua iloa e au kua moui a ia ke laveaki mai au; ko e tau aho a mui foki to tu mai a ia ki luga he kelekele.
26 Kua mole foki he fakaoti he haku kili, ko e tino nai ni, ka e noa mo e tino haku to kitia e au e Atua;
27 To kitia e au a ia māku ni, to kitekite atu foki haku tau mata kia ia; ka e nakai ko e tau mata he taha; kua oti ai haku tau manako ki loto ia au.
28 Ka pehe a mutolu, To tutuli atu pihia e tautolu a ia! ka kua kitia mai kia au e alito he kupu.
29 Kia matakutaku a a mutolu he pelu; ha ko e ita, ko e hala haia ke hoko mai ai e pelu; kia iloa ai e mutolu ko e mena fai fakafiliaga.