Iopu 2:1-13
2 KUA hoko ke he taha aho, ti o mai ai e tau tama tane he Atua ke tutu ai a lautolu ki mua he Atua, ne hau foki a Satani fakalataha mo lautolu ke tu ai ki mua a Iehova.
2 Ti pehe age a Iehova kia Satani, Ne hau i fe a koe? Ti tali age ai a Satani kia Iehova, kua pehe age, Kua hau au he fano feliuaki ke he lalolagi, mo e faifano ai.
3 Ti pehe age a Iehova kia Satani, Kua manamanatu nakai a koe ke he fekafekau haku ko Iopu, kua nakai ha ha i ai taha ke tatai mo ia ke he lalolagi, ko e tagata mahani hakohako, mo e mahani tonu, kua matakutaku a ia ke he Atua mo e kalo kehe a ia mo e tau mena kelea? kua taofi agaia foki e ia hana mahani hakohako, pete he fakaohooho mai e koe au kia ia, ke fakahoko noa e au e malaia kia ia.
4 Ti tali age a Satani kia Iehova, kua pehe age, Ko e kili ke totogi aki e kili; ko e tau mena oti foki ha ha he tagata, to ta age e ia ke totogi aki hana moui.
5 Ka e fakaolo atu e koe hau a lima mo e piki atu ke he hana tau hui motua mo e hana kakano, po ke vagahau kelea atu nakai a ia kia koe ki mua hau?
6 Ti pehe age a Iehova kia Satani, Kitiala, ha ha he lima hau a ia, ka ko e hana moui kia fakahao ai e koe.
7 Ti fano kehe ai a Satani mai mua a Iehova mo e fakahoko atu kia Iopu e gagao fufula kelea, ne kamata mai he tau aloalohui hana, ti hoko atu ke he hana tumuaki ulu.
8 Ti toto ai e Iopu e kapa kapiniu kelekele ke vou aki e ia a ia, kua nofo hifo foki a ia ke he efuefuafi.
9 Ti pehe age hana hoana kia ia, Kua taofi agaia kia e koe hau a mahani hakohako? kia vagahau kelea a a koe ke he Atua, mo e mate ai a koe.
10 Ti pehe age a ia kia ia, Kua vagahau mai e koe, tuga he vagahau he taha he tau fifine goagoa; ke talia kia e tautolu e tau mena mitaki mai he Atua, ka e nakai kia talia ai foki e tautolu e tau mena kelea? Nakai hala ai a Iopu ke he hana tau laugutu he tau mena oti na.
11 Ne logona he tau kapitiga tokotolu a Iopu e tau mena kelea oti na kua hoko atu kia ia, ti o age ai a lautolu takitaha mai he motu hana, ko Elifasa ko e tagata Timanu, ko Pilitati ko e tagata Sua, mo Sofara ko e tagata Naama; ne pulega fakalataha a lautolu ke o age ke tagi kia ia, mo e fakamafana a ia.
12 Ne kitekite mamao atu a lautolu, kua nakai iloa e lautolu a ia; ti tagi ai a lautolu, mo e leo lahi; ti takitaha a lautolu mo e hehe ai hana tapulu, mo e aku ai e tau efuefu ki luga he tau ulu ha lautolu.
13 Ti nonofo ai a lautolu mo ia ke he kelekele fitu e aho mo e fitu e po, ka e nakai vagahau atu e lautolu ha kupu kia ia; he kitia e lautolu kua lahi mahaki hana mamahi.