Iopu 20:1-29
20 TI tali age ai Sofara ko e tagata Naama, kua pehe age,
2 Ko e mena ia ko e haku tau manatu kua tali atu ai au, ha ko e haku a fakatepetepe foki ha ha i loto ia au.
3 Ne logona e au e tau kupu akonaki kua fakama ai au, ko e manamanatu foki he haku loto kua tali atu ai au.
4 Nakai kia iloa e koe e mena nai tali mai i tuai tigahau, tali he tuku ai e tagata ke he lalolagi,
5 Ne mole vave e kalaga fiafia he tau tagata mahani kelea, ko e olioli foki he tagata kolokolovao kua tuga ne magaaho ke kemo ai e mata haia.
6 Pete he hoko hake hana a homo atu ke he lagi, mo e piki atu hana ulu ke he tau aolagi.
7 To fakaoti tukulagi a ia tuga hana a faliu; to pehe age a lautolu ne kitia a ia ko fe a ia?
8 To lele kehe a ia tuga ne miti, ti nakai moua a ia; to tutuli kehe ni a ia tuga e fakakiteaga he po.
9 Ko e tau mata ne kitekite kia ia, to nakai liu foki kitia a ia; tonakai liu foki kitia a ia ke he mena ha ha i ai a ia.
10 To eke hana tau tama tane ke mitaki ai a lautolu mo e tau tagata nonofogati, mo e liuaki age he tau lima hana hana tau koloa.
11 Kua puke hana tau hui motua ke he malolo he hana vaha fuata, ka to takoto ai ni fakalataha mo ia ke he kelekele.
12 Pete he humelie e mahani kelea ke he hana gutu, pete he fufu ai foki e ia i lalo he alelo hana;
13 Pete he toka ai e ia, mo e nakai tiaki ai; ka e taofi mau ai e ia ke he hana gutu;
14 Ka e faliu hana tau mena kai ke he hana manava, kua eke mo mena kona he tau asipi i loto ia ia.
15 Ne folo ai e ia e koloa, ka to fakalua mai ai e ia, to ta hake ai he Atua mai he manava hana.
16 To mimiti e ia e mena kona he tau asipi, to mate ai a ia ke he alelo he gata.
17 Nakai kitekite a ia ke he tau vailele, ko e tau vailele ne tafe ai e meli mo e puke huhu tuli.
18 To liuaki age e ia e tau mena ne moua ai e ia he gahua, mo e nakai kai ai e ia; to liuaki age e ia ke lata mo e koloa ne moua ai, nakai fiafia a ia ki ai.
19 He favale age a ia ke he tau tagata nonofogati mo e tiaki ai e ia a lautolu; ne fofo e ia e fale ka e nakai ati hake ai e ia.
20 Nakai iloa ai e ia ha monuina ki loto ia ia, ko e mena ia nakai laveaki mai e ia ha mena he tau mena ne manako lahi a ia ki ai.
21 Nakai toe ha mena nakai kai ai e ia, ko e mena ia nakai tumau ai hana monuina.
22 To fakaatukehe ni a ia ka kua katoatoa ai he loga hana tau mena, to hohoko atu kia ia e tau lima ha lautolu oti ne matematekelea,
23 Ko e fakapuke ne fai e ia hana manava, ti fakahoko he Atua kia ia hana ita lahi, to fakato hifo ai po ke uha ki luga hana ka kua kai a ia.
24 To hola kehe a ia he kanavaakau lapatoa, ti tuina ai a ia ti ati he fana he kaufana apa kula.
25 Kua toho mai e ia, ti maaki mai he tino hana; kua hau ai e pelu kikila he hana ahu; ha ha i luga hana e tau mena ke matakutaku ai.
26 Ne toka ai e pouli oti ke eke mo koloa hana; to kai a ia he afi nakai uulo ai he tagata; ti fakaoti e ia e tau mena ne toe ke he hana fale ie.
27 To fakakite he lagi hana mahani kelea; to tu atu foki e lalolagi ke totoko atu kia ia.
28 To uta kehe e koloa ha ha he fale hana, to tafe kehe ai ke he aho he hana ita.
29 Ko e tufaaga hanā he tagata mahani kelea mai he Atua, ko e tufaaga foki ne tufa age ai he Atua kia ia.