Iopu 26:1-14
26 TI tali age ai a Iopu, kua pehe age,
2 Ne lagomatai pihia a koe kia ia kua nakai fai malolo, mo e fakamalolo ai e koe e lima lolelole!
3 Ne pihia hau a pulega mo ia kua nakai fai iloilo, mo e fakailoa lahi mai e koe e tau mena tonu!
4 Ne talahau mai e koe e tau kupu ia kia hai? Ko e agaga ha hai foki ne fina atu ia koe?
5 Kua vivivivi e tau agaga ha lautolu ne mamate, ha ha i lalo he moana mo e tau mena ha ha i ai.
6 Kua toka noa a Seoli ki mua hana, nakai fai ufiufi foki e tau mena ha ha i ai ke he malaia.
7 Ne fofola e ia e faahi tokelau ki luga he mena toka noa, ne tautau ai e ia e lalolagi ka e nakai ha i ai ha mena ke tautau a ia ki ai.
8 Kua afi ai e ia e tau vai ke he hana tau aolagi uli; ka e nakai mahehe ai e aolagi ki lalo ha lautolu.
9 Kua puipui ai e ia e mua nofoaiki he hana nofoaiki, kua fofola hifo e ia hana tau aolagi ki luga hana.
10 Ne tohi takai e ia e katofia ki luga he kili moana, ke hoko atu ke he motuaga he maama katoa mo e pouli.
11 Kua luelue e tau pou he lagi, kua ofomate ai foki ke he hana akonakiaga.
12 Ne fakamaha ai e ia e tahi ke he hana mana, ko e hana pulotu ne ta ai e ia hana fakatokoluga.
13 Ko e hana Agaga ne fakafulufuluola ai e lagi, kua tuina foki ke he hana lima e gata mafiti.
14 Kitiala, ko e tau mena ia ne hiku mai ai hana tau puhala, ko e mena tote kiliku kua logona e tautolu kia ia! ka ko e pakulagi he hana malolo, ne maeke kia hai ke logona e mena ia?