Iopu 29:1-25
29 TI taute foki e Iopu hana fakamatalaaga, kua pehe age,
2 Ane mai kua monuina au tuga ne tau mahina kua mole atu, po kua mitaki; ke tuga ne tau aho ne leveki mai ai he Atua au;
3 Ne kikila mai ai hana lamepa ki luga he ulu haku, ti maeke ai he fano au ke he pouli ha ko e maama hana;
4 Ke tuga ne ha i ai au ke he vaha ne malolo ai au, ne fakafetui ai a maua mo e Atua ke he haku a fale ie;
5 Ne fakalataha a maua mo Ia hana e malolo oti kana, mo e agaagai mai kia au haku a fanau;
6 Ne holoholo ai e au haku tau hui ke he puke huhu tuli; ne tafe mai ai foki he maka tumau po ke tau vailele e puke lolo maku;
7 Ne fina age ai au ke he maga he haku a fina age ke he gutuhala, mo e taute ai e au haku a nofoa ke he male.
8 Ne kitia he tau fuata au ti fakamumuli ai a lautolu; ne mamatike foki e tau patu momotua mo e tutu a lautolu.
9 Ne fakanono e tau iki nakai ni fai kupu, mo e tuku e tau lima ha lautolu ke he tau fofoga ha lautolu.
10 Ne fakanonono ai foki e tau leo he tau iki; ne pipiki foki e tau alelo ha lautolu ke he tau aloalogutu ha lautolu.
11 Ne logona mai he tau teliga ti fakamonuina mai ai e lautolu au; ne kitia mai he tau mata ti fakaheke mai ai kia au.
12 Ha ko e mena laveaki e au e tagata matematekelea he ui mai a ia kia au, mo ia kua nakai fai matua, katoa foki mo ia kua nakai fai lagomatai.
13 Ne hoko mai kia au e fakamonuina hana ko e mate ha ne fai; ko au foki ne lologo fiafia ai e loto he fifine takape.
14 Ne eke e mahani tututonu mo tapulu māku, ti tapulu ai au; ne eke haku a fakafiliaga ke tuga ne tapulu loa ke tuga foki e potiki.
15 Ne eke au mo tau mata he tau tagata mata pouli, ko e tau hui he tau tagata kulikuli, ko au haia.
16 Ne eke au mo matua he tau tagata matematekelea; ne kumi foki e au e kakano he taufetoko he tagata nakai iloa e au.
17 Ne pakipaki e au e tau nifo gao he tagata mahani kelea, mo e hamuti mai e au he tau nifo hana e mena ne fofo e ia.
18 Ne pehe foki au, To mate au ke he haku a fata, to fakaloga ai foki haku a tau aho ke tuga ne oneone.
19 Ne totolo atu haku a tau vaka ke he vai, ne haumia foki haku a tau la ke he po katoa.
20 Ne fou haku a lilifu ia au, mo e haku a kaufana he fakafou ai ke he haku tau lima.
21 Ne fanogonogo mai e tau tagata kia au mo e tatali mai a lautolu, nakai vagahau a lautolu kia eke ai haku a pule.
22 Kua mole atu haku tau kupu ti nakai vagahau mai foki a lautolu; ne to hifo po ke uha haku a vagahau ki luga ha lautolu.
23 Ne tatali mai a lautolu kia au tuga he tatali ke he uha; ti fakamaga e lautolu ha lautolu a tau gutu tuga he fakamaga ai ke he uha fakamui.
24 Ka kata au kia lautolu, ti nakai taofi ai e lautolu; nakai tiaki foki e lautolu haku mata fiafia.
25 Ne fifili e au ha lautolu a puhala, ti nofo ai au mo iki ha lautolu; mo e nofo ai au po ke patuiki kua nofo mo e hana kau, tuga ne taha kua fakamafana a lautolu ne tagi.