Iopu 3:1-26
3 KUA mole atu e tau mena ia, ti vagahau ai a Iopu mo e kaialu atu ke he hana aho.
2 Ne vagahau ai foki a Iopu, ne pehe age a ia,
3 Kia malaia e aho ne fanau ai au, mo e po ne pehe age ai, kua fatu e fifine, ke he tama tane.
4 Kia pouli ai e aho ia, aua neke kumi ai he Atua mai luga; aua neke kikila atu ki ai e maama.
5 Kia moua ai foki he pouli mo e ata he mate, kia tumau ai e aolagi ki luga hana, kia fakamatakutaku ai he tau mena ne fakapouli ai e aho.
6 Ko e po ia, kia fofo a ia he pouli kikio, aua neke fiafia a ia fakalataha mo e tau aho he tau, aua foki neke totou a ia ke he totouaga he tau mahina.
7 Kitiala, kia noa ni e po ia, aua neke ha ha i ai ha lologo fiafia.
8 Kia kaialu ki ai a lautolu kua kaialu ke he tau aho, ko lautolu ne pulotu he fakaohooho e tau leviatana.
9 Kia fakapouli ai e tau fetu afiafi hana; kia tatali atu ke he maama, ka e nakai ni maama; ti aua neke kitekite atu ai ke he tau tuamata he pogipogi.
10 He nakai pa ai e ia e gutuhala he manava he haku a matua fifine, mo e nakai fufu ia au e mamahi.
11 Ko e ha nakai mate au he fakatoka to mai he manava, ko e ha nakai fakaoti ai haku a fafagu he hau he manava?
12 Ko e heigoa e mena ne talia ai au he tau tulihui? ko e ha foki ne talia he tau huhu au kia kai huhu ai au?
13 Aua ia po kua takoto au mo e nofo fakatekiteki ai, mo e mohe au, ti okioki ai au,
14 Fakalataha mo e tau patuiki mo e tau pule he lalolagi, ko lautolu ne ati hake ma lautolu e tau mena kua moumou,
15 Po kua fakalataha ni mo e tau iki ne mua, ne ha i ai e tau auro, ne fakapuke ai e lautolu e tau fale ha lautolu ke he ario;
16 Po ke tuga ne fanau maua au ne fufu; tuga ne tau tama mukemuke nakai kitia e maama.
17 Nakai tuai fakalavelave ai he tau tagata mahani kelea ke he mena na, ti okioki ai ke he mena ia a lautolu kua nakai fahia.
18 Kua nonofo fakalataha mo e mafola a lautolu ne lili, nakai logona ai e lautolu e leo hana ne pule kia lautolu mo e favale.
19 Ha ha i ai ke he mena ia e tau lalo tagata katoa mo e tau iki, kua toka noa ai foki e tupa mai he pule he hana iki.
20 Kua foaki mai e maama he ha kia ia ne matematekelea, mo e moui kia lautolu ne mamahi e tau loto?
21 Ko lautolu ne tatali atu ke he mate, ka e nakai hoko mai a ia, ti keli lahi e lautolu he kumi ki ai, ka e tote ke he tau koloa kua galo he tanu.
22 Ko lautolu ne olioli lahi mo e fiafia ka moua e lautolu e tukuaga.
23 Ko e ha kua foaki mai ai e maama ke he tagata ne galo hana puhala, kua puipui he Atua a ia?
24 Ha kua mua mai haku a oi ka e nakaila kai au, kua liligi ai foki haku a fakatutu po ke magavai.
25 Ha ko e mena ne matakutaku lahi ai au, kua hoko mai ai kia au, kua hoko mai foki kia au e mena ne matakutaku ai au.
26 Nakai ni monuina au, ti nakai nofo fakatekiteki au, ti nakai okioki au, ka kua hoko mai e matematekelea.