Iopu 30:1-31
30 KA ko ainei kua feki mai kia au a lautolu ne fakamui kia au; ko e tau matua ha lautolu ne vihia e au ke tuku fakalataha, mo e tau kuli he haku a fuifui mamoe.
2 Ko e malolo he tau lima ha lautolu ne aoga ha ha ia kia au, ko e tau tagata ne mole atu e malolo ha lautolu?
3 Ne tino ikiiki a lautolu he nonofogati mo e hoge; ne gau e lautolu e tau mena he tutakale, ko e pouli he tagitagimoki, mo e tau mena kua moumou.
4 Kua faki e lautolu e tau lakau kona ke he mena ne tutupu ai e tau vao ikiiki, mo e tau vaka ratami ne eke mo tau mena kai ma lautolu.
5 Kua tutuli kehe a lautolu he mena ne nonofo ai e tau tagata, ne hea age kia lautolu poke tau tagata kaiha;
6 Kia nonofo a lautolu ke he tau mena hokulo he tau pahua, ko e tau ana foki he kelekele mo e tau kaumaka.
7 Kua tagi a lautolu po ke tau asini vao i loto he tau vao ikiiki; ne fakapotopoto ai a lautolu i lalo he tau akau magiiho.
8 Ko e fanau he tau tagata goagoa a lautolu; ko e fanau ni he tau tagata kolokolovao; ne vega kehe a lautolu he motu.
9 Ka ko ainei kua eke au mo lologo ha lautolu, kua eke foki au mo kupu va kia lautolu.
10 Kua fakavihia mai a lautolu kia au, mo e fakamamao a lautolu ia au; nakai toka e lautolu he tauanu ki mua haku.
11 Ha kua vevete e ia haku a filo kaufana, mo e fakamamahi e ia au, kua tiaki ai e lautolu e fakamau gutu ki mua haku.
12 Kua mamatike mai e fanau kelea ke he haku a faahi matau, kua taholi ai e lautolu haku tau hui, kua tanu foki e lautolu e tau puhala ha lautolu ke malaia ai au.
13 Kua keli moumou e lautolu haku a puhala, kua fakalahi ai a lautolu haku a matematekelea, ko e tau tagata ni kua nakai fai lagomatai a lautolu.
14 Kua feoho mai ai a lautolu, tuga ne o mai ai he mena pulahi he kaupa ne maona; ne tautaomi mai ai a lautolu ke he mena ne lepetia.
15 Kua fuluhi mai kia au e tau mena ke matakutaku ai; kua tutuli e lautolu haku a lilifu tuga ne matagi; kua mole atu foki haku a monuina tuga ne aolu.
16 Hanai, kua fakalolelole haku loto ki loto ia au; kua moua au he tau aho matematekelea.
17 Kua mamahi lahi ni haku tau huimotua he tau po, nakai okioki he uhu haku kakano oti.
18 Kua faliu kehe haku a tapulu he lahi mahaki haku gagao, kua lili ai au ke tuga ne ua he tapulu tino.
19 Kua liti e ia au ke he pelapela, kua eke foki e ia au ke tuga ne efuefu mo e efuefuafi.
20 Kua tagi atu au kia koe, ka e nakai tali mai ai a koe kia au; kua tu atu au, ka e nakai fofoga mai a koe kia au.
21 Kua liliu kehe a koe kua favale mai a koe kia au; kua tutuli e koe au mo e hau a lima, malolo.
22 Kua nikiti e koe au ke he matagi, kua fakaheke ai e koe au ki luga hana, kua fakalolelole e koe au, mo e fakamatakutaku ai e koe au.
23 Kua iloa e au to uta e koe au ke he mate, mo e fale kua kotofa ma e tau tagata momoui oti kana.
24 Ka e nakai ni fakahoko atu e ia hana lima ke he tukuaga, kaeke ke ha ha i ai ia lautolu e liogi he fakahoko ai e ia e malaia.
25 Nakai kia tagi au ha ko ia ne matematekelea? nakai kia mānu haku loto ha ko lautolu ne nonofogati?
26 Ne tatali au ke he mitaki, ti hoko mai ai e kelea; ne amaamanaki foki au ke he maama, ti hoko mai ai e pouli.
27 Ne ofoofo noa haku manava mo e nakai okioki; kua hohoko mai kia au e tau aho matematekelea.
28 Kua faifano au mo e uli ka e nakai ko e la ne uli ai, kua matike au ke he fakapotopotoaga mo e fakatutu au.
29 Kua eke au mo matakainaga he tau tanimo, mo kapitiga foki he tau iaena.
30 Kua uli ni haku kili, kua vela foki haku tau hui motua ke he vevela.
31 Ko e mena ia kua liliu haku a kitara ke he mānu, ko e haku a kofe foki kua liliu mo leo ha lautolu ne tagi.