Iopu 31:1-40
31 NE eke e au e maveheaga mo e tau mata haku, ko e heigoa foki e mena ke manatu ai au ke he tamafine tote?
2 Ko e heigoa foki e tufaaga mai he Atua ha ha i luga? mo e tufaaga mai ia Ia hana e malolo oti kana ha ha he tau mena tokoluga?
3 Nakai kia toka ai e malaia ma lautolu ne mahani hepehepe, mo e matematekelea ma lautolu ne eke e tau mena kelea?
4 Nakai kia fioia e ia haku a tau puhala, mo e totou ai e ia haku a tau lakaaga oti?
5 Kaeke kua faifano au mo e mahani pikopiko, mo e alumaki atu haku tau hui ke fakavai;
6 (Kia fafati ai au ke he fua tautau tonu, kia iloa ai he Atua haku a mahani hakohako.)
7 Kaeke kua o kehe haku a tau hui he puhala, mo e mui atu haku loto ke he haku tau mata, mo e pipiki mai ha mena kelea ke he tau lima haku;
8 Kia gana e au e tau saito, ka kia kai ai e taha; kia taaki ai foki haku a tau mena ne tutupu he kelekele.
9 Kaeke kua fakavai haku loto he fifine, po ke takahao au ke he gutuhala he tagata ne katofia mo au;
10 Kia holo saito ai he hoana haku ma e taha, kia momohe foki mo ia e tau taane kehe.
11 Ha ko e hala lahi ia, ko e mahani kelea ni haia ke fakahala ai he tau fakafili.
12 Ko e afi ni haia kua huhunu ato fakaoti ai; ti taaki ai foki haku a tau mena oti ne tutupu he kelekele.
13 Kaeke he nakai mafai au ke fakafili ai e tau mena he haku a tau fekafekau tane po ke haku a tau fekafekau fifine, he taufetoko ai a mautolu mo lautolu;
14 Ko e heigoa kia e mena ke eke e au ka matike ma e Atua? Ko e heigoa foki ke tali atu au kia ia ka aahi mai e ia au?
15 Ko ia ne eke ai au ke he manava, nakai kia eke foki e ia a ia? Nakai kia ko e tokotaha ne eke ai a maua tokoua ke he manava?
16 Kaeke kua taofi e au e tau mena ne manako ki ai e tau tagata nonofogati, po ke pouli ai e tau mata he fifine takape ha ko au;
17 Kaeke foki kua kai tokotaha au haku a tau mena kai, ka e nakai kai ai foki mo e tau tama kua nakai fai matua.
18 (Ko e mena tutupu fakalataha a maua mo ia tali he tote au, ne eke au ke tuga ne matua tane hana; tali foki he fanau au he haku a matua fifine kua leveki e au e fifine takape.)
19 Kaeke kua kitia e au taha kua mate he nakai fai tapulu a ia, mo e tagata nofogati kua nakai fai felevehi;
20 Kaeke kua nakai fakamonuina mai kia au he tokupu hana, kaeke foki kua nakai mafana a ia he tau fulu he tau mamoe haku;
21 Kaeke kua nikiti atu e au haku lima kia ia kua nakai fai matua, he kitia e au ke he gutuhala e tagata ke lagomatai mai kia au;
22 Kia to kehe ai haku fulima he paka lima, ti fati foki haku lima mai he tulilima.
23 Ha kua ha ha ia au e matakutaku ke he malaia mai he Atua; nakai maeke foki ha mena kia au ha ko e hana mua ue atu.
24 Kaeke kua eke e au e auro mo mena ke falanaki au ki ai, po kua pehe age au ke he auro mitaki, Ko e haku a mena kua tua au ki ai a koe;
25 Kaeke kua fiafia au ha kua loga haku a tau koloa, he moua foki he tau lima haku e tau mena loga.
26 Kaeke kua kitekite au ke he la he kikila mai a ia; mo e mahina he hake a ia mo e huhulu mai;
27 Mo e fakavai fufu haku loto, mo e figita ai he gutu haku haku a lima;
28 Ko e hala ni haia ke fakahala ai he tau fakafili; ha ko e mena ka pihia kua fakatikai e au e Atua ha ha i luga.
29 Kaeke kua olioli au he malaia hana kua fakavihia mai kia au, mo e fiafia au he moua ai a ia he kelea;
30 (Nakai mafai foki haku gutu ke hala ke ole atu ke malaia a ia.)
31 Kua nakai kia pehe age e tau tagata he haku a fale ie, Ko hai kia kua nakai makona he kai hana tau manu?
32 Nakai mohe i fafo e tagata kehe; ne fakatokanoa e au haku a gutuhala ma e tau fenoga.
33 Kaeke kua ufiufi e au haku a tau holifono tuga na Atamu, mo e fufu e au haku a mahani kelea ke he haku loto,
34 Ne matakutaku au he motu o tagata tokologa; mo e fakaatukehe au ha ko e fakavihia mai he tau magafaoa; ko e mena ia ne fakanono ai au mo e nakai hu atu au he gutuhala.
35 Ane mai kua ha i ai taha ke fanogonogo mai kia au, po kua mitaki! (Kitiala, ko e haku a fakamailoga hanai; kia tali mai a Ia hana e malolo oti kana kia au,) ane toka foki ia au e tohi kia au ne tohi ai e ia ne taufetoko mo au!
36 Po kua fua e au ke he haku ua; po kua pipi ni e au ke eke mo foufou māku.
37 Po kua fakakite atu e au kia ia e tau lakaaga haku po ke fiha he totou; po kua fakatata au kia ia tuga ne iki lahi.
38 Kaeke kua tagi atu haku a fonua ha ko au, mo e tagi fakalataha ai hana tau fakatapuke;
39 Kaeke kua kai noa e au hana tau fua mo e nakai taui, mo e mamate ai ha ko au e tau tagata ha lautolu e fonua;
40 Kia tutupu mai ai e tau akau talatala ke totogi aki e tau saito, mo e tau pupu kelea ke totogi aki e tau karite!
Kua fakahiku tuai e tau kupu a Iopu.