Iopu 33:1-33
33 HANAI, Iopu na e, Kia fanogonogo mai a a koe ke he haku a vagahau, mo e fakateliga mai a koe ke he haku a tau kupu oti.
2 Kitiala, kua fakamaga atu au haku gutu, kua vagahau haku alelo ke he haku gutu;
3 Ko e fakamoli he haku loto to vagahau atu ai haku a tau kupu; ko e haku tau laugutu foki to vagahau atu ai mo e tonu ke he tau mena kua iloa.
4 Ne eke ai au he Agaga he Atua; ko e fafagu foki hana Hana e malolo oti kana kua moui ai au.
5 Kaeke kua maeke, kia tali mai a a koe kia au, kia taute mai e koe hau a tau kupu kia au; kia tu mai a.
6 Kitiala, kua tatai a taua mo koe ki mua he Atua, Ko au foki ne eke aki au he kelekele.
7 Kitiala, nakai fakamatakutaku ai a koe ke he haku a tau mena ke matakutaku ai; nakai mamafa foki haku a kavega ki luga hau.
8 Ko e moli kua vagahau mai e koe, kua fanogonogo atu au, ne logona atu foki e au e tau kupu he vagahau hāu kua pehe mai,
9 Kua meā au; kua noa au mo e holifono kua mahani hakohako au; nakai fai mahani kelea foki au;
10 Kitiala, kua kumi mena a ia ke ita mai ai kia au, ko e hana manatu kia au, kua fai fi au ki ia.
11 Kua fakamau e ia hau a tau hui ke he akau, kua lamalamati e ia ke he hau a tau puhala oti.
12 Kitiala, to tali atu au kia koe, nakai tututonu a koe ke he mena na; ha kua mua ue atu e Atua ke he tau tagata.
13 Ko e heigoa e mena kua taufetoko ai a mua mo ia? ha kua nakai fakamatala mai e ia ha mena he tau mena hana.
14 Ko e mena vagahau laga taha mo e laga ua mai he Atua, ka kua nakai manatu ki ai e tau tagata.
15 Ko e miti, ko e fakakiteaga he po, he momohepopo ai e tau tagata, he momohe a lautolu, i luga he tau moheaga;
16 Ti fakafanogonogo ai e ia e tau teliga he tau tagata, mo e fakamau ai e ia e tau mena ne fakaako atu ai e ia kia lautolu.
17 Kia fakaliu kehe ai e ia e tagata he hana tau mena ne eke; kia fufu foki e ia e mahani fakatokoluga neke kitia he tagata.
18 Kua taofi e ia a ia ke aua neke hoko a ia ke he luo, katoa mo e hana moui ke aua neke fakaoti ia ke he pelu.
19 Kua akonaki ai a ia ke he mamahi ki luga he moheaga hana, mo e mamahi lahi mau he hana tau hui motua.
20 Kua vihia foki e ia e tau mena kai, nakai fia kai foki a ia e tau mena lolo.
21 Kua fakaoti hana kakano, nakai tuai kitia ai, ko e hana tau hui motua nakai kitia, kua toka noa tuai.
22 Kua fakatata foki a ia ke he tukuaga, mo e hana moui kia lautolu kua eke ke kelipopo a ia.
23 Kaeke kua ha ia ia e agelu, ko e taha ke liliu kupu, ko e taha ni he tokoafe, ke fakakite ke he tagata e mahani hakohako kua lata ke eke e ia.
24 Ti fakaalofa age a ia kia ia, mo e pehe age, Kia laveaki mai a ia, neke hifo a ia ke he luo; kua moua e au e mena ke taui aki a ia.
25 Kua liu moui mitaki hana tino ke homo atu ke he tino he tama tote; to liu foki a ia ke he hana vaha fuata.
26 Ti liogi a ia ke he Atua, ti finagalo fakaalofa mai a ia kia ia; ti kitia e ia hana fofoga mo e fiafia; ti liu aki mai foki e ia ke he tagata hana tututonu.
27 Kua haga atu a ia ke he tau tagata, mo e pehe atu, Kua hala au, kua eke e au e mahani keukeu, ka e nakai ni aoga ia kia au.
28 Kua laveaki mai e ia haku agaga neke hifo a ia ke he luo; to kitia foki he moui haku e maama.
29 Kitiala, kua eke lagaua mo e lagatolu he Atua e tau mena oti na ke he tagata,
30 Kia liuaki mai hana agaga he luo, kia fakamaama ai a ia ke he maama he tau tagata momoui.
31 Fofoga mai a ma Iopu na e, kia fanogonogo mai a a koe kia au; kia fakanono a koe ka e vagahau atu e au.
32 Kaeke kua fai kupu a koe ke tali mai kia au, kia vagahau mai a; ha kua loto au kia talahaua tututonu a koe.
33 Kaeke kua nakai fai kupu, kia fanogonogo mai a a koe kia au; kia fakanono a, ti fakaako atu e au a koe ke iloilo ai.