Iopu 34:1-37
34 NE tali age ai a Elihu, ne pehe age,
2 Kia fanogonogo mai a mutolu ke he tau kupu haku ko mutolu kua iloilo; ko mutolu ne iloa e tau mena, kia fakateliga mai a mutolu kia au.
3 Ha kua kamatamata he teliga e tau kupu, tuga ne kamata ai he gutu e tau mena kai.
4 Kia fifili e tautolu ma tautolu e tau mena kua tonu; kia iloa e tautolu ko tautolu ni, po ke heigoa kua mitaki.
5 Ha kua pehe mai a Iopu, Kua tututonu au; kua uta kehe foki he Atua haku a fakafiliaga.
6 Kua eke au mo tagata pikopiko he fakafili ai au, kua kafokia kelea ni au, ka e noa au mo e holifono.
7 Ko hai kia e tagata ke tatai mo Iopu, kua inu ai e fakafiu, tuga he inu e maga vai?
8 Kua fakafetui a ia mo lautolu kua eke e mahani hepehepe, mo e o fano foki a lautolu mo e tau tagata mahani kelea.
9 Ha kua pehe mai a ia, nakai aoga ke he tagata ke fiafia ai a ia ke he Atua.
10 Hanai, ko e tau tagata pulotu na e, kia fanogonogo mai a kia au; kia mamao mo e Atua ke mahani kelea ai a ia, mo Ia hana e malolo oti kana ke mahani hepehepe a ia.
11 Ha kua taui atu e ia ke he tagata hana ni a gahua; ti moua ai foki he tau tagata takitokotaha ke lata mo e mahani ha lautolu.
12 Ko e moli ni, nakai mahani kelea e Atua, nakai fakakeu foki a Ia hana e malolo oti kana, e fakafiliaga.
13 Ko hai ne kotofa a ia ke pule ke he lalolagi? Po ko hai foki ne taute e lalolagi kakai oti kana?
14 Kaeke ke finagalo pihia a ia kia ia, kaeke ke liuaki kia ia hana agaga, mo e hana fafagu
15 Ti mamate fakalataha ai e tau tagata oti kana, mo e liliu atu foki e tau tagata ke he kelekele.
16 Kaeke kua ha ha ia koe e loto manamanatu kia fanogonogo mai a ke he tau mena nai; ti fakateliga mai a koe ke he tau kupu haku.
17 To pule kia a ia kua vihiatia e mahani hakohako? mo e fakahala kia a ia ne tututonu mo e malolo?
18 To pehe age kia ke he patuiki, Ko e tagata kolokolovao a koe? ko e tau iki foki, Kua mahani kelea a mutolu?
19 Ti au atu he nakai pihia kia ia kua nakai fakamailoga e tau tui, mo e nakai homo atu hana hagao mai ke he tau tagata maukoloa ke he hana haga mai ke he tau tagata nonofogati, ha ko e gahua he hana tau lima a lautolu oti.
20 Kua mamate fakalutukia a lautolu, ke he tuloto po; kua vivivivi ai e tau tagata, mo e mole atu a lautolu; kua uta kehe ai foki e tau tagata malolo ka e nakai ko e tau lima ne uta kehe ai a lautolu.
21 Ha kua fofoga mai a ia ke he tau puhala he tau tagata takitokotaha, kua fioia foki e ia hana tau lakaaga oti.
22 Nakai fai pouli ti nakai ha ha i ai foki e ata he mate ke fakamumuli ai a lautolu kua eke e tau mahani kelea.
23 Ko e mena nakai manatu foki e ia ke he tagata, ke fina atu ai a ia ke he Atua ke eke e fakafiliaga.
24 Kua lipilipi ai e ia a lautolu ne malolo mo e nakai kumikumi ki ai, ti fakatu foki e ia falu ke hukui aki a lautolu.
25 Ko e mena ia kua fioia e ia ha lautolu a tau gahua, ti liti hifo ai e ia a lautolu ke he po, ti tukimalipilipi ai a lautolu.
26 Kua mahani kelea a lautolu, ko e mena ia kua fahi e ia a lautolu ke he mena kua kitekite ai e tau tagata;
27 He o kehe a lautolu mo e nakai mumui atu a lautolu kia ia, ti nakai manatu foki e lautolu ke he taha he hana tau puhala oti.
28 Ne hoko atu kia ia e tagi ha lautolu ne lolelole, ne fanogonogo foki a ia ke he tagi ha lautolu ne matematekelea.
29 Ka foaki mai e ia e okiokiaga, po ko hai kia ke fakatupu ai e fakaatukehe? ka haga kehe foki e ia hana fofoga po ko hai kia ke kitekite kia ia? po ke eke ai ke he motu po ke eke ke he tagata tokotaha;
30 Neke eke mo patuiki e tagata kolokolovao, neke tauhele ai e motu.
31 Ha kua pehe kia taha ke he Atua, Ne akonaki ai au, nakai tuai hala foki au;
32 Ko e tau mena nakai iloa e au kia fakaako mai ai e koe kia au; kaeke kua mahani kelea au, to nakai tuai pihia foki?
33 Po ke taui mai kia e ia e tau mahani ke lata mo e manatu hāu, he totoko atu a koe ki ai; ha ko koe ke fifili, ka e nakai ko au? Hanai, kia vagahau mai a e mena kua iloa e koe.
34 To pehe mai e tau tagata pulotu, mo e tau tagata iloilo oti kua fanogonogo mai kia au,
35 Kua vagahau a Iopu mo e nakai iloa, kua eke e ia hana tau kupu mo e nakai manamanatu.
36 Ko e haku loto hanai, Kia kamatamata fakaoti a Iopu, he tali ai a ia tuga ne tau tagata mahani kelea.
37 Ha kua lafilafi ai e ia e fakafualoto ke he hana tau hala, kua pati e ia hana tau lima kia tautolu, kua fakaloga foki e ia hana tau kupu ke he Atua.