Iopu 36:1-33
36 KUA vagahau foki a Elihu, kua pehe age,
2 Kia fakahautoka fakatote mai kia au, to fakakite atu e au kia koe, ha kua toe agaia ni e tau kupu ma e Atua.
3 To ta mai e au haku a iloilo he mena mamao, to talahaua foki e au kua tututonu a ia ne eke au.
4 Ko e moli ni, nakai pikopiko haku a tau kupu; ha ha ia koe taha kua katoatoa hana iloilo.
5 Kitiala, kua mua ue atu e Atua, ka e nakai fakavihia e ia taha, kua mua ue atu a ia ha ko e malolo he hana finagalo.
6 Nakai fakamoui e ia a lautolu ne mahani kelea; ka e eke e ia e fakafiliaga ma lautolu ne matematekelea.
7 Nakai haga kehe hana tau fofoga mo lautolu ne mahani tututonu; ka e fakanonofo tukulagi e ia a lautolu mo e tau patuiki ke he nofoaiki, ti fakamatalahi ai a lautolu.
8 Kaeke kua lili a lautolu ke he tau toua lapatoa, mo e helea a lautolu ke he tau toua ke matematekelea ai,
9 Ti fakakite ai e ia kia lautolu e tau mena ne eke e lautolu, mo e ha lautolu a tau holifono, ne mahani fakatokoluga ai a lautolu.
10 Ti fakafanogonogo ai e ia e tau teliga ha lautolu ke he akonakiaga, mo e pehe age kia lautolu, kia liliu mai a lautolu he mahani kelea.
11 Kaeke ke fanogonogo a lautolu mo e fekafekau kia ia, ti oti ai e tau aho ha lautolu mo e monuina, mo e tau tau ha lautolu mo e tau mena ke fiafia ai.
12 Ka ko e mena ka nakai fanogonogo a lautolu, ti fakaoti ai a lautolu he pelu, to mamate foki a lautolu mo e nakai fai iloilo.
13 Ka ko lautolu ne loto kolokolovao, ne tatanaki ai e lautolu e ita; nakai tagi atu a lautolu kia ia he lili ai e ia a lautolu.
14 Kua mamate a lautolu ke he vaha fuata; kua hiku foki ha lautolu a moui fakalataha mo lautolu ne mahani Sotoma.
15 Kua laveaki mai e ia a ia ne matematekelea he hana matematekelea; kua fakafanogonogo foki e ia ha lautolu a tau teliga he pehia a lautolu he favale.
16 Po kua takitaki foki e ia a koe mai he mena apiapi ke he mena pulahi nakai ha i ai ha mena apiapi; ko e tau mena foki kua fakatoka ai ke he laulau hau ko e tau mena lolo lahi ni.
17 Ka ko e mena ka fakakatoatoa ai e koe e fakafiliaga he tau tagata mahani kelea; ti moua a koe he fakafiliaga mo e fakahala.
18 A koe neke fakalagalaga ai a koe he ita hāu ke totoko atu ke he akonakiaga; ti nakai laveaki ai a koe he palepale lahi.
19 Ne finagalo kia a ia ke he koloa hau ke aua neke matematekelea a koe, po ke finagalo kia a ia ke he tanakiaga koloa oti ni?
20 Aua neke manako ke he po, kua uta kehe ai e tau motu he tau mena ha ha i ai a lautolu.
21 A koe neke loto a koe ke he mahani kelea; ha kua mua hau a loto ke he mena ia ke he loto hau ke he matematekelea.
22 Kitiala, kua mua ue atu e Atua ke he hana malolo; ko hai kia kua fakaako atu ke tuga a ia?
23 Po ko hai kua kotofa kia ia hana puhala? po ko hai foki ke pehe age kia ia, Kua mahani hepehepe a koe.
24 Kia manatu a kia fakaheke atu ke he hana tau gahua ne lologo fakaheke ki ai e tau tagata;
25 Ne kitekite ki ai e tau tagata oti ni, kua kitia mamao atu he tagata.
26 Kitiala, kua mua ue atu e Atua, ti nakai iloa e tautolu a ia; nakai maeke foki ke totou hana tau tau po ke fiha.
27 Ha kua futi hake e ia po ke uha ginigini e vai; ti to hifo e uha ke hukui aki hana hahau,
28 Kua hihina mai ai he tau aolagi; kua to lahi ai ki luga he tau tagata.
29 Kua iloa foki kia e taha hana a fofola he tau aolagi, mo e tomumu mai he fale api hana?
30 Kitiala, kua fofola e ia ki luga hana hana maama; kua ufiufi foki e ia e hala toka he moana.
31 Ko e tau mena ia kua fakahala ai e ia e tau motu; kua foaki mai ai e ia e tau mena kai ke loga.
32 Kua ufiufi e ia hana tau aloalolima ke he uhila; ne poaki ai e ia e mena ke to ki ai a ia.
33 Kua fakailoa a ia he pakulagi hana; kua fakailoa ai ke he tau fuifui manu foki a ia ha ha i luga.